Del Junio 7, 2022, el European Court of Human Rights (ECHR) ya hace sale un importante decision a contra na Russia por causa na persecucion na maga Testigo de Jehova. El ECHR ya declara que contra na ley que prohibi el Russia con el maga Testigo de Jehova del 2017. Ya habla tambien el Corte que ilegal que prohibi con el printed publicacion y con el jw.org. Ya manda con el Russia que hace descanza con el todo suspendido criminal caso contra con el diaton maga hermano y hermana y larga con el todo aquellos na preso. Ya manda tambien con el Russia que debolbe con el todo confiscao propiedad o paga 59,617,458 euro ($63,684,978 U.S.) como daño para na maga confiscao propiedad. El Russia necesita paga 3,447,250 euro ($3,682,445 U.S.) con el maga victima como daño.

Incluido na ese decision amo el 20 caso que ya principia desde 2010 hasta 2019 que envuelto el mas de 1,400 victima—maga individual Testigo y legal agencia. Pero, el decision del ECHR ya afecta na mas manada pa gente. Ya habla este que el Russia “debe hace descanza con el todo suspendido criminal caso contra con el maga Testigo de Jehova . . . y larga con el todo maga Testigo de Jehova y dale kanila libertad.” (Diamon el italic.) El decision ya dale justicia con el diaton maga hermano y hermana adentro y apuera del Russia. Ya dale este prueba que maga buen gente sila quien ta obedece con el ley y gendeh justo que persigui y hace preso kanila.

Na aquel decision, el ECHR nuay acepta con el cosa ta clama el Russia que el diaton maga accion, creencia, publicacion y website amo extremista. Considera con el siguiente ejemplo:

• Maga accion: El ECHR ya hace claro que el corte del Russia “nuay dale evidencia que el maga palabra o accion del maga Testigo de Jehova ta dale mira violencia, odio o discriminacion contra con otro.” (§271)

• El creencia que talli na maga Testigo de Jehova el verdad: “Con paz ta convinci con otro que mas alto el diila religion y ta anima con otro que abandona con el ‘maga falso religion’ y man junto con el ‘verdadero’ amo un legal manera para usa con el derecho del libertad del religion y expresion.” (§156)

• Abonada de sangre: “El gendeh aceptada de sangre amo un expresion de libertad para iscuji del un miembro de comunidad para dale mira el de suyu derecho para hace personal decision acerca na curada que ya dale garantia el ECHR y el ley del Russia.” (§165)

• Gendeh ta sirvi na militar: “Nuay viola con el maskin cosa ley de Russia el gendeh aceptada que sirvi na militar por causa na religioso creencia.” (§169)

• Diaton maga publicacion: “El maga religioso actividad y el contenido del diila maga publicacion ta dale mira que harmonia este na diila creencia que ta lleva paz con otro.” (§157)

• JW.ORG: El Corte ya decidi que gendeh extremista el laman del jw.org. Si contra el maga autoridad na cuanto informacion del website, debe sila pidi con el organizacion que quita lang con el maga seccion que para kanila gendeh justo, en vez de prohibi con el entero website. (§231 y §232)

El decision del ECHR ya condena con el autoridad del Russia y ya habla que ta discrimina sila, tiene con quien tan afavor y “gendeh honesto.” (§187) Por ejemplo, este el detalle del cosa ya discubri el Corte:

• “El forzao quitada del todo religioso organizacion del maga Testigo de Jehova na Russia ya hace gendeh por causa na maga legal razon. Sino, el maga evidencia ta dale mira que ya hace este el autoridad del Russia cay ta discrimina sila con el maga religioso practica del maga Testigo de Jehova y quierre sila que abandona el maga Testigo de Jehova con el diila fe y sangga con otro que man junto kanila.” (§254)

• El autoridad del Russia nuay examina enbuenamente con el caso igual cuando el Corte Suprema del Russia ya confia lang na maga iscujido report estaba na maga polis y prosecutor en vez de examina enbuenamente con el caso. (§203)

• El ley acerca na extremista intencional ya usa maga palabra que gendeh claro para dale oportunidad con el maga na autoridad que usa con el diila poder para ataca con el maga Testigo de Jehova. (§272)

No sabe pa kita si cosa el efecto del decision del ECHR na Russia. Pero, gendeh kita ta pone el diaton confianza na autoridad del gente. Sino, “ta esperanza kita con Jehova” como “el quien ta ayuda kanaton y el diaton defensa.”—Salmo 33:20.