Maga 3,000 casa del maga Testigo de Jehova el yan damage o ya queda destrozao desde ya principia el guerra na Ukraine del Febrero 2022. Del Agosto, bajo na guia del Disaster Relief Department (DRD) y del Local Design/Construction Department, el maga hermano na Ukraine ya principia compone con ese maga casa na maga lugar donde safe con ese hace. Ya pone sila maga nuevo techo y bentana, y ya hace otro pa componida. Na cuanto maga situacion, si bien destrozao el casa, ta compone sila con el garaje y ta hace con ese un diutay casa. Ahora, ya puede ya completa con el 37 maga proyecto de construida y 48 pa el ta continua hace.

Dificil compone con este maga casa cay ta continua pa el guerra. Pero, ya ayuda siempre el maga hermano na este maga construida. Si Hermana Svitlana que 70 el edad de Velyka Dymerka, Kyiv Region, ya habla: “Nuay yo bastante sen para compone con el techo y el frentero del de mio casa. Ya dale gayot conmigo si Jehova un grande regalo. Ya anda el maga hermano y ya completa con el trabajo adentro lang de tres dia.”

Si Hermana Nadiia de Horenka, Kyiv Region, ya explica que este trabajo de componida ya puede ayuda kanila na ministerio. Ele ya habla: “Ya puede gayot dale buen testigo con todo este trabajo. Maskin el maga gente que no conoce yo, ya dale comento acerca na deverasan amor que tiene el maga Testigo de Jehova. Para kanila, gendeh gayot maka-creé que ya ayuda conmigo el de mio maga hermano y hermana.”

Ta ayuda tambien maskin aquellos quien ya queda destrozao el casa, igual con Yevhen y Tetiana. Ya tupa missile con el diila casa. En vez de man focus na cosa ya perde kanila, ta hace sila esfuerzo para ayuda con el diila maga hermano y hermana. “Quierre gayot kame ayuda con otro,” ya habla si Yevhen. “Cay ta ayuda kame kanila, ya puede se ayuda para gendeh kame man focus na diamon mismo maga problema.”

Ansina tambien el cosa ya sucede con el un hermana que si Lidiia de Hostomel, Kyiv Region. Despues compone el maga hermano con el de suyu casa, ya motiva se con ele para ayuda tambien con otro. “Por dos semana, ya llega 16 hermano y hermana el ya compone con el de mio casa,” ya habla le. “Ya sinti yo que dol na nuevo mundo ya yo. Ahora, quierre tambien yo ayuda con otro.”

El un miembro del Branch Committee de Ukraine nuevo lang ya visita na maga lugar donde ta hace con este maga componida. Ya anima le con aquellos quien ya queda destrozao el casa. Ele ya habla: “El maga hermano na Ukraine pirmi gayot ya puede dale mira grande amor para con uno y otro. Pero por causa na este guerra, mas ya queda kita close con uno y otro. Bien maka-alegre mira si paquemodo el ayuda que ya dale con el diaton maga hermano ya motiva kanila para hace mas na ministerio y ya “causa tamen mucho dalida de gracias con el Dios,” como cosa ya habla na 2 Corinto 9:12.”—El Nuevo Testamento na Chavacano.

Del Deciembre 20, 2022, este el siguiente numero que base na report estaba na Ukraine. Asegun este na maga confirmao report del diaton maga hermano alla. Pero, posible que mas alto pa con ese el actual numero, ciendo dificil el comunicacion na todo parte del nacion.

• 47 publisher el ya muri

• 97 publisher el ya sale irido

• 11,477 publisher el quien ya evacua

• 590 casa el ya sale destrozao

• 645 casa el ya tiene major damage

• 1,722 casa el ya tiene minor damage

• 7 Kingdom Hall el ya sale destrozao

• 19 Kingdom Hall el ya tiene major damage

• 68 Kingdom Hall el ya tiene minor damage

• 26 Disaster Relief Committee (DRC) el ya forma na Ukraine para mira con el relief work

• 54,212 persona el con quien directa ya asisti el maga DRC para busca lugar onde sila queda que lejos na peligro

• 26,892 publisher el ya evacua para na otro maga nacion y ya asisti kanila el maga hermano y hermana na aquel maga lugar