Ya nace yo na un pobre familia na Tiranë, el centro del Albania. Honesto persona el de mio tata y ta trabaja le por largo hora para puede mantene kanamon. Pero, pirmi kame tan lisud na material. Cuando bata yo, tan triste yo cay pobre kame. Nuay yo sapatos y pirmi nuay bastante comida.

 Bata pa lang yo, ya acerta ya yo ruba. Ta pensa yo que ta ayuda lang yo dale el necesidad del de mio familia. Na uliji, ya cuji conmigo el polis. Poreso del 1988, cuando 14 año yo, ya pone conmigo de mio tata na un reform school. Dos año yo ya esta alla y ya aprende queda un welder. Cuando ya sale yo alla, quierre yo tene un decente trabajo; pero, nuay yo puede incuntra trabajo. Manada el nuay trabajo na Albania por causa na problema na politica. Yan luya yo y yan junto oleh con el de mio maga amigo de antes, y ya principia ruba otravez. Ya llega el tiempo, ya arresta kanamon y yan preso kame por tres año.

 Despues conmigo libra, ya continua yo hace maga crimen. Ya queda gendeh enbuenamente el economia na Albania y ya queda trambulicao el nacion. Durante na aquel maga tiempo, ya tiene yo manada sen por causa na maga ilegal trabajo. Despues del un robo que donde ya cuji con el de mio dos uban, ya escapa yo na otro nacion para evita man preso por largo tiempo. Aquel tiempo, casao yo con Julinda y tiene kame un baby hombre.

 Ya guinda kame na England. Ya plaña yo cambia con el de mio manera de vida junto con el de mio mujer y anak. Pero, dificil deja con el cosa que yan anad ya yo hace. Nuay dura, ya queda yo otravez envuelto na un crimen—na ese tiempo ta vende yo droga y ta agarra grande cantidad de sen.

 Cosa ta sinti si Julinda na de mio trabajo? Ele mismo habla con ustedes: “Mientras ta engranda na Albania, no quierre yo queda pobre. Conforme yo hace maskin cosa para man asenso. Pensaba yo hay queda mas enbuenamente el diamon vida si manada kame sen. Poreso, ya suporta yo con Artan maskin tan imbusterias le, ta ruba y ta vende droga—maskin cosa para tene sen.”

 Despues, del 2002, ya cambia el diamon vida y nuay porsigui el diamon plano que tene mas enbuenamente vida. Ya cuji conmigo que ta carga bien manada droga y yan preso yo otravez.

 Nuay yo puede nota que el Biblia ya principia influencia con el de mio vida. Del 2000, ya conoce si Julinda con el maga Testigo de Jehova y ya principia le man Bible study junto kanila. Nuay yo interes discuti con el Biblia cay para conmigo maka-boring ese. Pero quierre-quierre se si Julinda. Ele ya habla: “Religioso diamon familia y ta ama yo y ta respeta con el Biblia. Quierre gayot yo sabe si cosa este ta enseña y excited yo que estudia con el Biblia junto con el maga Testigo. Ya mira yo que razonable el manada enseñanza del Biblia. El cosa yo ya aprende ya ayuda conmigo para hace cuanto cambia na de mio vida. Maskin pa ansina, ya pensa siempre yo que queda kame alegre si manada kame sen—pero ya cambia se cuando ya arresta con Artan. Por causa con ese, ya cambia el de mio pensamiento. Ya realiza yo que deverasan el cosa ta habla el Biblia acerca na sen. Ya hace kame el todo para queda rico pero nuay se kanamon hace alegre. Ya entende yo que necesita yo sigui con el todo principio del Dios.”

 Ya libra conmigo del 2004 y nuay dura ya pricura yo otravez vende droga. Pero, cambiao ya el pensamiento de Julinda y tiene le cosa ya habla que ya ayuda conmigo para pensa enbuenamente: “No quierre mas yo de tuyu sen. Quierre yo con el de mio marido y quierre yo que taqui el tata del de mio maga anak.” Espantao yo pero justo le. Largo tiempo yo lejos na de mio familia. Puera con ese, ya pensa yo el manada dolor que ya experiencia yo por causa cay ya pricura yo tene sen na deshonesto manera. Poreso, ya decidi yo cambia con el manera del de mio vida y gendeh mas man junto con el de mio maga amigo de antes.

 El cosa gayot ya tiene grande efecto conmigo amo cuando iyo y el de mio mujer junto con el diamon dos anak ya atende na un miting del maga Testigo de Jehova. Bilib gayot yo cay el maga gente con quien yo ya conoce alla sincero y friendly. Na uliji, ya principia yo man Bible study.

 Ya aprende yo na Biblia que “el amor con el sen amo el raiz de todo maga cosa-cosa malo. Y tiene maga gente quien, por causa de ese, . . . ya hace iri el diila corazon con mucho irida.” (1 Timoteo 6:9, 10, El Nuevo Testamento na Chavacano) Puede gayot yo habla que deverasan el cosa ta habla na ese texto! Ta arripinti ga’t yo con el de mio maga kamali de antes cay ya causa se dolor conmigo y na de mio familia. (Galacia 6:7) Cuando ya aprende yo que ta ama kanaton si Jehova y el de suyu Anak, si Jesucristo, ya principia yo cambia con el de mio personalidad. Gendeh mas yo tan focus lang na de mio mismo cuerpo sino ta pensa yo con otro y ta dale yo mas grande tiempo para man junto con el de mio familia.

 Ya beneficia yo cuando ya sigui yo con el consejo del Biblia: “No pone ya lang el di ustedes pensamiento con el cen. Esta contento con el que tiene ustedes.” (Maga Hebreo 13:5, El Nuevo Testamento) Tiene yo ahora paz na pensamiento y un limpio conciencia. Ya dale se conmigo alegria que nuay yo experiencia de antes. Ya queda mas fuerte el diamon matrimonio y ya queda mas cerca na uno y otro el de mio familia.

 De antes ta pensa yo que si tiene kame manada sen, hay queda kame alegre. Ahora claro yo ya puede mira si paquemodo el crimen y amor na sen ya causa conmigo manada dolor. Gendeh kame rico na material pero ta sinti yo que tiene kame cosa ya incuntra mas importante na diamon vida—el buen amistad con Dios Jehova. Alegre gayot kame que junto sirvi con ele como un familia.