Maka-triste cay na report del Marzo 29, 2022, siete pa del diaton maga hermano y hermana el ya muri na ciudad de Mariupol. Todo-todo, 17 maga hermano y hermana na Ukraine el ya muri.

Ta hace gayot esfuerzo el maga Disaster Relief Committee (DRC) na Ukraine para dale ayuda. Gane, ta pone sila na peligro el diila vida para busca con el diila maga hermano y hermana na maga lugar que bien afectao na guerra.

Por ejemplo, el maga hermano quien ta sirvi na maga DRC ya puede lleva maga comida, medicina y otro necesidad na maga bien afectao ciudad, igual na Kharkiv, Kramatorsk y Mariupol. El un miembro del DRC ta viaja mas de 500 kilometro cada dia y ta pasa na manada checkpoint del soldao para lleva comida y medicina na maga 2,700 publisher.

El maga DRC ta hace tambien manera para dale transportacion y transfiri con el maga hermano y hermana estaba na maga lugar donde ta sucede el guerra. El un hermano na Chernihiv DRC ya habla: “Cuando el maga soldao ya principia tira bomba na maga casa, claro que bien peligroso que esta na ciudad. Ciendo nuay corriente y Internet, el maga anciano ta anda na ciudad, maskin pa ta tira bomba con el lugar, para informa con el maga publisher quien ta esta na basement que tiene ya transportacion para ayuda kanila sale na ciudad.”

El un negociante que dueño del maga van y bus ya conforma que usa con el de suyu transportacion y ya viaja nueve beses para saca con el 254 del diaton maga hermano y hermana na Chernihiv. Na un ocasion, ya hace pa gane le manera para arregla con el camino para puede pasa el de suyu bus. Ya aprecia gayot el diaton maga hermano con el de suyu ayuda.

Triste kita para con aquellos quien tiene ya muri familia y amigo na este guerra. Todo kita ta espera con el tiempo donde nuay mas muerte y tristeza, como cosa ya promete na Palabra del Dios, el Biblia.—Revelacion 21:3, 4.

Del Marzo 29, 2022, este el siguiente numero que base na report estaba na Ukraine. Asegun este na maga confirmao report del diaton maga hermano alla. Pero, posible que mas alto pa con ese el actual numero, ciendo dificil el comunicacion na todo parte del nacion.

• 17 publisher el ya muri

• 35 publisher el ya sale irido

• 36,313 publisher el quien ya evacua y ya anda na otro maga lugar que lejos na peligro

• 114 casa el ya sale destrozao

• 144 casa el ya tiene major damage

• 612 casa el ya tiene minor damage

• 1 Kingdom Hall el ya sale destrozao

• 7 Kingdom Hall el ya tiene major damage

• 23 Kingdom Hall el ya tiene minor damage

• 27 Disaster Relief Committee (DRC) el ya forma na Ukraine para mira con el relief work

• 34,739 publisher el con quien directa ya asisti el maga DRC para busca lugar onde sila queda que lejos na peligro

• 16,175 publisher el ya evacua para na otro maga nacion y ya asisti kanila el maga hermano y hermana na aquel maga lugar