Del 2017, tiene 12 maga Testigo de Jehova quien ya viaja sale na Mosquito (Miskito) Coast, un region na Nicaragua, muntao na un bangca que ya nombra Sturi Yamni. El uno na diila maga uban, si Stephen, ya acorda, “Proposito diamon que anima con el un diutay grupo del maga Testigo de Jehova quien ta queda na un lugar que ralo lang ta puede anda y ayuda kanila predica con el buen noticia na diila ancho teritorio.”

 Ya principia sila el diila 200 kilometro viaje sale na Pearl Lagoon para na Río Grande de Matagalpa. Nuay sila idea que el nombre del diila bangca que quierre decir “Buen Noticia” na lengguaje Miskito, hay tene grande efecto con el maga gente quien ta queda cerca na rio. Despues del maga 12 hora viaje, puera con el noche que ya descanza sila, ya puede sila llega na diila destinacion—el comunidad de La Cruz de Río Grande. Alegre kanila ya hace encuentro el seis maga Testigo de Jehova quien ta queda alla.

 Pagka-denoche, ya tene un fuerte tifun. Como resulta, despues lang del cuanto hora ya subi el agua na rio na ese lugar por dos dia. Ya entra el agua na Kingdom Hall y na manada casa na La Cruz, y el maga hermano quien ya anda visita alla ya ayuda con el maga residente para evacua. Mayoria kanila ya esta na dos andana casa del un Testigo de Jehova por dos noche.

 Na ika-tres noche, el mayor de La Cruz ya anda con el maga Testigo de Jehova quien ya visita na diila lugar para pidi ayuda. Ciendo el Sturi Yamni lang el solamente bangca que puede usa para viaja na maga rio que yan avenida, ya pidi el mayor que hace hatud con el un grupo de maga relief worker na otro comunidad para asisti con aquellos quien ya sale afectao. Alegre ayuda kanila el maga Testigo de Jehova.

 Pagka-alamañana, tres Testigo el ya sigui con el un grupo de maga relief worker. “Bien fuerte el corentazo aquel tiempo,” ya cunta si Stephen. “Tiene maga grande palo tan lutao y tiene maga grande remolleno na rio.” Maskin pa na quel maga dificil situacion, ya puede siempre llega el bangca na tres comunidad.

 El tres Testigo ya usa con el oportunidad para dale comforta con el maga residente. Ya distribui sila maga copia de 2017 issue de Awake! que tiene titulo “When Disaster Strikes—Steps That Can Save Lives.”

 Ya aprecia gayot el maga residente quien ta queda cerca na rio con el practical y espiritual ayuda que ya ricibi sila estaba na maga Testigo de Jehova. “Preparao sila ayuda na dificil situacion,” ya habla el cuanto maga residente. El otro ya habla: “Tiene sila deverasan amor na projimo.” Por causa cay ya puede sila mira el esfuerzo del maga Testigo para ayuda con el diila maga uban y con otro, manada residente el mas conforme ya oi con el mensaje estaba na Biblia.