Ocupao el maga Testigo de Jehova na Bulgaria para enseña con otro el verdad acerca con Dios y con el de suyu Palabra, el Biblia. Para puede ayuda kanila, manada maga Testigo estaba na otro nacion el ya cambia na Bulgaria desde el año 2000. Cosa maga dificultad sila ya enfrenta cuando ya cambia sila na otro nacion para predica? Porque gendeh sayang el diila esfuerzo? Este el cosa ya habla el cuanto quien ya cambia na Bulgaria.

 “Desde antes, goal ya diamon que sirvi na otro nacion donde tiene mas grande necesidad,” ya habla si Darren quien ta queda na England. “Despues kame casa de Dawn, ya cambia kame na London para enseña el Biblia na Russian lengguaje. Cuanto beses ya kame ya hace plano que cambia na otro nacion pero por cuanto razon, gendeh kame ta porsigui. Pensaba kame gendeh mas este kame puede hace. Pero, ya ayuda kanamon el diamon un amigo para mira que ya cambia el diamon circumstancia y puede ya kame alcanza el diamon goal.” Si Darren y Dawn ya principia pensa si onde nacion sila puede cambia donde tiene mas grande necesidad para na maga predicador. Del 2011, ya cambia sila na Bulgaria.

 El alegria de aquellos quien ya cambia na otro parte del mundo ya anima con el cuanto quien na primero, nuay goal que sirvi na otro nacion. “Ya conoce yo maga Testigo quien alegre ta sirvi na South America y na Africa,” ya habla si Giada quien ta queda na Italy junto con el de suyu marido, si Luca. “Ya puede gayot afecta conmigo el diila alegria y el maga experiencia que ya relata sila. Ya puede este ayuda conmigo para pensa acerca na de mio maga espiritual goal.”

 Si Tomasz y Veronika ya cambia na Bulgaria estaba na Czech Republic del 2015 junto con el diila dos anak, si Klara y Mathias. Cosa ya motiva kanila para cambia? Si Tomasz ya habla: “Ya considera kame enbuenamente con el ejemplo del otro quien ya cambia na otro nacion, incluido el diamon maga pariente y ya medita con el cuanto del diila maga experiencia. Grande gayot el efecto kanamon del diila alegria y yan cuento kame na casa acerca con este.” Ahora, este familia alegre ta predica na diila nuevo teritorio na Montana, un ciudad na Bulgaria.

 El otro Testigo quien ya cambia na Bulgaria amo si Linda. Ele ya habla: “Cuanto año ya el ya pasa, ya visita yo na Ecuador y ya conoce con el cuanto quien ya cambia alla para predica. Poreso, ya puede yo pensa que baka un dia puede tambien yo sirvi onde tiene grande necesidad.” Si Petteri y Nadja, un man maridable estaba na Finland, ya medita tambien con el ejemplo del otro. Ya habla sila: “Na diamon congregacion, tiene kame maga cuanto experienciao publisher quien ya cambia na otro lugar para ayuda con el maga gente aprende acerca na Biblia. Alegre sila pirmi tan cuento acerca na diila experiencia na ese clase de servicio. Ya habla sila que amo quel el de con todo alegre maga año na diila vida.”

 Importante para con aquellos quien quierre sirvi na otro nacion que plaña enbuenamente. (Lucas 14:28-30) “Cuando ya principia yo mas serioso considera que sirvi na otro nacion,” ya habla si Nele, estaba na Belgium, “ya reza yo y ya busca maga articulo acerca con ese na diaton maga publicacion. Ya estudia yo con ese y ya pensa si cosa yo necesita hace para queda preparao.”

 Si Kristian y Irmina, estaba na Poland, ya queda na Bulgaria por mas de nueve año. Ya realiza sila que ya puede gayot ayuda kanila cay ya suporta sila con el un Bulgarian group na Poland antes sila cambia. Este grupo ya anima y ya ayuda kanila para aprende con el lengguaje. Si Kristian y Irmina ya habla: “Ya realiza kame que bonito gayot si hace tu available con el de tuyu mismo cuerpo y mira si paquemodo dale si Jehova el de tuyu maga necesidad. Si habla tu con Jehova, ‘Taqui yo! Imbia conmigo!’ puede tu hace maskin el maga cosas que pensaba tu imposible.”—Isaias 6:8.

