Manada maga infrastractura na diferente parte del Ukraine el ya sale destrozao o ya tene grande damage por causa na maga bomba. Maskin pa ansina, el diaton maga hermano nuay descanza atende na maga miting na congregacion y participa na otro maga teocratico actividad maskin pirmi nuay corriente.

Asegun con kanda Anastasia y Debora, quien ta sirvi como maga pioneer na Kyiv, ta queda nuay corriente na diila lugar por maga 12 hora na un dia. Si tiene corriente, tan charge sila con el diila maga gadget y ta usa sila con el diila data na cellphone para atende na maga miting. Mas mucho, ta perde el coneccion del Internet apenas acaba el miting.

El otro problema que ta experiencia el maga hermano si nuay corriente amo el frieldad por causa cay nuay heater. El cuanto maga hermano ta usa generator para tiene sila corriente y puede usa con el diila heater. El otro ta anda na casa del diila maga pariente quien tiene heater. Tiene del maga hermano ta aguanta ya lang con el frieldad. Pero bueno ya lang, manada na diaton maga hermano el tiene heater de gas na diila casa o apartment poreso tiene siempre sila heater maskin blackout.

Si Iryna, un pioneer na Ivano-Frankivsk, ta esta siempre positivo. Ya habla le, “Ya decidi yo que nomas ya lang pensa con el cosas que nuay yo control. . . . Poreso, ta hace lang yo el cosa yo puede hace especialmente si blackout. Ta asigura tambien yo que ya puede ya yo man download adelantao con el maga publicacion que necesita yo.”

Maskin pa ta enfrenta manada maga dificultad el diaton maga hermano y hermana na Ukraine, ta esta siempre sila ocupao na servicio con Jehova. Ta confia kita que hay continua le bendici con el diila esfuerzo mientras ta continua sila “hace el maga cosa-cosa bueno.”—Galacia 6:9, El Nuevo Testamento na Chavacano.

Del Deciembre 6, 2022, este el siguiente numero que base na report estaba na Ukraine. Asegun este na maga confirmao report del diaton maga hermano alla. Pero, posible que mas alto pa con ese el actual numero, ciendo dificil el comunicacion na todo parte del nacion.

• 47 publisher el ya muri

• 97 publisher el ya sale irido

• 11,537 publisher el quien ya evacua

• 590 casa el ya sale destrozao

• 645 casa el ya tiene major damage

• 1,722 casa el ya tiene minor damage

• 7 Kingdom Hall el ya sale destrozao

• 19 Kingdom Hall el ya tiene major damage

• 68 Kingdom Hall el ya tiene minor damage

• 27 Disaster Relief Committee (DRC) el ya forma na Ukraine para mira con el relief work

• 54,212 persona el con quien directa ya asisti el maga DRC para busca lugar onde sila queda que lejos na peligro

• 26,811 publisher el ya evacua para na otro maga nacion y ya asisti kanila el maga hermano y hermana na aquel maga lugar