Si Madián y Marcela tiene comfortable vida na Medellín, Colombia. Grande el sueldo de Madián poreso ta queda sila na un bonito apartment. Pero, tiene cosa ya manda move kanila para examina otravez con el diila maga prioridad como maga siervo de Dios Jehova. “Del 2006, ya atende kame con el ‘Keep Your Eye Simple’ especial asemblea. Manada del maga talk ya anima con el maga quien ta atende que hace simple con el diila vida para puede mas sirvi con Dios,” ya habla sila. “Despues del asemblea, ya realiza kame que gendeh se amo el cosa kame ta hace. Pirmi kame ta cumpra maga cosas y tiene kame grande debe.”

 Despues quel, ya principia si Madián y Marcela hace simple con el diila vida. “Ya menora kame con el diamon maga gasto,” ya habla sila. “Ya cambia kame na un mas diutay apartment, ya vende con el diamon coche y ya cumpra un motor.” Mas pa, nuay mas sila anda na maga mall donde posible man engaño sila cumpra manada cosas. Ya principia sila dale mas manada tiempo para man cuento con el maga gente acerca na Biblia. Y yan junto sila con el diila maga amigo y amiga quien activo ta sirvi con Dios Jehova como maga special pioneer. a

 Nuay dura, ya decidi si Madián y Marcela que hace pa mas na ministerio y ya cambia sila na un diutay congregacion que tiene grande necesidad. Para puede cambia lugar, yan resign si Madián na de suyu trabajo. Ya pensa el de suyu supervisor que loco ya le. Poreso, ya pregunta con ele si Madián: “Tiene man tu manada sen pero alegre ba tu?” Ya admiti el supervisor que gendeh le alegre cay tiene le manada problema que gendeh le ta puede solva. Despues, ya habla si Madián con ele: “Na vida, gendeh importante si paquemodo de manada el de tuyu sen. El importante amo si cosa contigo deverasan ta hace alegre. Alegre kame del de mio mujer si ta enseña kame con el maga gente acerca con Dios y quierre kame que queda mas alegre poreso quierre kame dedica mas tiempo na este trabajo.”

 Ya tiene deverasan satisfaccion y alegria si Madián y Marcela cay ya pricura sila alcanza maga espiritual goal. Na 13 año que ya pasa, ya sirvi sila na maga congregacion que tiene grande necesidad na northwest Colombia. Y ahora, alegre sila ta sirvi como maga special pioneer.