Na ayuda de Jehova, el maga hermana que si Liudmyla Mozul y Kateryna Rozdorska ta continua aguanta maskin ta sinti sila triste y dolorido por causa na guerra. El diila maga marido que si Petro Mozul y Dmytro Rozdorskyi incluido na maga primer Testigo de Jehova quien ya muri por causa na guerra na Ukraine. Maka-triste que 34 maga hermano y hermana ya el quien ya muri por causa na guerra.

Ya bautiza si Petro y Liudmyla del 1994. Casao sila por 43 año.

“El maga hermano y hermana ta dale conmigo comforta cada dia,” ya habla si Liudmyla. “Pirmi sila ta llama conmigo. Ya puede tambien yo llura por causa na un carta que estaba na branch de Ukraine.”

Ya principia el guerra del Febrero 24, 2022. Si Petro, quien ta sirvi como un siervo ministerial na un sign-language congregation, ya muri mientras ele y el de suyu familia ta pricura escapa na grabe rebentada de bomba na Kharkiv del Marzo 1, 2022.

Aquel dia, despues del manada dia de rebentada de bomba, tiene maga fighter jet el ya principia ataca con el ciudad. El familia ya carga con el cuanto importante cosas y ya sale despues lang del 30 minuto. Na un coche si Petro y Liudmyla y na otro coche tambien el diila anak que si Oleksii junto con el de suyu mujer que si Maryna. “Ta viaja kame para na un lugar. Despues, tiene maga fighter jet el ya principia ataca kanamon,” ya habla si Liudmyla. “Yan uyuk gayot el coche por causa na rebentada.”

Si Petro, quien 67 año el edad, ya pricura disvia para gendeh man bangga na coche de Oleksii pero ya sale le bien irido. Ya lleva con Petro y Liudmyla na hospital pero na uliji ya muri si Petro. Ya iri el pierna y barriga de Liudmyla por causa na maga hierro que ya bula que ya causa el bomba. Nuay sale irido kanda Oleksii y Maryna. Ya puede lang sabe si Liudmyla que ya muri ya si Petro cuando ya sale le na hospital despues del tres dia.

Si Liudmyla ya habla: “Si mas ta pensa yo acerca con el pagka-bueno de Jehova y con el de suyu bonito proposito, mas ta tene yo paz na pensamiento. Asigurao yo que na nuevo mundo, hay puede gayot yo mira otravez con el de mio marido y ta espera gayot yo que llega ese tiempo.”

Si Dmytro y Kateryna casao por ocho año. Cuando na trabajo si Dmytro, ya llama le con Kateryna y el de suyu ultimo maga palabra amo, “Cerca ya yo bolbe.”

Cuanto hora despues, del Marzo 8, 2022, el uban na trabajo de Dmytro ya llama con Kateryna y ya habla que ya puede pisa bomba si Dmytro y ya lleva con ele na hospital. Cinco hora despues con ele opera, ya muri le.

Cuando ya sabe le que ya muri si Dmytro, si Kateryna ya habla: “Aquel noche, nuay lang si Jehova agarra con el de mio mano sino ya carga le conmigo. Ya sinti yo que bien cerca conmigo si Jehova.”

Si Dmytro, quien 28 el edad, ya bautiza del 2006 y ya sirvi como un anciano na Donetsk Region na Ukraine.

Corto tiempo despues del intierro de Dmytro, si Kateryna ya viaja por 12 hora para anda na un lugar na Ukraine que lejos na peligro. “Ya puede gayot anima conmigo el maga hermano y hermana na Ukraine y na otro maga nacion. Ya manda sila conmigo sinti que ta ama gayot sila conmigo y ya puede este ayuda para menora el de mio dolor.”

Ele ya omenta: “Ya puede tambien conmigo dale comforta el ministerio. . . . Si ta sinti yo grabe dolor, tan recite yo maga texto na Biblia igual con el Filipo 4:6, 7.”

Asigurao kita que si Jehova hay continua dale fuerza y comforta con el diaton maga hermano y hermana que el maga familia y amigo ya muri por causa na guerra na Ukraine.—Salmo 61:1-3.