Si Hermana Barbara Osmyk-Urban, un single parent quien ta queda na Rzeszów, Poland, ya usa con el De Familia Adoranza cada semana para enseña con el de suyu diez año anak que si Jakub y con el de suyu ocho año anak que si Nina acerca na pagka-hospitable y empatia. Ya aplica sila con el cosa sila ya aprende acerca con ese. Desde ya principia el guerra na Ukraine del Febrero 24, 2022, mas de 20 hermano y hermana ya el quien ya esta na diila casa.

Cuando ya sale el diaton maga hermano y hermana na Ukraine para anda na maga lugar que lejos na peligro, el maga Testigo de Jehova na Poland y na otro maga nacion alegre ya manda queda kanila na diila casa y ya ayuda kanila na otro maga manera. Ahora, tiene cerca 11,000 de maga Testigo estaba na Ukraine el quien ya evacua para na Poland. Durante el guerra, gendeh ta permiti sale na nacion con el maga hombre de Ukraine que edad 18 hasta 60 año, puera con aquellos quien tiene tres anak o mas pa que maga menor de edad.

“Este maga refugee que estaba na Ukraine amo maga espiritual familia diamon,” ya habla si Barbara. Ansina tambien el cosa ta sinti el de suyu maga anak. Si Jakub y si Nina alegre ya manda usa con el diila cuarto. Ciendo gendeh sila ta entende con el lengguaje del uno y otro, tan smile ya lang sila, ta abraza y ta llura para dale mira con el cosa sila ta sinti. Cuando ya sale ya el maga refugee, ya habla si Jakub que ya queda bien silencio el casa y ya pidi con el de suyu nana si puede ba sila manda pa queda otro maga hermano y hermana na diila casa.

Kanda Hermano Łukasz Cholewiński y Rafał Jankowski yan voluntario para lleva maga ayuda na Ukraine. Ya puede sila mira manada maga mujer y bata quien ta llura mientras ta espera que puede traveza na border para queda lejos na peligro. Si Hermano Łukasz ya habla: “Maka-bilib gayot que alegre siempre el maga hermano y hermana con quien kame ya anda.”

El viaje para na Ukraine y pabolbida ta alcanza cuatro hora. Si ya llega ya el ayuda, el maga hermano na Ukraine ta distribui con ese na diferente parte del nacion. Pirmi gayot tiene maga hermano y hermana quien tan voluntario man viaje para na Ukraine maskin pa peligroso. “Un grande honor y privilegio que puede ayuda,” ya habla si Rafał.

Si Hermana Elżbieta Ustrzycka, quien ta queda na Rzeszów, ya relata si cosa le ya sinti cuando ya queda na de suyu casa el maga Testigo de Jehova de Ukraine: “Ya puede gayot yo sinti el amor del maga anciano cuando ya hace sila hatud con el maga familia para na diamon casa maskin media noche ya. Gendeh gayot yo ulvida con el cosa yo ya puede mira.”

Si Hermano Bartłomiej Figura amo uno del maga anciano quien ta hace gayot esfuerzo para dale ayuda. Ele y el de suyu mujer, si Estera, ta anda na border o na maga estacion de tren para lleva con el maga hermano y hermana na maga lugar que lejos na peligro. Tiene vez, ta busca sila si onde sila esta cay ta manda sila con el maga hermano y hermana que esta na diila apartment. Si posible, ta dale tambien sila material suporta.

“Un espiritual familia kita,” ya habla si Bartłomiej. “Ta sinti kame que bien close kame na maga hermano y hermana. Si ta ayuda kame con otro, mas mucho ta puede mira si paquemodo si Jehova ta dale con el maga especifico necesidad del diaton maga hermano y hermana.”

Ahora, el diaton maga hermano de Poland ya puede ya hace mas de 23,000 maga package que ta contene maga comida, hygiene product y otro pa maga cosas que necesita.

Tiene kita confianza que si Jehova hay continua dale con el necesidad del maga Testigo de Jehova de Ukraine cay ta continua queda bondadoso el diaton maga hermano y hermana.—Proverbio 11:24; Roma 12:13.