Si Bryn, quien ta queda na North Carolina, U.S.A., amo un miembro del Hospital Liaison Committee que ta ayuda si cosa necesita el maga paciente que maga Testigo de Jehova.

 Por causa na COVID-19 pandemic, manada hospital el gendeh ta ricibi visita. Ya llama si Bryn con el director quien in-charge na hospital para sabe si paquemodo ele puede dale espiritual suporta con el maga Testigo paciente.

 Ya puede man cuento si Bryn con el assistant del director. Ciendo gendeh le puede visita, ya pregunta si Bryn si puede ba dale el de suyu phone number con el maga Testigo paciente para puede le man cuento kanila. Y ya conforma el hospital.

 Despues, ya puede pensa si Bryn acerca con el maga quien ta trabaja na hospital. Ya habla le con el assistant que ta aprecia gayot le con el trabajo que ta hace sila y que ojala tiene sila buen salud. Ya menciona tambien le que ya puede ele le que el todo maga gente, especialmente el maga quien ta trabaja na hospital, ta experiencia grabe stress por causa na pandemic.

 Yan uyun el assistant que por causa na COVID-19, mas ta queda grabe el stress na hospital.

 Despues, ya habla si Bryn: “El diamon website tiene maga informacion que puede ayuda con el maga gente si paquemodo enfrenta con el stress. Si anda tu na jw.org y man type ‘stress’ na Search field, puede tu incuntra cuanto articulo que puede ayuda con ustedes alli.”

 Mientras tan cuento sila, ya abri el assistant con el website, yan type con el palabra “stress” na Search field y ya puede mira con el maga articulo. “Bale man este!” ya habla le. “Dale yo este mira con el director. Puede gayot este ayuda con el maga quien ta trabaja aqui y con otro. Man print yo con este y dale copia kanila.”

 Cuanto semana despues, ya puede man cuento si Bryn con el director quien ya habla que ya puede sila abri con el website y yan print con el maga articulo acerca na stress y na otro pa maga topico. Ya dale este sila con el maga nurse y con el otro quien ta trabaja na hospital.

 Ya habla si Bryn: “Ya rindi conmigo gracias el director na trabajo que ta hace kita y na maga bonito articulo. Ya habla le que ya puede gayot quel ayuda kanila.”