Como cosa ya reporta na “News” seccion na jw.org del Mayo 12, 2023, miles del maga gente el ya muri o ya iri por causa na guerra entre del dos grupo na Khartoum, el centro del Sudan. El cuanto del diaton maga hermano y hermana quien ta queda na Khartoum o cerca alli ya decidi que sale na ciudad. Mientras ta escapa, el maga espiritual provision estaba na organizacion de Jehova ya puede ayuda y anima kanila.

Por ejemplo, despues del cuanto dia cuando ya principia el guerra, si Ajuja, un 23 año pioneer hermana de Khartoum, ya atende un virtual meeting donde ta discuti con el articulo del El Torre de Guardia que tiene titulo “Esta Alerto y Bicia.” Ele ya habla: “Mientras ta discuti con este articulo, ya manda este conmigo acorda que el cosa ta sucede ahora escribido ya daan na Biblia. Ese gayot el cosa yo necesita na aquel tiempo.” Cuando mas ya agraba pa el situacion alla, ya decidi si Ajuja que evacua na otro ciudad. Ya omenta pa le: “Durante el viaje, ya anima conmigo el maga original cancion y otro pa maga audio recording. Ya reza yo con Jehova que llega kame alla enbuenamente.” Ya llega si Ajuja alla enbuenamente y yan welcome con ele el maga hermano y hermana alla na Kassala.

Si Eli, un 24 año anciano y pioneer estaba na El Haj Yousif, un lugar que cerca na Khartoum, ya viaja maga 330 kilometro (205 mi) para na ciudad de Kosti. Yan welcome con ele el maga hermano y hermana alla quien ya dale con ele comida y un lugar onde esta. Mientras ta pensa con el de suyu pasada, si Eli ya habla que el maga texto del dia ya puede gayot anima con ele durante el semana que ta evacua le. Por ejemplo, el Salmo 91:2 ya hace acorda con Eli que necesita le hace con Jehova el de suyu refugio y fortaleza. Si Eli ya habla: “Nuay deverasan paz na este trambulicao mundo y gendeh puede dale solucion el politica o el maga lider de militar. El diaton deverasan esperanza amo el Reino del Dios que hay solva con el todo diaton problema.”

Si Tia y el de suyu mujer, si Julia, amo maga pioneer de Omdurman que cerca tambien na Khartoum. Mientras ta agraba el situacion, ya acorda sila con el un reciente articulo na El Torre de Guardia que ta anima con el maga Cristiano que hace dayun con el maga decision que ya decidi sila. Cay ta queda mas grabe el violencia na diila ciudad, ya decidi si Tia y Julia que mas bueno que actua dayun y sale alla. Ciendo enbuenamente sila ya llega na diila nuevo locacion y enbuenamente kanila ya ricibi el maga hermano y hermana alla, ta rindi gayot gracias si Tia y Julia na informacion que ya ricibi sila na El Torre de Guardia. Si Julia ya habla: “Proud gayot kame cay parte kame na este amable organizacion. Deverasan gayot que gendeh corto el mano de Jehova para salva kanamon.”

El todo del maga hermano y hermana que ya menciona na este articulo ya continua con el diila espiritual rutina na diila nuevo locacion. Incluido aqui que activo participa na maga miting, na ministerio y gane, maskin el conducida del maga Bible study. Este todo maga espiritual actividad, incluido el buen asosacion na maga hermano y hermana na diila nuevo congregacion, ya hace kanila fuerte y ya dale kanila alegria.

Ta puede gayot anima kanaton para mira con el diaton maga hermano y hermana na Sudan quien ta continua depende con Jehova y na de suyu Palabra para na comforta y esperanza.—Roma 15:4, 5.