Del Julio 23 hasta 31, manada publisher na Ukraine y na otro maga nacion onde sila ya evacua el ya bautiza na 2022 “Precura Tene Paz”! Asemblea de Region. Del Agosto 2, tiene ya 1,113 persona de Ukraine el ya bautiza. El un hermano de Ukraine ya habla: “Maskin el guerra gendeh puede sangga con el hacida de dicipulo, como cosa ya promete si Jesus: ‘Ay esta yo junto con ustedes todo el dia.’”—Mateo 28:20, El Nuevo Testamento na Chavacano.

Alegre kame man report con ustedes el siguiente maga experiencia.

Si Natalia que 63 año amo de Kreminna, Luhansk Region. Ele y el de suyu dos anak mujer ya principia estudia junto na maga Testigo de Jehova del maga 1990. Ya progresa na espiritual el de suyu maga anak y ya bautiza pero ele nuay. Cuando ya principia el guerra, el un familia de maga Testigo de Jehova ya lleva con Natalia junto kanila cuando ya evacua sila na un lugar que lejos na peligro. Ya manda con ele esta na un Kingdom Hall na Ivano-Frankivsk.

Si Natalia ya habla: “Despues del maga rebentada de bomba, dol ya ulvida ya yo si paquemodo man smile. El maga hermano y hermana ya dale mira conmigo deverasan amor. Nuay yo expecta que hay dale sila el de mio necesidad. Na aquel tiempo, ya bira el de mio amor para con Jehova. Manada beses yo ya le con el Biblia y el un hermana ya ofrece conmigo un Bible study na libro Queda Alegre Hasta Para Cuando! Regalo gayot le de Jehova para conmigo.” Si Natalia ya omenta: “Ahora, bien alegre yo bautiza como uno del maga Testigo de Jehova. Quierre yo obedece con el de con todo importante mandamiento: ‘Ama con Jehova el de mio Dios con todo el de mio corazon, con todo el de mio alma y con todo el de mio pensamiento.’”—Mateo 22:37.

Si Olia de Cherkasy amo un unbaptized publisher cuando ya principia el guerra. Del Marzo 6, ya evacua le para na Poland junto con el de suyu anak mujer y apu. Ele ya habla: “Ya llega kame alla cargando lang el diamon go bag pero el diamon maga espiritual hermano y hermana ya cuida kanamon tres. Todo este ya puede convinci conmigo que unido el organizacion de Jehova y ta guia con este el de suyu espiritu. Despues yo experiencia con este todo, mas ya queda yo determinao que dedica con el de mio vida con Jehova. Ya ayuda le conmigo na bien dificil tiempo y ahora quierre yo sirvi con ele y dale mira el de mio apresacion.”

Si Yulia que 18 año el edad amo de Donetsk Region. Ya engranda le na un Testigo familia pero nuay le progresa para na bautismo. Ya relata le un experiencia que ya sucede nuay dura antes principia el guerra. Ele ya habla: “Acustao yo na piso y ya realiza yo que puede yo muri maskin cosa hora. Destrozao el todo lugar onde kame ta queda pero ya salva kame. Por causa na este experiencia, rezo y meditacion na maga bonito calidad de Jehova, mas ya queda yo cerca con ele y nuay mas yo man duda si debe ba yo dedica con el de mio vida con Jehova. Cuando ya contesta si Jehova con el de mio maga rezo, ya dale le mira si paquemodo le de cerca conmigo. Del antes, tiene lang yo saber acerca con Dios pero ahora, ta ama ya yo con ele.” Ya bautiza si Yulia del Julio 23.

Cuando ya principia el guerra, el 11-año bata que si David, ya evacua junto con el de suyu familia para na Germany. Unbaptized publisher ya le desde nueve año le. Ahora, ta pricura le alcanza con el de suyu maga espiritual goal. Ele ya habla: “Ya decidi yo bautiza por causa na de mio amor para con Jehova y quierre yo queda de suyu amigo. Durante el de mio bautismo, ya llura yo na alegria cay parte ya yo del bonito familia de Jehova. Quierre-quierre yo habla con el maga gente acerca con Jehova y con el de suyu proposito para na maga gente. Poreso el de mio sunod goal, amo queda un pioneer. Quierre tambien yo sirvi con el de mio maga hermano y hermana na congregacion y llega el tiempo, quierre yo queda un siervo ministerial. El de mio goal gayot amo sirvi na Bethel. Amo se de mio ambicion desde ya visita yo na branch office na Lviv del 2018.”

Si Olena de Kyiv ya queda un unbaptize publisher del 2011. Inactive le por diez año. Del 2020, yan cuento con ele el maga anciano y ya dale con ele el brosyur Return to Jehovah. Ele ya habla: “Yan Bible study yo otravez y ya atende na maga miting. Pero despues del cuanto tiempo, ya descanza yo otravez. Durante el guerra, ya contesta si Jehova con el de mio maga rezo y ya realiza yo que si Jehova ta protege conmigo, ta dale mira el de suyu amor y ta dale conmigo paz na pensamiento. Ya evacua yo para na Romania y ya puede yo conoce maga Testigo alla. El amor y atencion que ya ricibi yo na maga hermano y hermana, dol igual na un manta que ya tapa conmigo si Jehova.” Ya bautiza si Olena del Julio 23. Ele ya habla: “Ta rindi yo gracias con Jehova cay yan paciencia le conmigo. Ahora sabe yo que ‘tiene yo fuerza para enfrenta todo cosas por causa con ele quien ta dale conmigo poder.’”—Filipo 4:13.

Del Agosto 2, 2022, este el siguiente numero que base na report estaba na Ukraine. Asegun este na maga confirmao report del diaton maga hermano alla. Pero, posible que mas alto pa con ese el actual numero, ciendo dificil el comunicacion na todo parte del nacion.

• 43 publisher el ya muri

• 97 publisher el ya sale irido

• 22,568 publisher el quien ya evacua

• 586 casa el ya sale destrozao

• 613 casa el ya tiene major damage

• 1,632 casa el ya tiene minor damage

• 5 Kingdom Hall el ya sale destrozao

• 10 Kingdom Hall el ya tiene major damage

• 37 Kingdom Hall el ya tiene minor damage

• 27 Disaster Relief Committee (DRC) el ya forma na Ukraine para mira con el relief work

• 53,836 persona el con quien directa ya asisti el maga DRC para busca lugar onde sila queda que lejos na peligro

• 24,867 publisher el ya evacua para na otro maga nacion y ya asisti kanila el maga hermano y hermana na aquel maga lugar