Ya nace yo na ciudad de Calgary na Alberta, Canada. Cuando baby pa lang yo, yan divurcio el de mio maga mayores, y iyo y el de mio nana ya queda na de mio lolo y lola. Ta ama gayot sila kanamon del de mio nana poreso bien alegre gayot yo aquel tiempo. Manada gayot yo bonito experiencia cuando bata yo.

 Cuando siete año yo, yan birajan el de mio nana y tata. Acabar, ya cambia kame na St. Louis, Missouri, na United States. Na ese tiempo, ya queda mas dificil el de mio vida. Y alla ya sabe yo que tiene pagka-violente el de mio tata. Por ejemplo, cuando ya bolbe yo estaba na de mio nuevo escuela, ya sabe le que yan bully conmigo pero nuay yo imbisti. Ya rabia gayot le y ya bombia conmigo mas duele pa contra na cosa ya hace el maga yan bully conmigo! Despues de aquel, ya aprende yo imbisti. Poreso, maskin siete año pa lang yo, peleador ya yo.

 Ta rabia gayot de mio nana na custumbre del de mio tata poreso pirmi sila tan peleajan. Cuando 11 año yo, ya principia yo usa droga prohibido y toma alcoholico tomada. Ya queda yo mas agresivo y pirmi ta busca peleajan na camino. Cuando ya gradua yo high school, mas ya queda yo violente.

 Cuando 18 año yo, ya entra yo na U.S. Marine Corps. Por causa na aquel training, ya aprende yo mata gente. Despues del cinco año, ya sale yo na military para estudia psychology cay quierre yo trabaja na Federal Bureau of Investigation. Ya principia yo estudia na un universidad na United States y cuando ya bira yo na Canada, ya continua yo estudia alla.

 Cuando talla yo universidad, ya queda yo bien desmayao na maga gente. El maga gente ta pensa lang con el diila mismo cuerpo. Puera con ese, dol nuay mas por donde el mundo y dol nuay mas solucion el problema del maga gente. Poreso, ya perde yo esperanza que tiene pa cosa puede hace el maga gente para queda enbuenamente el situacion del mundo.

 Por causa cay ya sinti yo que nuay por donde el de mio vida, mas ya usa yo con el de mio tiempo na alcoholico tomada, usada de droga prohibido, buscada de sen y na sex. Por causa na military training, ya queda gayot yo bien valiente poreso pirmi yo envuelto na maga peleajan. Ta creé yo que sabe yo si cosa el justo y gendeh, y ta confronta yo con aquellos quien ta maltrata con otro. Pero el deverasan, ta deja lang yo que controla conmigo el violencia.

 Cuando high kame na droga del de mio amigo y mientras ta prepara ilegal shipment de marijuana, ya pregunta le conmigo si ta creé ba yo con Dios. Ya contesta yo, “Si el Dios el causa del sufrimiento na mundo, no quierre yo conoce con ele!” Alamañana, na primer dia na de mio nuevo trabajo, el de mio uban que uno del maga Testigo de Jehova, ya pregunta conmigo, “Para contigo, el Dios ba el causa del sufrimiento na mundo?” Ya espanta yo na de suyu pregunta poreso quierre yo sabe pa mas. Adentro na seis meses, manada kame cosa ya puede discuti y ya dale le mira conmigo el maga contestacion na Biblia na cuanto maga dificil pregunta na vida.

 El de mio fiancée, con quien yo tan live-in aquel tiempo, no quierre que habla yo con ele el maga cosas que ta aprende yo. Un Domingo aga, ya habla yo con ele que ya invita yo con el maga Testigo de Jehova na casa para estudia kame junto con el Biblia. Alamañana, cuando ya bolbe yo estaba na trabajo, ya saca le el todo diamon gamit na casa y ya deja conmigo. Ya sale yo apuera del casa y ya llura. Ya reza tambien yo con Dios para pidi ayuda con ele. Amo quel el primer tiempo que ya usa yo con el personal nombre del Dios na rezo, si Jehova.—Salmo 83:18.

