Si Yanmei, un Testigo na Asia, ya ayuda con el un bulak mujer que el nombre Mingjie para cruza na calzada. a Si Mingjie ya habla: “Gracias! Ojala, bendici contigo el Dios!” Despues de aquel, ya pregunta si Yanmei con Mingjie si quierre ba le que discuti junto con el Biblia. Despues de cuanto tiempo, ya habla si Mingjie que todo el dia le ta reza que ojala hay guia con ele na deverasan congregacion del Dios. Porque le ya reza ansina?

 Ya explica si Mingjie que del 2008, ya acepta le un invitacion estaba na un bulak amiga para atende na un iglesia para na maga gente quien tiene diferencia na cuerpo. Despues oi con el sermon, ya pregunta si Mingjie con el padre si onde libro le ya man base. Ya habla el padre con ele que estaba quel na Biblia, el deverasan Palabra del Dios. Ya tiene fuerte deseo si Mingjie que le con ese. Poreso, ya saca le un Biblia na Chinese braille y ya le con el 32 volume adentro de maga seis meses. Mientras ta continua si Mingjie le con el Biblia, ya realiza le que falso el doctrina de Trinidad que ta enseña el iglesia onde le ta atende y el Dios tiene nombre, Jehova.

 Ya llega el tiempo, yan luya si Mingjie por causa na conducta del maga miembro na iglesia. Ya realiza le que gendeh sila ta vivi harmonia na cosa ele ta le na Biblia. Por ejemplo, sobra comida ya lang el ta dale na maga bulak mientras el otro ta ricibi maga comida que nuevo cucido. Ya sinti duele si Mingjie con ese maga injusticia poreso ya principia le busca otro iglesia na diila lugar. Amo se el razon si porque si Mingjie ta reza que ojala puede le incuntra con el deverasan Cristiano congregacion.

 Por causa na pagka-bueno de Yanmei, ya acepta si Mingjie con el Bible study que ta ofrece le. Nuay dura, ya atende si Mingjie por primer vez na miting del maga Testigo de Jehova. Si Mingjie ya cunta: “Gendeh gayot yo ulvida con el primer miting que ya atende yo. El maga hermano y hermana yan welcome gayot enbuenamente conmigo. Ya gusta gayot yo quel. Maskin pa bulak yo, ya sinti gayot yo el deverasan amor alla.”

 Ya progresa si Mingjie y ya principia atende regular na maga miting. Alegre le particularmente canta maga Kingdom song pero dificil este para con ele cay nuay songbook na braille que puede ele le. Poreso na ayuda del congregacion, ya hace si Mingjie con el de suyu mismo songbook. Ya alcanza quel 22 hora para con ele que hace con el todo 151 cancion! Del Abril 2018, ya principia ya si Mingjie participa na ministerio y ya dale maga 30 hora cada mes na predicacion.

 Para ayuda con Mingjie prepara para na de suyu bautismo, ya hace si Yanmei un audio recording del maga pregunta y maga versiculo del Biblia del libro Organized to Do Jehovah’s Will. Del Julio 2018, ya bautiza si Mingjie. Ele ya habla: “Ya gusta gayot yo el amor que ya dale mira el maga hermano y hermana na aquel convencion. Ya puede gayot yo llura cay ahora parte ya yo del deverasan congregacion del Dios.” (Juan 13:34, 35) Ahora si Mingjie, determinao que dale mira igual amor que ya ricibi le y ta sirvi como un full-time evangelizador.