Del Febrero 24, 2022, ya dispierta yo por causa na bien suena sonor. Del primero, pensaba yo trueno quel cay tan ulan aquel tiempo pero maga bomba gale quel.

Ya realiza yo que necesita yo sale na de mio casa que na centro del Mariupol. Pagka-sunod dia, ya anda yo na casa del de mio lola, si Iryna, que na punta del ciudad. Na uliji, el de mio nana, si Kateryna, yan junto kanamon del de mio lola y de mio primo. Safe kame na casa de lola por cuanto tiempo pero necesita kame durmi na basement por manada dia.

Mientras ta esconde kame na basement, ya cae missile na lugar onde kame ta siembra gulay. Bien suena gayot el rebentada. Ya reza gayot yo con Jehova. Despues del un semana, sabe kame que gendeh mas safe que esta na casa de Lola. Poreso, ya decidi kame que bira otravez na centro del ciudad para busca manera para evacua. Ya reza gayot yo con Jehova que salva kanamon y ayuda kanamon para puede sale alla.

Del aga del Marzo 4, nuay maga train estaba na Mariupol cay el maga soldao yan palibut con el ciudad. Poreso, ya esta kame na teatro del ciudad junto con el manada maga gente por diez dia. Bien manada gayot quel gente poreso na piso lang kame ta durmi. Bien mabuling el lugar y bien tormento para saca comida y agua caliente. Necesita kame man pila por cuanto hora.

Un dia, ya rebenta el un missile que cerca na teatro. Bien fuerte gayot quel poreso ya quebra el manada bentana y ya entra el frio aire adentro na teatro.

Cosa ya puede ayuda conmigo durante na este dificil tiempo? El istoria acerca con Job. Si ta mira yo con el maga gente que ta man panic por causa na rebentada, ta le yo con el istoria de Job na Biblia. Ta dale este conmigo alivio. Dol ta sinta yo na aquel teatro junto con Job y ta habla con ele: “Ahora, ta entende ya gayot yo contigo!” Ya perde el todo cosa con Job: de suyu familia, de suyu buen salud y de suyu maga propiedad. Ya perde lang conmigo el de mio material cosas. Pero junto conmigo el de mio familia, y todo kame vivo y tiene buen salud. Na aquel tiempo, ya realiza yo que gendeh gayot grabe el de mio situacion. Despues, mas enbuenamente yo ya sinti.

Del Marzo 14, ya sabe kame que ya puede sale na ciudad el un grupo. Poreso, ya decidi tambien kame sale. Ya puede kame incuntra vehiculo y junto kanamon el otro que estaba tambien na teatro.

Un grupo de 20 vehiculo el ya sale na ciudad. Catorse kame yan suksuk atras del van. Ta cae maga bomba alrededor kanamon mientras ta viaja kame. Pirmi gayot yo ta reza. Cuando ya puede kame sale na Mariupol, ya hace para el driver con el vehiculo, ya sale y ya principia llura. Ya puede le evita con el todo maga bomba na camino. Ya sabe kame que dos dia despues kame ya sale alla, ya hace cae bomba na teatro y ya muri el maga gente que gendeh abaja na 300.

Despues del 13 hora, ya llega kame na Zaporizhia. Pagka-alamañana, ya munta kame un train para na Lviv. Tiene 16 gente na un train car que de cuatro gente lang. Bien caliente gayot quel alla. Durante na viaje, mas mucho ta para lang yo na urilla del train. Alla lang el lugar onde puede yo resulla fresco aire. Del Marzo 16, ya llega kame na Lviv, donde yan welcome gayot kanamon el maga hermano y hermana. Ya esta kame na Kingdom Hall por cuatro dia. Ya puede gayot yo llura por causa na amor que ya demonstra el maga hermano y hermana. Regalo gayot quel estaba con Jehova.

Del Marzo 19, ya decidi kame que sale na Ukraine y anda na Poland, donde yan welcome kanamon del de mio lola, nana y primo el maga hermano y hermana. Ya dale sila kanamon el todo cosa kame necesita. Ya sinti gayot kame con el diila amor.

El de mio edad 19 año pa lang pero despues experiencia con este todo maga probanza, ya aprende yo si paquemodo de importante que hace fuerte con el fe mientras enbuenamente el situacion. El fe puede ayuda contigo para salva. Si nuay yo hace personal estudiada antes el guerra, mas man dificil gayot yo.

Si Jehova un amable Tata. Durante aquel experiencia, ya sinti yo que dol ta aguanta le con el de mio derecha mano y ta guia conmigo. Ta rindi gayot yo gracias con el todo cosas que ya hace si Jehova para conmigo.—Isaias 41:10.