ABRIL 29, 2022
UKRAINE
UPDATE #7 | El Maga Hermano Ta Continua Demonstra Amor Durante el Guerra na Ukraine
Mas de 210,000 el Ya Atende na Comemoracion
Alegre kame reporta que por causa na bendicion de Jehova na de suyu maga siervo na Ukraine, el diaton maga hermano y hermana na entero nacion ya puede celebra con el Comemoracion del Muerte del Cristo. Na oeste parte del Ukraine, ya puede hace con el Comemoracion na manada Kingdom Hall donde ta esta el maga hermano y hermana. Mayoria ya hace con el Comemoracion na maga diutay grupo y aquellos quien gendeh puede sale na casa yan tie in por medio na videoconference.
Durante el dia de Comemoracion, entero dia ya suena el maga sirena na mayoria del maga lugar na nacion. Pero cuando ya llega el noche, ya descanza este. “Ya reza kame que era gendeh destorba con el Comemoracion el rebentada del maga bomba,” ya habla si Sherhiy de Druzhkivka, Donetsk Region. “Corto tiempo antes principia el Comemoracion, ya descanza el rebentada y el maga sirena.”
El un grupo de maga de edad publisher y aquellos quien tiene limitacion na cuerpo na Nemishaeve, cerca na Kyiv, nuay puede atende na maga miting por mas de un mes ya. Ya reza sila que puede era sila atende na Comemoracion. Si Vitaliy, un anciano, ya ayuda con el grupo para celebra con el Comemoracion. “Nuay corriente,” ele ya habla, “poreso ya hace kame con el Comemoracion usando el flashlight. Nuay heater. Nuay tambien musica poreso el de mio anak mujer ya tuca con el violin para ayuda kanamon canta con el maga cancion.”
Si Oleksandr, un anciano quien ta queda onde ta sucede el guerra, ya habla: “Durante el campaña para na invitacion de Comemoracion, no puede kame escribi carta na maga gente na teritorio del diamon congregacion cay yan bomba y ya abandona con el maga casa. Poreso, ya invita kame con el diamon maga conoce, con el maga gente que ya conoce kame na maga basement y con aquellos con quien kame junto ya evacua. Manada kanila nuay pa puede oi con el maga Testigo de Jehova de antes. Y manada kanila el yan junto kanamon na Comemoracion.”
Maskin nuay pa completo report estaba na todo congregacion na Ukraine, sabe kita que mas de 210,000 el ya atende na Comemoracion.
Acerca na Comemoracion, el un hermano na Ukraine ya habla: “Igual na un lighthouse que ta dale asiguranza con el maga marinero que cerca ya sila na aplaya, el Comemoracion ta dale asiguranza conmigo que cerca ya llega el dia de Jehova. Y este año, mas ya queda yo convincido con ese.”
Del Abril 21, 2022, este el siguiente numero que base na report estaba na Ukraine. Asegun este na maga confirmao report del diaton maga hermano alla. Pero, posible que mas alto pa con ese el actual numero, ciendo dificil el comunicacion na todo parte del nacion.
Efecto na Diaton Maga Hermano y Hermana
35 publisher el ya muri
60 publisher el ya sale irido
43,792 publisher el quien ya evacua y ya anda na otro maga lugar que lejos na peligro
374 casa el ya sale destrozao
347 casa el ya tiene major damage
874 casa el ya tiene minor damage
1 Kingdom Hall el ya sale destrozao
10 Kingdom Hall el ya tiene major damage
27 Kingdom Hall el ya tiene minor damage
Ayuda Para con Aquellos Quien Ya Sale Afectao
27 Disaster Relief Committee (DRC) el ya forma na Ukraine para mira con el relief work
44,971 persona el con quien directa ya asisti el maga DRC para busca lugar onde sila queda que lejos na peligro
19,961 publisher el ya evacua para na otro maga nacion y ya asisti kanila el maga hermano y hermana na aquel maga lugar