Ta continua kita reza para con el diaton maga hermano y hermana na Mariupol, donde ta continua el guerra. Maka-triste que seis del diaton maga hermano y hermana el ya muri por causa na bomba. Todo-todo, diez maga hermano y hermana el ya muri na Ukraine. Como cosa tambien ya sale na maga noticia, ya larga bomba del ya pasa semana con el un teatro, donde ta esta el mas de 1,000 maga gente. Nuay maga hermano que ya muri na este ataque pero el cuanto ya tiene maga minor injury.

Maga 750 hermano el ya puede sale na Mariupol mientras maga 1,600 el talla pa. Manada kanila el ta esta na parte este del ciudad que bajo ahora na control del Russia.

Como cosa ya menciona del ya pasa update, maga 200 hermano y hermana el ta esta na basement del un propiedad que tiene Kingdom Hall y un Assembly Hall. Cuando ya puede tiene comunicacion kanila, el maga hermano alla ya habla:

“Cuando tan bomba na lugar, el cuanto hermano y hermana ya sinti gayot miedo. El cuanto ya principia llura. Cuando ya oi kame con el maga rebentada apuera, ya pensa kame que baka hay muri kame na rebentada o na quema. Ya habla el un anciano que canta kame maga Kingdom song. Ya canta kame maga 10 para 15 maga cancion. Cuando mas ta queda suena el rebentada y mas tan uyuk el building, mas suena kame ya canta. Despues, ya le kame con el Salmo 27 y ya discuti con este. Acabar, ya principia man share el todo con el diila maga favorito texto estaba na Biblia y ya explica si paquemodo este ya hace fuerte kanila. . . . Ya experiencia gayot kame que si Jehova ‘el Tata de todo clase de lastima y el Dios de todo clase de consuelo,’ quien puede hace calma kanaton na maga de con todo dificil situacion.”​—2 Corinto 1:3, 4, El Nuevo Testamento na Chavacano.

El maga anciano y el maga miembro del local Disaster Relief Committee (DRC) ta busca con el diila maga hermano y hermana, y ta lleva kanila comida y medicina si necesita, maskin ta pone este na peligro con el diila mismo vida. Tiene vez, este maga hermano necesita man camang na tierra para protege con el diila mismo cuerpo na tiro mientras ta busca con el maga hermano y hermana na ciudad. Bien proud gayot kita con el diaton maga hermano quien ta “pone el diila vida na peligro” para na diila maga hermano y hermana.​—Roma 16:4.

Ciendo nuay gas y corriente, el maga hermana na entero ciudad ta cuci comida apuera usando el leña. Despues, ta lleva con el maga comida na maga de edad y disabled publisher. Ya perde el maga casa, coche y material cosas del manada del maga hermano y hermana pero ta rindi sila gracias na amor y cuidada del diila maga hermano y hermana.

Ta pricura sila continua con el diila espiritual rutina​—ta estudia sila junto con el Biblia y ta predica con el mensaje del Biblia con otro si posible.

Del Marzo 22, 2022, este el siguiente numero que base na report estaba na Ukraine. Asegun este na maga confirmao report del diaton maga hermano alla. Pero, posible que mas alto pa con ese el actual numero, ciendo dificil el comunicacion na todo parte del nacion.

• 10 publisher el ya muri

• 27 publisher el ya sale irido

• 33,180 publisher el quien ya evacua y ya anda na otro maga lugar na Ukraine que lejos na peligro

• 78 casa el ya sale destrozao

• 102 casa el ya tiene major damage

• 484 casa el ya tiene minor damage

• 1 Kingdom Hall el ya sale destrozao

• 4 Kingdom Hall el ya tiene major damage

• 18 Kingdom Hall el ya tiene minor damage

• 27 Disaster Relief Committee (DRC) el ya forma na Ukraine para mira con el relief work

• 25,069 publisher el con quien directa ya asisti el maga DRC para busca lugar onde sila queda que lejos na peligro

• 14,308 publisher el ya evacua para na otro maga nacion y ya asisti kanila el maga hermano y hermana na aquel maga lugar