El maga Testigo de Jehova na Ukraine nuay descanza suporta con el diila maga hermano y hermana na fe. Ta continua sila dale mira amor con uno y otro.

Si Hermana Olena 81 año el edad. Del Junio 6, un missile ya cae que bien cerca na de suyu casa. Ya destroza este con el casa del de suyu vecinos y ya causa este agujero que siete metro(23 ft) de hondo. Por causa na fuerte rebentada del bomba, ya destroza tambien el casa de Hermana Olena.

Ele ya habla: “Cuando ta durmi yo, el dindin ya tumba cerca na de mio cabeza. Ya llena de polvos el alrededor. Yan calayat el maga vridio y piedra. Ya rindi yo gracias con Jehova cay vivo pa yo.” Despues del rebentada, ya anda dayun el maga hermano y hermana con Hermana Olena incluido el un hermano quien destrozao tambien el casa. Si Hermana Olena ya omenta: “Cuando ya llega el maga hermano, espantao gayot sila y no sabe sila si cosa habla. Ya puede gayot anima conmigo el diila presencia. Alegre gayot yo cay talli sila cerca conmigo.”

Si Serhii, un anciano quien regular ta visita con Hermana Olena junto con el maga jovenes na congregacion ya habla: “Cuando ya sabe yo que ya rebenta bomba cerca na casa de Hermana Olena, ya tiene gayot yo miedo y malingasa. Pero, ya sinti yo alivio cuando ya mira yo que nuay le grabe irida y tiene lang le cuanto gasgas. Maka bilib gayot que el primer cosa que quierre obtene si Hermana Olena despues queda destrozao el de suyu casa amo el publicacion que base na Biblia que ya ricibi le cuanto dia antes quel suceso.”

Maka-alegre cay el de suyu familia ya puede incuntra un casa onde le puede esta. El congregacion ta continua dale practical ayuda y el maga anciano todo el dia tan contact con Hermana Olena. El maga hermano y hermana ya dale con ele hearing aid para puede le beneficia na maga miting na congregacion. Ele ya habla: “Tiene vez tan luya yo pero el maga miting ta dale conmigo fuerza. El maga hermano y hermana pirmi conmigo ta llama y ta rindi gayot yo gracias con ese.”

El un maridable ya acorda con el diila experiencia cuando ya esta sila na basement del un Kingdom Hall junto con el 200 publisher. El mujer ya escribi: “Ya gusta gayot yo con el cuidada que ya dale el maga amable anciano. Ya acorda yo con David quien ya pone na peligro el de suyu vida para salva con el maga carnero desde na leon y oso. El maga anciano na basement ta pone na peligro el diila vida para lang puede saca comida, agua y gasolina para tiene kame luz. Por causa con ese, ta puede kame conduci maga miting de congregacion y miting para na ministerio. Maskin manada bomba ta rebenta, este maga anciano regular ta visita con el maga hermano y hermana quien ta esta na diila maga casa, ta lleva kanila comida y agua, y ta dale kanila comforta. Ya tiene gayot yo hondo respeto con este maga anciano. Antes este suceso, conoce lang yo kanila como maga maestro y predicador pero ahora ta mira yo kanila como maga pastor con quien puede confia. Ta rindi gayot yo gracias con el diila ejemplo de coraje, amor y confianza!”

El maga publisher na uno del maga congregacion na Ukraine, ya escribi na Ukraine branch acerca con aquellos quien ta guia na relief effort: “Ta rindi gayot kame gracias kanila. Ya puede gayot kame mira si paquemodo si Jehova ya ayuda kanamon por medio na diamon maga hermano y hermana na fe. Ya experiencia kame con el maga palabra de Jesus: ‘Ansina ay sabe todo el maga gente cay ustedes dimio maga dicipulo: Si tiene ustedes amor con uno y otro.’”—Juan 13:35.

Del Junio 21, 2022, este el siguiente numero que base na report estaba na Ukraine. Asegun este na maga confirmao report del diaton maga hermano alla. Pero, posible que mas alto pa con ese el actual numero, ciendo dificil el comunicacion na todo parte del nacion.

• 42 publisher el ya muri

• 83 publisher el ya sale irido

• 31,185 publisher el quien ya evacua

• 495 casa el ya sale destrozao

• 557 casa el ya tiene major damage

• 1,429 casa el ya tiene minor damage

• 5 Kingdom Hall el ya sale destrozao

• 8 Kingdom Hall el ya tiene major damage

• 34 Kingdom Hall el ya tiene minor damage

• 27 Disaster Relief Committee (DRC) el ya forma na Ukraine para mira con el relief work

• 52,348 persona el con quien directa ya asisti el maga DRC para busca lugar onde sila queda que lejos na peligro

• 23,433 publisher el ya evacua para na otro maga nacion y ya asisti kanila el maga hermano y hermana na aquel maga lugar