Maka-triste, tiene omento maga hermano y hermana quien ya muri por causa na guerra na Ukraine. Todo-todo, 28 maga Testigo de Jehova el quien ya muri.

Asegun na international news, durante el maga primer semana grabe el guerra na maga lugar cerca na Kyiv. Na maga 4,900 publisher quien ta queda na este region, mas de 3,500 diila el quien ya puede evacua para na maga lugar que lejos na peligro.

El siguiente maga experiencia ta dale mira si paquemodo el diaton maga hermano na este maga lugar ya mentena con el fuerte fe maskin pa ya experiencia maga grabe dificultad.

Si Hermano Oleksandr, un anciano na lugar del Makariv, ya puede evacua na centro de Ukraine. Pero por causa na de suyu lingasa na cuatro publisher na de suyu field service group con quien gendeh le ta puede man contact, ya bira le na diila lugar onde tiene guerra para busca kanila. Ele ya habla: “Sabe yo que bien precioso gayot con Jehova el de suyu maga siervo. . . . Cuando ya llega yo na enfrente del casa del uno na maga publisher, ya mira yo que ya tupa alla el bomba. Cerrao el puerta na basement del diila casa y nuay quien ta contesta cuando ta llama yo. Por causa con ese, ya nervia yo.” Ya abri si Hermano Oleksandr con el puerta del basement y ya incuntra le con el un grupo del maga gente—maga publisher junto con el diila maga vecinos que gendeh maga Testigo quien ya esconde tambien alla.

El uno del maga publisher talla na basement, si Hermano Yaroslav, ya habla que ya esta sila alla por ocho dia. Ele ya relata: “El cada uno kanamon ta come lang cuanto maga biscuit y ta toma un baso de agua cada dia. Pero, ya le kame con el Biblia y diaton maga publicacion, ya reza y ya anima con uno y otro. Cuando ya oi yo que ya llama de mio nombre si Hermano Oleksandr, pensaba yo hay saca conmigo el maga soldao. Ya pensa yo hay muri ya yo. . . . [Sino,] ya salva le kanamon todo. Ta rindi gayot kame gracias con Jehova cay tiene kame un amable espiritual familia quien ta reza para kanamon y conforme pone na peligro el diila vida para salva kanamon.”

Si Hermano Pylyp y el otro hermano ya decidi lleva comida con aquellos quien nuay puede sale na lugar del Borodianka. Del Marzo 17, mientras ta maneja para na aquel lugar, el maga soldao ya saca con el coche de Hermano Pylyp y con el maga comida que ta lleva sila. Ya arresta kanila dos el maga soldao, ya pone posas y ya tapa con el diila ojos, y ya lleva kanila na un diutay cuarto del un basement junto con el siete otro maga hombre. Dos dia despues, ya lleva kanila na un celda donde ya gulpia kanila el maga guardia durante el noche. Si Hermano Pylyp ya habla: “Gendeh yo asigurao si hay vivi pa ba yo. Ya reza yo que puede yo esta leal.”

Un tiempo cuando ya gulpia con Hermano Pylyp, ya principia le reza suena para na maga de edad hermana quien nuay comida, para na proteccion del de suyu familia y ya rindi le gracias con Jehova cay alegre le ya puede sirvi con Ele por cuanto año. Ya lleva con ele otravez el guardia na de suyu celda donde ya puede le continua reza que ayuda con el maga soldao para entende que gendeh peligroso el maga hermano. Ya puede principia predica el dos hermano con el maga guardia. Por dos dia, ta predica sila con el maga soldao quien tan relevajan vicia na celda. Acabar, uno del maga hombre quien talla na preso ya dale mira interes na mensaje del Biblia. Ya rindi le gracias con el maga hermano. Del Marzo 27, ya larga con el maga hermano y con el hombre quien ya dale mira interes.

El un single hermana de Bucha que si Svitlana, nuay puede escapa na diila lugar cuando tiene guerra por dos semana. Ele ya habla: “Mas ta entende ya yo ahora si porque bien importante que tene el paz que ta dale si Jehova. Si tiene kita el paz del Dios, gendeh se pirmi quierre decir que sabe kita si cosa hace. Sino, si ta enfrenta kita ansina maga situacion, ta confia gayot kita con Jehova.”

Mientras ta viaja para na lugar que lejos na peligro na Ukraine, si Hermana Svitlana ya predica con el un mujer y con el de suyu subrino. Cuando ya llega sila alla, yan welcome kanila el un familia que maga Testigo de Jehova. Ya manda sila queda na diila casa con Hermana Svitlana junto con el mujer y de suyu subrino na aquel noche. Pagka-alamañana, ya pidi el mujer un Biblia y diaton maga literatura, y quierre le atende na un miting del congregacion. Ya continua si Hermana Svitlana man contact con ele.

Del Abril 12, 2022, este el siguiente numero que base na report estaba na Ukraine. Asegun este na maga confirmao report del diaton maga hermano alla. Pero, posible que mas alto pa con ese el actual numero, ciendo dificil el comunicacion na todo parte del nacion.

• 28 publisher el ya muri

• 48 publisher el ya sale irido

• 40,778 publisher el quien ya evacua y ya anda na otro maga lugar que lejos na peligro

• 278 casa el ya sale destrozao

• 268 casa el ya tiene major damage

• 746 casa el ya tiene minor damage

• 1 Kingdom Hall el ya sale destrozao

• 9 Kingdom Hall el ya tiene major damage

• 26 Kingdom Hall el ya tiene minor damage

• 27 Disaster Relief Committee (DRC) el ya forma na Ukraine para mira con el relief work

• 41,974 publisher el con quien directa ya asisti el maga DRC para busca lugar onde sila queda que lejos na peligro

• 18,097 publisher el ya evacua para na otro maga nacion y ya asisti kanila el maga hermano y hermana na aquel maga lugar