Cerca 47,000 del maga Testigo de Jehova el ya evacua por causa na guerra que ta continua sucede na Ukraine. Manada ya cambia na otro maga lugar na mismo nacion que lejos na peligro, donde el diila maga hermano y hermana ya ofrece kanila maga ropa, comida, lugar onde esta y otro pa maga necesidad. Maskin pa este maga hospitable hermano y hermana tan lisud tambien na financial, preparao sila ayuda con el maga hermano quien ta necesita.

Si Olha de Uman, Ukraine, y el de suyu marido que gendeh Testigo ya puede manda esta na diila casa maga 300 publisher durante el primer dos meses del guerra. Manada de este maga hermano y hermana que ya evacua ya esta lang por un noche antes continua na diila viaje. Mas mucho, hora del media noche amo pa ta sabe si Olha que tiene maga gente hay llega na de suyu casa. Na un ocasion, ya manda queda si Olha na de suyu casa con el 22 hermano y hermana na mismo tiempo. Este experiencia ya dale tambien oportunidad con el 18 año anak hombre de Olha que si Stanislav, para aprende queda bondadoso. Mas manada, ta durmi le na sahig para el maga hermano quien ya evacua puede durmi na de suyu cuarto.

“Alegre gayot yo cay maskin durante na este maga dificil tiempo, ta puede yo ayuda con el maga siervo de Jehova,” ya habla si Olha. “Ta hace gayot este conmigo bien alegre.”

Si Andriy y el de suyu mujer que si Liudmyla, ya puede manda queda na diila casa con el maga Testigo de Jehova que ya llega 200 persona adentro del cinco semana. Un tiempo, ya manda sila queda na diila casa con el 18 persona na mismo noche. “Por causa cay ya sigui kame con el direccion del branch office, tiene kame cuanto supply de comida. Ya usa quel kame con el maga hermano quien ya evacua por un semana y media,” si Andriy ya habla. “El maga hermano ta deja maga card que tiene sen y ta usa quel kame para cumpra maga comida para na siguiente maga visita. Ta dale tambien supply de comida el Disaster Relief Committee poreso nuay gayot kame falta maskin cosa.”

Del Marzo, si Vita de Ivano-Frankivsk ya sale na de suyu apartment y ya queda junto con el de suyu hermana para puede esta na de suyu apartment el maga Testigo de Jehova quien ya evacua. “Gendeh yo quel ta mira como un sacrificio sino como un expresion de amor,” si Vita ya habla. “Ta dale gayot conmigo alegria el cosa yo ta hace para na maga hermano quien ya evacua. Un familia kita todo.”

Si Natalia ta queda junto con el de suyu marido y anak que si Habriela, na Ternopil. Todo sila ya perde el trabajo cuando ya principia el guerra y ta usa sila con el diila sen que ya recuji sila para cumpra con el diila maga necesidad. Maskin pa ansina, preparao siempre sila manda queda na diila casa con el un hermana y de suyu disable anak mujer.

“Ta acorda yo con el experiencia del un hermana na Africa. Maskin pa bien pobre gayot le, ya manda siempre le queda na de suyu casa con el 14 hermano y hermana durante el convencion y nuay ni uno kanila el tiene cosa ya falta,” ya relata si Natalia. Ya explica le que este experiencia ya ayuda con ele para hace una el interes del otro.

Maskin pa ta enfrenta maga dificultad, el diaton maga hermano y hermana na Ukraine ta pone el diila confianza con Jehova mientras ta demonstra pagka-hospitable.—Roma 12:13.