 Para puede sila prepara y recuji sen, si Reto y Cornelia, un man maridable estaba na Switzerland, ya decidi que hace mas simple con el diila vida. “Un año antes kame cambia,” ya habla sila, “ya anda kame na Bulgaria por un semana para tene idea si cosa clase el vida alla. Yan cuento kame alla con el dos experienciao misionario quien ya dale kanamon practical consejo.” Ya aplica si Reto y Cornelia con aquel maga sugestion y ahora, ta sirvi ya sila na Bulgaria por mas de 20 año.

 Aquellos quien ta cambia na otro nacion necesita man adjust na diila nuevo circumstancia y posible ta enfrenta maga dificultad. (Maga Actividad 16:9, 10; 1 Corinto 9:19-23) Para con el manada, yan dificil gayot sila aprende un nuevo lengguaje. “Quierre-quierre gayot kame dale maga comento na maga miting na diamon mismo maga palabra,” ya habla si Luca que ya menciona enante. “Pero por cuanto tiempo, dificil para kanamon man maridable que prepara maskin un bien simple comento na lengguaje Bulgarian! Dol ya queda kame maga bata otravez. Gane, el maga comento del maga bata mas bonito pa contra kanamon.”

 Si Ravil, de Germany, ya habla: “Dificil aprende nuevo lengguaje. Pero pirmi yo ta pensa, ‘No sobra queda serioso. Re lang si man kamali.’ Ta mira yo con el maga dificultad, gendeh como problema, sino como parte del de mio sagrao servicio para con Jehova.”

 Si Linda que ya menciona enante, ya habla: “Gendeh yo bueno aprende nuevo lengguaje. Gendeh facil aprende con el lengguaje Bulgarian y manada beses yo ya pensa que descanza ya lang. Hay queda tu triste si gendeh tu ta puede man cuento con el maga gente y si gendeh tu ta entende con el cosa sila ta habla. Para esta fuerte el de mio espiritualidad, ta estudia yo na lengguaje Swedish. Despues del cuanto tiempo, na ayuda del de mio maga amable hermano y hermana, ya puede yo aprende con el lengguaje.”

 El otro dificultad que ta enfrenta sila amo que tan homesick sila. Aquellos quien ya cambia na otro lugar ya deja con el diila maga pariente y maga amigo y amiga. “Del primero, ya queda yo triste,” ya habla si Eva quien ya cambia na Bulgaria junto con el de suyu marido que si Yannis. “Para puede enfrenta con ese, regular kame tan cuento con el diamon maga amigo, amiga y familia na diamon lugar, y ya pricura tambien kame busca maga nuevo amigo y amiga aqui.”

 Tiene pa otro maga dificultad. Si Robert y Liana quien ya cambia estaba na Switzerland ya habla: “Bien dificil para kanamon el lengguaje, el nuevo cultura y el bien frio clima aqui.” Pero cay ya esta positivo y alegre este man maridable, ya puede sila sirvi na Bulgaria por 14 año ya.

 Ta anima si Lilly con otro que predica onde tiene grande necesidad. “Ya puede yo conoce con Jehova na manera que nuay era iyo puede experiencia si ya esta lang yo na diamon nacion,” ya habla le. “Ciendo ocupao yo ayuda con otro, ya puede este ayuda conmigo para progresa na espiritual y ya dale este conmigo alegria y satisfaccion.” Yan uyun con ese si Ravil, el de suyu marido. Ele ya habla: “Este el de con todo alegre vida cay ya dale este conmigo oportunidad para conoce con el maga activo hermano y hermana estaba na diferente maga nacion quien bien experienciao enseña con el verdad. Manada gayot yo cosa ya aprende kanila.”

 Cay preparao y available el manada, ya tiene buen resulta el predicacion del “Buen Noticia acerca del Reino . . . na entero mundo.” (Mateo 24:14, El Nuevo Testamento na Chavacano) Cay conforme sila man voluntario, aquellos quien ya anda na Bulgaria ya puede mira si paquemodo si Jehova ya cumpli con el deseo del diila corazon y ya bendici con el todo diila plano.—Salmo 20:1-4.