 Despues del dos dia, ya principia yo man Bible study junto con el un man maridable Testigo de Jehova. Cuando ya sale sila, ya continua yo le con el libro You Can Live Forever in Paradise on Earth y ya acaba yo con aquel le na aquel mismo noche. a Ya alcanza gayot na de mio corazon el cosa yo ya aprende acerca con Dios Jehova y na de suyu Anak, si Jesucristo. Ya puede yo sabe que amable Dios si Jehova y ta sinti le duele si ta sufri kita. (Isaias 63:9) Ya aprecia gayot yo el amor del Dios y el sacrificio que ya hace el de suyu Anak para conmigo. (1 San Juan 4:10) Ya puede yo realiza que paciencioso gayot conmigo si Jehova “cay quiere Le que noay ni uno quien ay perde, sino todo ay arripinti.” (2 Pedro 3:9, El Nuevo Testamento na Chavacano) Ya sinti yo que quierre si Jehova que queda yo de suyu amigo.—Juan 6:44.

 Ya principia yo atende miting aquel mismo semana. Largo el de mio pelo, tiene aretes y makamiedo el de mio ichura. Pero, ya trata conmigo el maga Testigo de Jehova como diila pariente que dura ya sila nuay puede mira. Ya puede yo mira na diila accion que sila el maga verdadero Cristiano. Ya sinti yo que talla yo otravez na casa del de mio lolo y lola pero mas pa el alegria que ya experiencia yo.

 Nuay dura, hinay-hinay ya cambia el de mio vida por causa na maga cosas que ya aprende yo na Biblia. Ya curta yo pelo, ya descanza con el todo imoral practica y nuay mas yo usa droga prohibido y man burracho. (1 Corinto 6:9, 10; 11:14) Quierre yo hace alegre con Jehova. Poreso cuando ya sabe yo que no quierre si Jehova con el maga cosas que ta hace yo, nuay yo con ese hace no vale nada. Sino, ta manda se conmigo man conciencia. Ta habla yo na de mio mismo cuerpo, ‘Gendeh yo debe continua actua ansina.’ Acabar, ta pricura yo cambia si paquemodo yo ta pensa y ta actua. Como resulta, ya puede yo experiencia el maga beneficio si hace yo el maga cosas que quierre si Jehova. Del Julio 29, 1989—seis meses despues yo principia man Bible study—ya queda yo uno del maga Testigo de Jehova.

 Ya puede conmigo ayuda el Biblia para puede yo cambia con el de mio personalidad. De antes, ta queda yo violente si gendeh enbuenamente ta trata conmigo el un persona. Pero ahora ta pricura yo “vivi con paz” na todo gente. (Roma 12:18) Ya puede yo este hace gendeh por causa na de mio mismo cuerpo sino por causa na ayuda de Jehova por medio na de suyu Palabra y sagrao espiritu.—Galacia 5:22, 23; Maga Hebreo 4:12.

 De antes, ta usa yo droga prohibido, violente y imoral. Pero ahora, ta hace yo el todo para pricura hace alegre con Dios Jehova. Tiene tambien yo el privilegio que ayuda con otro que conoce con ele. Cuanto año despues yo bautiza, ya cambia yo na un lugar donde poco lang el predicador. Adentro na manada año, alegre yo enseña con el manada gente y mira si paquemodo el Biblia ta cambia con el diila vida. Alegre tambien yo cay el de mio nana ya queda uno del maga Testigo de Jehova—uno na maga razon amo cay ya puede le mira que ya puede yo cambia el de mio custumbre y conducta.

 Del 1999, na El Salvador, ya gradua yo na escuela que ta llama ahora School for Kingdom Evangelizers. Yan train este conmigo para guia na trabajo predicacion y enseña y cuida con el congregacion. Na aquel año, ya casa yo con el de mio amable mujer que si Eugenia. Ya sirvi kame junto full-time na ministerio na Guatemala.

 De antes, ya perde el de mio esperanza na vida pero ahora bien alegre ya yo. Cay ya aplica yo con el maga enseñanza na Biblia, ya ayuda este conmigo para evita con el sexual imoralidad y violencia. Por causa con ese, ya puede yo experiencia el deverasan amor y paz na vida.