Si Maud ta queda na France y ta trabaja na un escuela donde ta asisti le con el maga disabled bata durante el clase. Na un clase, el maga estudiante ta aprende acerca na Holocaust y na Nazi concentration camp. Tiene tela que ya cusi na uniforme del maga preso na ese maga campo. El color y forma del tela ta indica si porque yan preso el persona.

 Acerca con el purple triangle na uniforme del cuanto preso, el maestro ya habla: “Siguro, tiene ansina na diila uniforme cay maga homosexual sila.” Despues del clase, yan cuento si Maud con el maestro y ya explica que ya usa el maga Nazi con el purple triangle para identifica con el maga Testigo de Jehova. a Ya habla si Maud con el maestro que hay lleva le cuanto material acerca con ese topico. Ya conforma el maestro y ya pidi con Maud que dale mira ese informacion con el maga estudiante.

 Na otro clase na aquel mismo topico, el un maestra ya usa un chart que ta dale mira el diferente maga simbolo na uniforme del maga preso. El chart claro ta dale mira que el purple triangle ta identifica con el maga Testigo de Jehova. Despues del clase, ya dale si Maud con este maestra cuanto material acerca con ese topico. Ya acepta se el maestra y ya habla con Maud que puede este ele presenta con el maga estudiante.

 Ya prepara si Maud que dale presentacion por 15 minuto na primer clase pero cuando tiempo ya para dale el de suyu presentacion, ya habla con ele: “Puede tu usa con el entero hora.” Na principio, ya dale mira si Maud con el un documentary video acerca na persecucion del maga Nazi con el maga Testigo de Jehova. Cuando ya habla el documentary que el maga Nazi ya hace separta con el 800 Testigo bata na diila maga mayores, yan pause si Maud con el video y ya le con el experiencia del tres de ese maga bata. Na fin del de suyu presentacion, ya le si Maud con el ultimo carta del un 19 año Testigo de Austria que si Gerhard Steinacher que ya escribi le para con el de suyu maga mayores del 1940 cuanto hora antes con ele mata el maga Nazi. b

 Ya dale semejante presentacion si Maud na segundo clase. Por causa na coraje de Maud, aquel maestro y maestra ta menciona ya ahora con el maga Testigo de Jehova si ta enseña sila acerca con el maga victima del maga Nazi concentration camp.