Del Junio 14, 1947, tiene un barco el ya llega na Manila donde muntao el tres hombre que si Hermano Lorenzo Alpiche, Earl Stewart y Victor White. Sila el maga primer Testigo misionario quien ya llega na Pilipinas. Maga un mes despues, yan junto kanila el un hombre quien ya gradua tambien na Gilead, si Hermano Nick Skelparick.

Yan train enbuenamente con este maga hermano y preparao sila trabaja. Nuay dura, ocupao sila ayuda con el 2,400 publisher quien ta participa ya na trabajo predicacion na entero Pilipinas. Pagka 1958, adentro lang del 11 año, el numero del maga quien ta predica ya alcanza mas de 23,000 que diez beses de manada compara del una. Ahora, 75 año despues llega el primer maga misionario, el numero del maga siervo de Jehova na Pilipinas ya alcanza mas de 230,000.

El llegada del maga misionario ya plaña gayot enbuenamente. Cerca dos meses antes sila llega, principia Marzo 31 hasta Abril 2, 1947, si Hermano Nathan H. Knorr, que presidente del Watch Tower Society na aquel tiempo, ya dale talk na un convencion del maga Testigo de Jehova na Manila. Ya asigura si Hermano Knorr con el maga ta atende que gendeh dura, tiene maga misionario quien ya gradua na Gilead el llega para ayuda organiza con el trabajo predicacion despues el grabe destrozo que ya causa el guerra mundial dos.

Na ultimo dia del convencion, 151 nuevo maga hermano y hermana el ya bautiza na Manila Bay mientras atras kanila puede mira el maga sumido barco estaba na guerra. Na aquel mismo dia, ya dale si Hermano Knorr el public talk “The Joy of All the People” na 4,200 audience. Yan broadcast tambien con el talk na radio para puede oi el miles de gente na entero nacion. Si Hermanor Knorr y Hermano Milton Henschel, quien estaba tambien na world headquarters, ya anima con el maga hermano y hermana por medio na Biblia que continua con el trabajo predicacion na organizao manera.

Mientras ta medita acerca con el cosa ya pasa del ya pasa 75 año, si Hermano Denton Hopkinson, un misionario quien ta sirvi na Pilipinas desde 1954, ya habla: “Aquellos maga primer misionario quien ya llega del 1947 ya hace gayot grande esfuerzo para anima y organiza con el maga congregacion y prepara kanila na mas grande trabajo que hay llega.”

Alegre kita que el diaton Tata na cielo que si Jehova, ta bendici con el trabajo y el esfuerzo del de suyu maga siervo na Pilipinas y na todo parte del mundo.—Isaias 60:22.