Makatriste que dos del diaton maga hermana el quien ya muri cuando ya larga bomba na ciudad del Mariupol. Hasta ahora, tiene siempre maga 2,000 maga hermano y hermana quien nuay puede evacua na ciudad por causa na guerra. Del ya pasa cuanto maga dia, tiene maga 150 maga Testigo de Jehova quien ya puede escapa na ciudad. El maga hermano quien tan volunteer na Disaster Relief Committee (DRC) ya pricura lleva ayuda na Mariupol pero nuay sila porsigui cay ya tira kanila y con el otro maga vehiculo que ta lleva ayuda. Tiene bomba ya rebenta na un propiedad que donde talla el Kingdom Hall y Assembly Hall. Tiene maga 200 maga hermano y hermana quien ta esconde na basement del Kingdom Hall na aquel tiempo. Nuay quien ya sale irido, pero ya queda destrozao el maga vehiculo del maga hermano y como resulta mas dificil para kanila que evacua na ciudad.

El un anciano (na letrato abajo) quien ya puede evacua na Mariupol junto con el de suyu familia ya relata: “Ya queda destrozao el diamon apartment, ya queda kame nuay trabajo y nuay mas kame puede comunica con el diamon maga amigo. El un dia viaje para puede sale na ciudad, ya alcanza kanamon seis dia. Mientras tan viaje kame [pa-apuera del ciudad], ya puede kame mira na camino maga rebentao bomba que ta humia. Durante el diamon viaje ya ayuda kanamon el maga hermano para busca onde kame puede cumpra comida y onde kame esta si denoche. Ya sinti kame que el diaton Tata na cielo, si Jehova, . . . ya cuida gayot kanamon. Ya manda este move kanamon que confia gayot con Jehova.”

El maga Testigo de Jehova quien ya queda refugee estaba na Ukraine, ya anda na maga diferente nacion na Europe para queda lejos na peligro. Por ejemplo, el un siervo ministerial y de suyu mujer junto con el diila tres anak que edad 7, 11 y 16, ya anda na Portugal donde ta queda el diila maga pariente que maga Testigo de Jehova tambien. Despues sila espera adentro de 11 hora para puede cruza na border, el familia ya viaja mas de 4,000 kilometro adentro del cuatro dia para llega na casa del diila maga pariente. Ya llega sila alla antes principia el miting del congregacion onde ta atende el diila pariente. Maskin pa no sabe sila converza Portuguese, ya mentena el familia con el diila espiritual rutina y ya atende na miting por medio na videoconference. Bilib gayot el maga hermano y hermana na congregacion cay alegre siempre el familia maskin pa dificil el diila situacion.

El otro hermana quien ya evacua junto con el de suyu familia para na Germany ya explica: “Cay ta le kame con el Biblia, tan focus na cosas positivo y ta medita con el bonito esperanza que todo kita tiene, ya tiene kame fuerza y animo. . . . Ya sinti kame que ta guia y ta ayuda kanamon si Jehova por medio na diaton maga hermano. Yan welcome sila y ya ayuda gayot kanamon cuando na Ukraine kame, na Hungary y ahora aqui na Germany!”

Claro gayot que ta ayuda si Jehova con el diaton maga hermano y hermana na Ukraine.​—Salmo 145:14.

Desde Marzo 16, 2022, el siguiente numero amo base na report estaba na Ukraine. Asegun este na maga confirmao report del diaton maga hermano alla. Pero, posible que mas alto pa con ese el actual numero, ciendo dificil el comunicacion na todo parte del nacion:

• 4 publisher el ya muri

• 19 publisher el ya sale irido

• 29,789 publisher el quien ya evacua y ya anda na otro maga lugar na Ukraine que lejos na peligro.

• 45 casa el ya sale destrozao

• 84 casa el ya tiene major damage

• 366 casa el ya tiene minor damage

• 16 Kingdom Hall el yan damage

• 27 Disaster Relief Committee (DRC) el ya forma na Ukraine para mira con el relief work

• 20,981 publisher el con quien directa ya asisti el maga DRC para busca lugar onde sila queda que lejos na peligro

• 11,973 publisher el ya evacua para na otro maga nacion y ya asisti kanila el maga hermano y hermana na aquel maga lugar