Na ayuda del 27 Disaster Relief Committees (DRC), el Ukraine branch ta continua cuida con el maga hermano y hermana quien ya sale afectao na guerra na ese nacion. Desde el principio del guerra, mas de 250 tonelada de ayuda el ya puede imbia estaba na Poland, incluido el comida, ropa y otro pa cosas de limpieza. Gendeh pa alli entrao el mas de 80 tonelada de comida que ya imbia el maga hermano y hermana quien ta queda na maga safe lugar na Ukraine.

Acerca con el ayuda que ya ricibi estaba na maga hermano quien ta sirvi na DRC, el un hermana que si Valentyna, de Kyiv, ya escribi: “Cuando ya principia el guerra, ya queda bien peligroso queda na ciudad. Poreso, ya evacua yo na un diutay ciudad na region de Cherkasy. Mas de dos meses ya yo aqui. El maga hermano y hermana na congregacion aqui ya dale gayot mira grande amor conmigo. Ya lleva sila conmigo cuanto carton de ayuda y cosas de limpieza. Cuando ya mira yo con este todo ayuda, ya queda yo bien emocional. Na uno del maga carton, tiene un drawing y postcard estaba con el un cuatro año bata que si Blanca . . . Hay recuji yo con este maga drawing como remembrance del ayuda que ya ricibi yo. Ta rindi gayot yo gracias con el de mio maga hermano y hermana, y especialmente con Jehova.”

El un 83 año disable hermana de Sieverodonetsk que Valentyna tambien el nombre, ya escribi: “Cuando ya principia el guerra, solo lang yo ta queda. Ya muri el de mio solo anak hombre antes pa el guerra. Bien maka-miedo gayot cay entero dia tiene bomba ta rebenta na ciudad. Nuay agua, nuay corriente, nuay gasolina y mahina tambien el Internet. Ta aprecia gayot yo con el maga hermano y hermana quien ya ayuda conmigo, maskin pa pone na peligro el diila vida.”

Ya continua le: “Nuay dura, ya lleva comigo el maga hermano junto con el dos otro pa disable hermana na Dnipro, un mas safe lugar. Na Dnipro, ya ayuda conmigo el maga hermano para busca lugar onde para esta. Ahora, ta queda yo junto na un familia que igual maga Testigo de Jehova quien ta cuida conmigo. Igual kame como un familia. Gane, ya ayuda sila conmigo para tene un smartphone para puede yo atende y participa na maga miting. Gendeh gayot yo ulvida el pagka-bueno que ya dale mira el maga hermano y hermana conmigo.”

Lleno de alegria y apresacion el diaton corazon na diaton amable Tata, si Jehova, quien ta continua cuida con el diaton maga amable hermano y hermana na Ukraine para “gendeh [sila] falta cosas bueno.”—Salmo 34:10.

Del Junio 7, 2022, este el siguiente numero que base na report estaba na Ukraine. Asegun este na maga confirmao report del diaton maga hermano alla. Pero, posible que mas alto pa con ese el actual numero, ciendo dificil el comunicacion na todo parte del nacion.

• 42 publisher el ya muri

• 82 publisher el ya sale irido

• 46,145 publisher el quien ya evacua

• 469 casa el ya sale destrozao

• 540 casa el ya tiene major damage

• 1,405 casa el ya tiene minor damage

• 5 Kingdom Hall el ya sale destrozao

• 8 Kingdom Hall el ya tiene major damage

• 33 Kingdom Hall el ya tiene minor damage

• 27 Disaster Relief Committee (DRC) el ya forma na Ukraine para mira con el relief work

• 50,663 persona el con quien directa ya asisti el maga DRC para busca lugar onde sila queda que lejos na peligro

• 22,995 publisher el ya evacua para na otro maga nacion y ya asisti kanila el maga hermano y hermana na aquel maga lugar