Na maga lugar que donde grabe el ataque, igual na Mariupol, ya queda nuay corriente y ya corta el liña de comunicacion del telefono y Internet. Ya sale destrozao el maga ventana del manada casa y tiene escasez de comida y agua. Mas de 2,500 maga hermano y hermana el quien nuay pa siempre puede sale na Mariupol. Na cuanto ciudad, igual na Bucha, Chernihiv, Hostomel, Irpin, Kyiv, y Sumy, ya puede sale el cuanto maga gente. Como resulta, manada hermano y hermana diaton el quien ya puede evacua para na maga lugar que lejos na peligro.

El un 36 año anciano que un pioneer, quien ta queda na Hostomel, ya evacua junto con el de suyu mujer y maga mayores. Ya relata le el cosa le ya experiencia cuando ya principia el guerra na ciudad:

“Tiene maga helicopter ta pasa y pirmi tiene maga vehiculo de soldao na camino. Cabar, tiene maga soldao ya entra na diamon casa mientras talla kame na basement. El uno kanila ya tira cuanto tiro para na basement. Pero, nuay kame sale irrido cay el maga bala ya tupa na go bag del de mio nana. Adentro de tres para cuatro hora, ya evita kame move y ya esta silencio mientras apuera tiene manada rebentada de bomba y maga tiroteo. . . . Pagka-ala mañana cuando pasalida ya kame usando el diamon vehiculo, ya principia el tirrajan cerca kanamon. Tiene maga tanque na camino . . . Bien peligroso aquel tiempo pero mas preligroso si gendeh kame sale alla.

“Ya tiene gayot grande cambio na diamon vida por causa con este maga suceso. Ya aprende kame si paquemodo aplica con el maga principio na Biblia. Por ejemplo, ya aprende kame si paquemodo evita man lingasa si cosa hay pasa ala mañana, queda contento na cosa lang kame necesita y confia con Jehova na maga bien peligroso situacion.”

Sabe kita que el diaton Dios, si Jehova, ta mira con el maga dificultad que ta enfernta el diaton maga hermano y hermana na Ukraine. Asigurao que ayuda gayot le kanila.​—2 Pedro 2:9.

Desde Marzo 10, 2022, este el siguiente report como resulta del situacion na Ukraine:

• 2 publisher el ya muri

• 8 publisher el ya sale irrido

• 25,407 publisher el quien ya evacua y ya anda na otro maga lugar na Ukraine que lejos na peligro

• 25 casa el ya sale destrozao

• 59 casa el ya tiene major damage

• 222 casa el ya tiene minor damage

• 7 Kingdom Hall el yan damage

• 27 Disaster Relief Committee (DRC) el ya forma na Ukraine para mira con el relief work

• 10,566 publisher el con quien directa ya asisti el maga DRC para busca lugar onde sila queda que lejos na peligro

• 9,635 publisher el ya evacua para na otro maga nacion y ya asisti kanila el maga hermano y hermana na aquel maga lugar