Na diferente lugar na Ukraine, alegre el maga hermano y hermana cay ya puede ya sila predica otravez na maga de publico lugar y tiene este maga buen resulta. El maga circuit overseer y maga anciano ya habla que alegre el maga gente puede mira otravez con el diaton maga cart y ganeh, yan miss sila con el presencia del maga Testigo de Jehova na diila lugar.

Si Tatiana que de Serhiivka Congregation na Odesa, ya decidi que visita con aquellos con quien le ya predica antes el pandemic. Ya habla le, “Desde el principio, ya puede yo mira que ta bendici si Jehova con el diaton esfuerzo que bira otravez na diaton ministerio.” Na un ocasion, ya visita le con el un mujer quien no quierre man Bible study antes el pandemic. Pero ahora, bien quierre ese mujer que discuti acerca na maga espiritual cosas y ya conforma que man Bible study. Si Tatiana ya habla, “Necesita yo visita con el todo maga return visit de mio de antes y ofrece Bible study con el cada uno kanila!”

Si Yevheniy y Lilia amo maga publisher quien ya evacua estaba na Mariupol. Ahora, ta queda sila na un lugar na Ukraine que lejos na peligro. Igual sila dos activo na trabajo predicacion. Ya explica sila que el ministerio ya ayuda kanila para gendeh sila man focus na diila maga problema. Ya habla sila: “Sabe kame que el diamon vida gendeh mas bira igual como de antes. Bien dificil man adjust na un nuevo lugar pero asigurao kame que si Jehova pirmi ta ayuda con el de suyu maga siervo. Ta guia le kanamon por medio na de suyu sagrao espiritu, y el maga hermano y hermana preparao ayuda kanamon man adjust na un nuevo lugar.”

Na otro maga parte del nacion, el diaton maga hermano ta dale buen testigo por medio na diila maga buen trabajo. Por ejemplo, el un grupo de maga hermano na ciudad de Mykolaiv yan voluntario na un international humanitarian relief organization para compone y arregla con el un warehouse que ta usa para na dalida de maga ayuda. El maga hermano ya compone con el water system, y ya arregla con el maga estante y con el cuanto tonelada de comida. Cuando ya cheqiua el un representante del humanitarian organization con el trabajo, ya puede le llura. Ya habla le, “Nuay yo expecta que ansina de bonito el resulta del trabajo.”

Maskin pa talli na dificil situacion el diaton maga hermano y hermana na Ukraine, alegre sila cay ya esta sila activo na ministerio y ta continua sila “hace el maga cosa-cosa bueno.”—Galacia 6:9, El Nuevo Testamento na Chavacano.

Del Julio 13, 2022, este el siguiente numero que base na report estaba na Ukraine. Asegun este na maga confirmao report del diaton maga hermano alla. Pero, posible que mas alto pa con ese el actual numero, ciendo dificil el comunicacion na todo parte del nacion.

• 42 publisher el ya muri

• 97 publisher el ya sale irido

• 28,683 publisher el quien ya evacua

• 524 casa el ya sale destrozao

• 588 casa el ya tiene major damage

• 1,554 casa el ya tiene minor damage

• 5 Kingdom Hall el ya sale destrozao

• 10 Kingdom Hall el ya tiene major damage

• 36 Kingdom Hall el ya tiene minor damage

• 27 Disaster Relief Committee (DRC) el ya forma na Ukraine para mira con el relief work

• 52,947 persona el con quien directa ya asisti el maga DRC para busca lugar onde sila queda que lejos na peligro

• 23,863 publisher el ya evacua para na otro maga nacion y ya asisti kanila el maga hermano y hermana na aquel maga lugar