Del Junio 1, 2023, manada del maga Bethel na entero mundo el ya principia ricibi otravez maga visita. Mas de tres año con ese nuay puede hace por causa na COVID-19 pandemic. Un especial dia este para con el maga miembro del familia Bethel na entero mundo y con el miles quien ya visita.

Cuando ya llega el maga visita, el maga Bethelite ta agarra maga welcome sign, ta canta, tan smile y ta abraza kanila. Si Ellis Bott, quien ya principia sirvi na world headquarters na Warwick, New York, durante el pandemic, ya habla: “Bonito gayot para mira con el maga Bethelite que tan linea apuera del lobby agarrando con el maga welcome sign! Ya puede yo mira con el manada que ta llura na alegria y ya manda se acorda conmigo si paquemodo de especial el Bethel.” Alegre gayot si Alexis Alexander, un part-time commuter Bethelite, para man greet y man welcome con el maga visita. Ele ya habla: “Un privilegio gayot que puede mira con el amor del maga hermano y hermana para con Jehova y para na De Suyu casa.”

Excited gayot si Mi-yeon Jo para lleva man tour con el de suyu ocho año anak hombre que si Yoon na branch office na South Korea. Excited gayot tambien si Yoon para man tour na Bethel poreso ya tormenta le durmi. Si Mi-yeon ya habla: “Apenas kame dispierta, ya oi kame con el cancion de Caleb y Sophia cuando ya visita sila na Bethel. Y gane, ya tuca kame se na auto mientras tan viaje para na branch.” Yan enjoy gayot si Yoon con el tour poreso ya habla le: “Animal ya lang el falta na Bethel, paraiso ya.”

Si Noah Johnsen, un joven de Alberta, Canada, y ta sufri na spinal muscular atrophy, quierre gayot man tour na Bethel na New York, U.S.A. Ciendo gendeh le puede viaja por medio na aeroplano por causa na de suyu situacion, ya viaja sila de suyu mayores maga 4,100 kilometro para man tour na United States branch na Wallkill, New York. Si Noah ya habla: “Acerca na cosa yo ya experiencia alla, un palabra lang el cosa yo puede habla—amor. Ya sinti yo el amor de Jehova y del maga hermano y hermana.”

Bien excited gayot el un 76 año que si Fyodor Zhitnikov y el de suyu mujer que si Yulita para man tour na museum na Bethel facility na Kazakhstan. El un seccion na museum ta dale mira cuanto maga hermano y hermana quien fiel ya aguanta por cuanto decada. Especial gayot este exhibit con Hermano Fyodor cay ya puede le sirvi junto con el manada kanila. Ya aprecia gayot le con el esfuerzo que ya hace para prepara con el exhibit. Ele ya habla: “Si ya puede preserva el maga hermano con el diaton trabajo y ministerio hasta na este tiempo, asigurao mas ta acorda si Jehova con el todo cosa kita ta hace y ta aprecia le con el trabajo del cada uno kanaton.”

Alegre kita que puede otravez ricibi maga visita na maga facilidad de Bethel na entero mundo. Ta esperanza kita que miles pa el quien hay visita na venedero maga dia!—Salmo 122:1.

Puede mira abajo con el maga letrato del cuanto del diaton maga hermano y hermana que tan tour na diferente maga facilidad y museum de Bethel.