Ya nace yo na Uganda, na distrito de Gomba. Bien pobre el mayoria del maga gente alla. Nuay corriente na diamon lugar poreso ta usa kame maga lampara si denoche.

 Maga siembrador el de mio mayores quien ya cambia na Uganda estaba na Rwanda. Ta siembra sila cafe y saging, y ta hace sila un conocido tomada que ta llama waragi que estaba na saging. Ta cuida tambien el de mio mayores maga manok, cabrito, puerco y vaca. Na diamon cultura, ya engranda yo que ta pensa que el un mujer debe pirmi obediente con el de suyu marido y nunca debe habla con el de suyu opinion.

 Cuando 23 año yo, ya cambia yo na Rwanda donde ta anda yo na maga club junto con otro que ta semeja el edad conmigo. Gane na un club, cay pirmi yo ta anda alla, ya dale conmigo el dueño un card para puede yo entra libre. Quierre-quierre tambien yo mira maga salida que violente gayot. El maga cosas alrededor conmigo y el de mio entretenimiento ya influencia conmigo para queda violente, imoral y burrachon.

 Del 2000, ya principia yo man live-in junto con el un joven mujer que si Skolastique Kabagwira y ya tiene kame tres anak. Como cosa yo ya aprende desde bata, ta expecta yo que hinca le adelante conmigo si man greet le o si tiene le cosa pidi conmigo. Ta creé tambien yo que de mio el todo que cosa kame tiene y puede yo usa con ese na maskin cosa manera que quierre yo. Pirmi yo ta sale si denoche y ta bira maga alas tres de madrogada que tomao. Tan tuktuk yo na puerta y si dura ta puede abri si Skolastique, ta gulpia yo con ele.

 Aquel tiempo, ta trabaja yo como un supervisor na un privado compania y grande el de mio sueldo. Ya pricura si Skolastique convinci conmigo que sigui con ele na religion de Pentecostal cay ta pensa le que puede este cambia conmigo. Pero gendeh yo interesao. En vez de oi con ele, ya tiene yo relacion na otro mujer. Cay violente yo y imoral, ya sale si Skolastique y ya bira na de suyu mayores llevando el diamon tres anak.

 El diamon un de edad amigo yan cuento conmigo acerca na de mio manera de vida. Ya anima le conmigo que bira con Skolastique. Ya habla le que gendeh conviene que separtao el de mio maga anak con el diila tata. Poreso del 2005, ya descanza yo toma, ya deja con el otro mujer y ya bira con Skolastique. Del 2006, ya casa kame. Pero, violente siempre yo y ta abusa con el de mio mujer.

 Del 2008, el uno del maga Testigo de Jehova que si Joël ya visita na diamon casa y ya oi yo con el de suyu mensaje. Adentro na manada meses, regular le ta visita conmigo junto con el otro Testigo que si Bonaventure y ya tiene kame maga hondo discusion acerca na Biblia. Ya dale yo kanila manada maga pregunta, especialmente acerca na libro de Revelacion. El deverasan, quierre yo dale prueba que mali el maga Testigo. Por ejemplo, ya pregunta yo si porque sila ta habla que el grande grupo que ya menciona na Revelacion 7:9 hay queda aqui na tierra ciendo el versiculo ta habla que “parao sila adelante del trono [del Dios] y del Carnero” que si Jesucristo. Con paciencia si Joël ya contesta con el de mio maga pregunta. Por ejemplo, ya dale le conmigo mira el Isaias 66:1 donde ta llama el Dios con el tierra como el lugar onde le ta pone con el de suyu pies. Poreso, justo lang que pensa que el grande grupo ta para na tierra adelante na trono del Dios. Y ya le tambien yo na Salmo 37:29 que el maga recto hay queda na tierra hasta para cuando.

 Na uliji, ya conforma yo que man Bible study. Poreso, yan Bible study si Bonaventure kanamon de Skolastique. Mientras ta estudia kame con el Biblia, ya principia yo sinti que necesita yo hace maga cambio na de mio vida. Ya aprende yo que trata con el de mio mujer con respeto. Gendeh mas yo quierre que ta hinca le adelante conmigo si tan greet le o si tiene le cosa ta pidi conmigo. Y gendeh mas yo ta pensa que de mio todo el cosa tiene el diamon familia. Gendeh mas tambien yo ta mira maga salida que tiene violencia. Yan dificil yo hace con este maga cambio cay necesita yo controla con el de mio mismo cuerpo y queda humilde.

 Maga cuanto año antes este, ya lleva yo con el de mio de con todo mayor anak que si Christian na Uganda para queda junto na diamon maga pariente. Pero despues yo le con el Deuteronomio 6:4-7, ya realiza yo que ya dale el Dios kanamon man maridable el responsibilidad para cuida con el diamon maga anak y incluido alli amo que enseña kame kanila si cosa ta habla el Biblia. Bien alegre gayot el diamon familia cuando ya lleva kame bolbe con Christian!

 Ya aprende yo que un lastimoso Dios si Jehova y tiene yo confianza que ya perdona ya le conmigo na maga cosa yo ya hace de antes. Alegre yo cay yan Bible study tambien si Skolastique junto conmigo. Ya dedica kame el diamon vida con Jehova y ya bautiza junto del Deciembre 4, 2010. Ahora, ta confia kame con uno y otro, y ta aplica con el maga principio na Biblia na diamon familia. Bien alegre el de mio mujer cay ta bolbe ya yo dayun despues el trabajo. Ta aprecia tambien le que ta trata yo con ele con dignidad y respeto, que ya hace yo personal decision que evita con el maga alcoholico tomada y que gendeh mas yo violente. Del 2015, ya iscuji conmigo para queda un anciano para ayuda cuida con el congregacion. Na diamon cinco anak, tres el bautizao.

 Cuando ya estudia yo con el Biblia junto na maga Testigo de Jehova, nuay lang yo basta acepta con el cosa sila ya enseña conmigo. Sino, yan bilib yo cay ya usa sila con el Biblia para contesta con el de mio maga pregunta. Ya realiza kame de Skolastique que aquellos quien ta clama que ta sirvi sila con el verdadero Dios debe vivi harmonia na todo de suyu maga principio y gendeh lang base na cosa sila quierre. Ta rindi gayot yo gracias con Jehova cay ya guia le conmigo y parte ya yo ahora del de suyu espiritual familia. Si ta pensa yo con el de mio pasada, convincido yo que na ayuda del Dios, el maskin quien puede hace con el maga necesita cambio para hace alegre con ele.