Ya engranda yo como un Catolico na Rochester, New York. Yan separtajan el de mio mayores cuando ocho año yo. Poreso cada Lunes hasta Viernes, junto yo ta queda con el de mio nana na diamon simple apartment. Pero si Sabado y Domingo, junto yo con el de mio tata quien ta queda na un rico comunidad. Cuando ya mira yo si paquemodo yan dificil el de mio nana que hace engranda kanamon seis man hermano y hermana, ya tene yo ambicion que queda rico para ayuda con el de mio familia.

 Quierre el de mio tata que man asenso yo na vida poreso ya manda le conmigo visita con el un conocido escuela de hotel management. Ya gusta gayot yo alla y yan enroll, y ya pensa que ta contesta el Dios con el de mio rezo que queda rico y alegre. Ya estudia yo hotel administration, business law y corporate finance por cinco año mientras ta trabaja na un casino hotel na Las Vegas, Nevada.

 Na edad de 22, ya queda yo el assistant vice president na un casino hotel. Ta mira conmigo el maga gente como rico cay ta puede yo come con el maga de con todo sabroso comida y ta toma con el maga de con todo caro vino y alcoholico tomada. El de mio maga amigo ta habla conmigo, “Man focus lang tu na de con todo importante cosa na mundo—el sen.” Para kanila, sen el secreto para queda deverasan alegre.

 Incluido na de mio trabajo que sirvi con el maga bien rico quien ta anda na Las Vegas para juga maga juego de sen. Maskin pa rico sila, dol gendeh sila alegre. Y ya sinti tambien yo igual ansina. Gane si mas manada yo sen, mas malingasa yo y gendeh ta puede durmi enbuenamente cada denoche. Ya principia yo pensa que man suicide. Cay cansao ya yo na de mio vida, ya pregunta yo con Dios, “Onde yo puede incuntra el deverasan alegria?”

 Na aquel tiempo, dos del de mio hermana, quien ya queda maga Testigo de Jehova, el ya cambia na Las Vegas. Maskin pa nuay yo acepta con el diila literatura, ya conforma yo que le con el de mio mismo copia de Biblia junto kanila. Na de mio Biblia, escribido na colorao el maga palabra de Jesus. Cay ta acepta yo con el todo cosa ya habla si Jesus, el de mio maga hermana pirmi tan cuento conmigo acerca con ese. Ta le tambien yo con el Biblia maskin solo yo.

 Ya espanta yo na manada cosas que ya puede yo le. Por ejemplo, si Jesus ya habla: “Si ta reza ustedes, no habla mucho maga palabra bulao como ta hace el maga pagano. Ta pensa sila el Dios ay oi canila por causa del diila maga largo rezo.” (Mateo 6:7) Pero, el un padre ya dale conmigo un letrato de Jesus y ya habla que si reza yo con ese letrato y menciona diez Our Father y diez Hail Mary, el Dios hay dale conmigo maskin cuanto sen que necesita yo. Pero si repiti yo manada beses con ese maga palabra, gendeh ba dol maga palabra bulao lang se? Ya puede tambien yo le con el maga palabra de Jesus: “No ustedes llama ni maskin con quien aqui na mundo tata de ustedes, cay uno lang el de ustedes Tata.” (Mateo 23:9) Poreso ya pensa tambien yo, ‘Porque man yo y el de mio maga uban Catolico ta llama con el maga padre “Father”?’

 Cuando ya puede yo le con el libro de Santiago na Biblia, alla yo ya principia pensa si cosa yo ta hace con el de mio vida. Na capitulo 4, si Santiago ya escribi: “No sabe ba ustedes que el maga amigo del mundo, contrario sila del Dios? Poreso, si quien quiere queda amigo del mundo, contrario ya le del Dios.” (Santiago 4:4) Mas ya puede afecta conmigo el versiculo 17: “El gente quien ta puede hace el bueno, pero gendeh le ta hace, ta comete pecado.” Poreso, ya llama yo con el de mio maga hermana y ya habla kanila que descanza ya yo trabaja na casino hotel cay gendeh mas conmigo aceptable el maga cosas que ta hace aqui, incluido el juego na sen y pagka-hambriento.

 Quierre yo tene buen relacion con Dios, con el de mio mayores, de mio hermano y maga hermana. Poreso, ya decidi yo que hace simple el de mio vida para mas tene yo tiempo para hace con este. Pero, gendeh facil hace con este maga cambio. Por ejemplo, quierre conmigo man promote na de mio trabajo na casino hotel y hace doble o triple pa gane el de mio sueldo. Pero despues reza acerca con ese, ya decidi yo que gendeh ya se el vida para conmigo. Yan resign yo na de mio trabajo, ya cambia na garaje del de mio nana y ya principia un diutay negocio que tan laminate maga menu de restaurant.

 Maskin pa ya ayuda conmigo el Biblia para hace maga mas justo decision, gendeh siempre yo ta anda na maga miting del maga Testigo de Jehova. El de mio maga hermana ya pregunta conmigo si cosa yo no quierre na maga Testigo. Y ya contesta yo: “Por causa se cay el de ustedes Dios, si Jehova, ta separta con el maga familia. El tiempo lang que puede yo man junto con el familia amo durante el Pascua y cumpliaño pero gendeh ustedes ta celebra con ese.” El de mio un hermana ya llura y ya pregunta conmigo: “Onde tu na otro maga dia del año? Bien quierre kame man junto contigo na ese maga tiempo. Pero, quierre lang tu man junto kanamon durante na ese maga celebracion—y por causa lang cay obligao tu.” Ya afecta gayot conmigo el cosa le ya habla y ya principia yo llura junto con ele.

 Cuando ya entende yo que mali yo y ta ama gayot el maga Testigo de Jehova con el diila familia, ya decidi yo que atende na uno del maga miting na Kingdom Hall. Alla ya conoce yo con Kevin, un persona quien ta enseña el Biblia con otro y ya principia le man Bible study conmigo.

 Tiene balance y simple vida si Kevin y el de suyu mujer poreso ta puede sila dale grande tiempo para ayuda con otro para entende con el Biblia. Tiene sobra na diila incuntrada poreso ta puede sila viaja na Africa y Central America, donde ta ayuda sila construi maga branch para na maga Testigo de Jehova. Bien alegre sila y ta ama con uno y otro. Ya pensa yo, ‘Quierre yo ansina clase de vida.’

 Ya dale conmigo mira un video si Kevin acerca na alegria de aquellos quien ta sirvi como maga misionario y ya decidi yo que quierre tambien yo hace con ese. Del 1995, despues estudia enbuenamente con el Biblia por seis meses, ya bautiza yo como uno del maga Testigo de Jehova. En vez de pidi riqueza con Dios, ya principia yo reza: “No conmigo hace pobre o rico.”—Proverbio 30:8.

 Ahora, deverasan ya yo rico—gendeh na financial, sino na espiritual. Ya conoce yo con el de mio amable mujer, si Nuria, na Honduras y ya sirvi kame junto como maga misionario na Panama y Mexico. Deverasan gayot el cosa ta habla el Biblia: “El bendicion de Jehova amo el ta hace rico con el un persona y gendeh Le omenta dolor con ese”!—Proverbio 10:22.