“Nuay yo expecta que puede yo hace bien manada cosas para con Jehova.” Este el cosa ya habla si Gwen que de England, acerca na de suyu experiencia que sirvi onde tiene mas grande necesidad na Albania. a

 Uno si Gwen del manada Testigo quien ya cambia na Albania para ayuda busca con el “maga precioso cosas del todo maga nacion.” (Haggeo 2:7) Cosa ya motiva con este maga predicador? Cosa maga cambio sila ya hace para puede cambia alla? Y cosa ya puede ayuda kanila para aguanta maskin pa na maga dificultad?

 Igual lang el razon del todo maga publisher quien ya anda para sirvi na Albania: Ta ama sila con Jehova y quierre sila ayuda con otro que conoce con ele.

 Antes cambia, ya hace sila maga cambio para puede sila hace mas na ministerio y ya puede este ayuda kanila para enfrenta con el maga dificultad na otro nacion. Si Gwen ya habla: “Una, ya suporta yo na un Albanian-speaking group na diamon lugar. Despues, ya visita yo na Albania para atende un convencion. Na uliji, ya bira yo alla y ya esta por corto tiempo para mas puede aprende con el lengguaje.”

 Cuando 23 si Manuela, ya cambia le na otro region na diila nacion, na Italy, para ayuda na un diutay congregacion. Ele ya habla: “Ya sirvi yo alla por cuatro año. Despues, ya sabe yo que bien grande el necesidad na Albania. Poreso, yan pioneer yo alla por cuanto meses.”

 Siete año lang si Federica cuando ya oi le un report acerca na Albania na un convencion. Ele ya habla: “El hermano quien ya dale con el report ya habla que el maga publisher na Albania ta puede principia manada Bible study y ta atende na miting el maga interesao. Ya habla yo con el de mio mayores que quierre yo anda na Albania. Ya espanta sila na cosa yo ya habla pero ya habla conmigo si Papang, ‘Reza acerca con ese y si querrer se de Jehova, hay oi le contigo.’ Cuanto meses despues, ya invita con el diamon familia que sirvi na Albania!” Manada año ya el ya pasa y casao ya ahora si Federica con Orges. Ta sirvi sila full-time na Albania.

 Despues man retiro si Gianpiero, ya cambia le na Albania junto con el de suyu mujer, si Gloria. Ele ya habla: “Ya hace kame engranda con el diamon maga anak na Italy. El tres kanila ya cambia na otro nacion para sirvi onde tiene necesidad. Ya puede gayot motiva kanamon el un articulo na Watchtower que tiene titulo ‘Can You Step Over Into Macedonia?’ Ya discuti kame si paquemodo kame puede usa con el de mio pension para sirvi na Albania.”

 Este maga publisher necesita plaña adelantao y hace maga cambio para puede sila cambia na otro lugar. (Lucas 14:28) El uno na maga cosas que necesita sila pensa amo si paquemodo sila suporta con el diila mismo cuerpo na financial. Cuando na England pa le, si Gwen que ya menciona enante, ya cambia na casa del de suyu hermana para puede le man save sen. Si Sophia y Christopher que de England tambien ya habla: “Ya vende kame con el diamon coche y cuanto furniture. Plano diamon que esta na Albania maskin un año lang.” Pero, ya puede sila esta alla mas tarda.

 El cuanto maga publisher ta esta na Albania por cuanto meses, ta bira na diila nacion para trabaja y man save sen, y despues, ta bira na Albania. Ese el cosa ya hace si Eliseo y Miriam. Si Eliseo ya habla: “El lugar onde ya engranda si Miriam na Italy amo un tourist spot y bien facil que incuntra temporario trabajo alla. Ta anda kame na ese lugar y ta trabaja por tres meses poreso tiene kame savings para puede bira na Albania y esta alla por sunod nueve meses. Este el cosa kame ya hace por cinco año.”

 Despues cambia, este maga publisher necesita man adjust na diila nuevo circumstancia. Pero el consejo y ejemplo del maga Testigo que de alla ya puede ayuda para puede sila enfrenta con el maga dificultad. Si Sophia que ya menciona enante ya habla: “Si winter, bien frio na Albania compara na cosa yo yan anad na diamon lugar. Poreso, ya sigui yo si paquemodo ta muda el maga hermana alla.” Si Grzegorz y de suyu mujer, si Sona, que de Poland, ya cambia para na bonito lugar de Prizren, na Kosovo. b Si Grzegorz ya habla: “Bien humilde, bueno y paciencioso el maga publisher. Ta ayuda sila kanamon para aprende con el lengguaje y na otro pa maga cosas. Por ejemplo, ta habla sila kanamon si onde maga tienda el barato el precio y ta enseña sila si paquemodo cumpra na tianggue.”

 Ta puede ayuda con aquellos quien ta cambia na otro nacion si man amigo sila con el maga Testigo alla y aprende acerca con el diila background. Si Sona ya habla: “Ya puede yo mira si paquemodo de poderoso el amor de Jehova. Mas ya queda fuerte el de mio fe cuando ya puede yo mira si paquemodo el maga hermano ya cambia con el diila creencia y el diila vida cuando ya sabe sila acerca con Jehova. Na congregacion, ya puede kame sinti que importante kame y ya puede tambien kame mira si paquemodo kame puede ayuda. Ta sirvi kame junto con el maga hermano y hermana quien ya queda diamon maga amigo y amiga.” (Marcos 10:29, 30) Si Gloria ya habla: “Ya puede yo conoce manada maga hermana quien ya experiencia violente oposicion estaba na maga miembro del diila comunidad que contra na maga Testigo. Ya puede gayot afecta conmigo cuando ya puede yo mira si paquemodo de grande el diila amor para con Jehova.”

