Si Artur, un circuit overseer na Armenia, ya visita na un congregacion del maga Testigo de Jehova. Ya puede le sabe que nuay pa sila participa na public witnessing donde ta usa maga cart que tiene maga literatura de Biblia. Para anima kanila que hace este, si Artur y el de suyu mujer, si Anna, junto con el otro Testigo que si Jirayr, ya pone un literature cart na pueblo. Ya iscuji sila un lugar donde manada gente el quien ta pasa.

 Ya queda dayun interesao el maga quien ta pasa y ya saca literatura. Pero nuay tarda, ya nota tambien con este cart el maga quien tan contra. Ya atraca el dos padre con el cart y el uno kanila ya patea con ese. Despues, ya palmadia le con Artur y gane, ya cae el antipara de este na tierra. Si Artur, Anna y Jirayr ya pricura hace calma con el maga padre. Pero, el maga padre ya pisa-pisa con el cart y ya hace calayat con el maga literatura. Despues amenaza y habla mal palabra con el maga Testigo, ya sale sila.

 Si Artur, Anna y Jirayr ya anda na estacion de polis para man report con el incidente. Ya explica sila si cosa ya sucede y ya puede sila man cuento unrato acerca na Biblia con el cuanto maga polis y otro maga gente quien ta trabaja alla. Despues, ya lleva kanila tres na oficina del alto oficial alla. Del primero, quierre lang le sabe si cosa ya sucede. Pero cuando ya sabe le que nuay imbisti si Artur cuando ya palmadia con ele maskin pa un grande gente le, nuay mas pregunta el oficial acerca na caso sino ya principia le pregunta acerca na creencia del maga Testigo. Gane, cuatro hora sila yan cuento! Bien bilib el oficial na cosa le ya oi poreso ya habla le: “Bonito se de ustedes religion! Quierre tambien yo queda miembro!”

 Pagka-alamañana, cuando na cart ya tambien si Artur, ya atraca con ele el un gente quien ya puede observa si cosa ya sucede del ya pasa dia. Ya comenda el gente con Artur cay ya esta le calma y nuay imbisti. Ya habla pa el gente que por causa na cosa le ya mira, ya perde el de suyu respeto na maga padre.

 Aquel noche, el alto oficial ya manda anda con Artur na estacion de polis. Pero en vez de discuti acerca con el caso, ya pregunta ya tambien le acerca na Biblia. Yan junto tambien kanila el otro dos polis.

 Pagka-alamañana, ya visita otravez si Artur con el alto oficial para dale con ele mira cuanto maga video que base na Biblia. El oficial ya llama con el otro maga polis para mira tambien con el maga video.

 Por causa na gendeh buen conducta del maga padre, ya puede predica con el manada polis por primer vez. Como resulta, ya tiene sila buen impresion con el maga Testigo de Jehova.