Desde Deciembre 26, 2022, el maga regular y especial pioneer na Ukraine ya puede atende na Pioneer Service School na maga lugar donde safe con ese hace. Depende na circumstancia, el maga pioneer ya atende na personal o por medio na Zoom. Maskin pa ta continua el guerra, tan blackout, dificil el economia y ta perde-perde el Internet, ya hace prioridad el diaton maga hermano y hermana que atende con este escuela. Ya resulta este na manada espiritual bendicion.

Si Natalia de Kryvyi Rih ya habla: “El escuela igual na un salvavida para conmigo. Ya ayuda este conmigo para gendeh man lumus na maga lingasa y miedo.” Semejante con ese el cosa ya habla si Anastasia de Chernivtsi: “El escuela ya convinci conmigo que ta ama gayot conmigo si Jehova. Manada maga terrible suceso del ya pasa año pero el escuela amo gayot el cosa yo necesita. Determinao yo que continua aguanta para ricibi con el maga bendicion de Jehova.”

Si Svitlana, un pioneer de Kitsman, yan alang-alang del una si atende ba le na escuela cuando ya ricibi le el invitacion. Ele ya explica: “Ya habla yo con Jehova acerca na de mio maga lingasa, incluido el problema na financial. Ya confia yo con ele y nuay gayot yo arripinti. Ya sinti gayot yo el amor y cuidada de Jehova.” Por causa na esfuerzo de Svitlana, el de suyu marido, quien gendeh Testigo de Jehova, ya principia man junto con ele na maga miting na congregacion.

Na dos ocasion, el maga estudiante na Zhytomyr necesita esta na underground shelter por causa na maga bomba que ta hace cae. Usando el stove de palo para calenta con el cuarto, ya puede sila continua man clase. Maskin pa na dificultad que ya experiencia, si Valentyna, quien ya cambia para na Zhytomyr, ya habla: “Nunca gayot yo ulvida con este escuela. Ya sinti yo que dol talli yo abajo na poderoso alas de Jehova.”

Igual na manada nacion, el maga pioneer na Ukraine bien alegre cuando ya sabe sila que ya menora el hora que necesita alcanza el maga pioneer. Despues oi con el anuncio, si Yulia ya habla: “Mas ya queda hondo el de mio amor para con Jehova. Este lang aga ya reza yo con Jehova y ya pidi con ele que ayuda conmigo esta na este servicio. No sabe yo si paquemodo le contesta pero sabe yo que hay hace le se. Despues sabe que ya menora el hora que necesita alcanza, mas ya aprecia yo ahora con el todo cosa ya hace si Jehova para conmigo. Este noticia amo igual na un sabroso dessert na fin del diamon clase.”

Del Enero 24, 2023, este el siguiente numero que base na report estaba na Ukraine. Asegun este na maga confirmao report del diaton maga hermano alla. Pero, posible que mas alto pa con ese el actual numero, ciendo dificil el comunicacion na todo parte del nacion.

• 47 publisher el ya muri

• 97 publisher el ya sale irido

• 8,953 publisher el quien ya evacua

• 590 casa el ya sale destrozao

• 645 casa el ya tiene major damage

• 1,722 casa el ya tiene minor damage

• 8 Kingdom Hall el ya sale destrozao

• 17 Kingdom Hall el ya tiene major damage

• 76 Kingdom Hall el ya tiene minor damage

• 26 Disaster Relief Committee (DRC) el ya forma na Ukraine para mira con el relief work

• 46 casa el ya compone

• 5 Kingdom Hall el ya compone

• 54,445 persona el con quien directa ya asisti el maga DRC para busca lugar onde sila queda lejos na peligro

• 27,655 publisher el ya evacua para na otro maga nacion y ya asisti kanila el maga hermano y hermana na aquel maga lugar