 Este maga publisher tiene tambien el oportunidad para aprende maga importante leccion que posible gendeh sila puede aprende si ya esta sila na diila nacion. Por ejemplo, ta puede sila mira que si hace sila un cosa para hace pa mas para con Jehova maskin pa dificil se para hace, ta dale se alegria kanila. Si Stefano ya habla: “Na diamon nacion, ta predica kame por medio na intercom poreso corto lang el de mio maga presentacion. Pero el maga Albanian quierre-quierre dura man cuento, especialmente mientras ta toma cafe. Ciendo huyain yo, del primero no sabe yo si cosa habla. Pero mientras ta pasa el tiempo, ya aprende yo tene personal interes na maga gente y man enjoy man cuento kanila. Mas alegre ya yo ahora na predicacion.”

 Si Leah ya cambia para na Albania estaba na United States junto con el de suyu marido, si William. Ele ya habla: “Desde ya sirvi kame aqui, manada kame cosa ya aprende. Mas ya aprende kame si paquemodo queda hospitable, respetoso y tene buen amistad con otro! Ya aprende kame maga nuevo manera para predica, explica usando el Escritura y expresa con el diamon maga opinion.” Si William ya habla: “Mayoria de aquellos quien ta visita na Albania ta gusta gayot con el maga aplaya aqui. Iyo, quierre-quierre yo man hiking na Albanian Alps. Pero el cosa gayot yo ta gusta aqui amo el maga gente! Tiene maga barrio na diamon teritorio que ta puede lang kame anda predica durante el maga especial campaña. Si ta anda kame alla, tiene vez ta alcanza kanamon entero dia para man cuento na cuanto familia lang.”

 El ta dale gayot alegria con este maga publisher amo si ta puede sila mira que ta acepta el maga gente con el buen noticia. (1 Tesalonica 2:19, 20) Si Laura, quien ya cambia para na Albania como un joven single hermana, ya habla: “Ya sirvi yo por corto tiempo na Fier. Adentro lang na dos y media año, 120 ya el ya queda cualificao para predica! Bible study de mio el 16 kanila!” El otro hermana que si Sandra ya habla: “Ya predica yo con el un mujer quien ta trabaja na tianggue. Ya queda le un Testigo y ya bira na diila barrio. Cuando yan cuento kame, ya sabe yo que ya puede le principia 15 Bible study!”

 El cuanto maga publisher quien ya cambia na Albania manada año ya el ya pasa talla siempre y bien alegre na diila servicio. Tiene vez ta espanta ya lang sila si ta puede sila oi que aquellos con quien sila ya predica de antes ya acepta con el verdad. (Eclesiastes 11:6) Si Christopher que ya menciona enante ya habla: “Ya puede yo man cuento con el un hombre con quien yo ya puede principia man Bible study cuando nuevo pa lang yo ya llega na Albania. Alegre yo cay ya acorda pa le con el maga cosa kame ya discuti de antes acerca na Biblia. Ahora, ele y el de suyu mujer maga bautizao siervo ya de Jehova.” Si Federica que ya menciona enante ya habla: “Na un congregacion, tiene un hermana quien ya atraca conmigo y ya pregunta si ta acorda pa yo con ele. Ya habla le que ya predica yo con ele nueve año ya el ya pasa. Cuanto tiempo despues yo cambia para na otro ciudad, ya principia le man Bible study y ya progresa para na bautismo. Pensaba yo nuay buen resulta el diamon maga primer año de servicio na Albania. Mali gale yo!”

 El maga hermano y hermana quien ya cambia na Albania o Kosovo ta rindi gayot gracias con Jehova cay ya puede sila mira si paquemodo le ya bendici con el diila maga esfuerzo y ya dale kanila alegre vida. Despues del manada año na Albania, este el cosa ya habla si Eliseo acerca na de suyu experiencia: “Como maga gente, posible pronto lang kita creé que puede kita tene seguridad si tiene kita el maga cosas que ta pensa el mundo que puede dale seguridad. Pero, gendeh se deverasan. Sino, el maga principio de Jehova el puede dale kanaton proposito na vida y seguridad. El de mio servicio na lugar onde tiene grande necesidad ta ayuda conmigo para acorda con ese pirmi. Ta sinti yo que tiene yo valor y ta aprecia conmigo. Mas pa, tiene yo maga deverasan amigo alrededor conmigo quien ta hace tambien esfuerzo para na semejante maga goal.” Amo tambien se el cosa ta sinti si Sandra: “Cuando ya cambia yo na lugar onde tiene mas grande necesidad, ya sinti yo que ya dale conmigo si Jehova un oportunidad para alcanza con el un cosa que ya dura ya yo ta desea—para queda un misionario. Nuay gayot yo man mahay que ya cambia yo na Albania. Mas ya queda gayot yo alegre.”