Si Marta, quien uno del maga Testigo de Jehova na Guatemala, ta aprende lengguaje Kekchi para puede predica con el mensaje del Biblia na maga gente quien ta converza na ese lengguaje. Un dia, ya puede le mira con el un hombre quien ta sale na hospital. Na de suyu ichura, ya suspecha si Marta que estaba le na un barrio de Kekchi na parte monte donde ralo lang ta puede predica el maga Testigo de Jehova. Ya atraca le con el hombre y ya converza con ele na de suyu limitao Kekchi lengguaje.

 Ya ofrece Bible study si Marta con el hombre. Alegre le ya acepta con ese pero ya habla le con Marta que nuay le sen para paga con ese. Ya explica si Marta que el maga Testigo de Jehova libre lang ta conduci Bible study con el maga gente. Ya habla tambien le con el hombre que puede sila estudia por medio na cell phone y puede man junto con ele el de suyu entero familia. Ya conforma el hombre. Ciendo ta puede le converza y le na Spanish, ya dale con ele si Marta un copia de New World Translation of the Holy Scriptures na Spanish lengguaje. Ya dale tambien le con el hombre un copia del libro What Does the Bible Really Teach? na Kekchi lengguaje. Pagka-sunod semana, el hombre, el de suyu mujer y el diila dos anak ya principia man Bible study junto con Marta por medio na cell phone. Dos beses na un semana sila ta estudia. “Cay gendeh yo tanto bueno converza na Kekchi,” ya habla si Marta, “ta estudia kame na Spanish y tan interpret le este con el de suyu mujer. El diila maga anak ta entende Spanish.”

 Este hombre un pastor na diila iglesia. Ya principia le enseña con aquellos quien ta atende na iglesia el cosa le ta aprende na diila estudiada. Ya gusta sila el cosa sila ya oi y ya pregunta con ele si onde le ya aprende este maga nuevo enseñanza. Cuando ya habla le kanila acerca el de suyu Bible study, uno-uno sila ya principia man junto na diila estudiada. Nuay dura, maga 15 gente el tan junto-junto cada semana para estudia junto con Marta por medio na cell phone. Ya llega el tiempo, ya pone ya sila un microfono cerca na cell phone para todo sila puede oi.

 Cuando ya habla si Marta na maga anciano na congregacion acerca con este Bible study, el uno kanila ya visita na barrio onde ta queda este maga persona. Ya invita le kanila para atende na un discurso publico que hay dale el un circuit overseer a na un barrio que un hora el distancia si de coche y dos hora si caminando. Ya conforma sila y 17 kanila el ya atende.

 Cuanto semana despues, el circuit overseer y cuanto maga Testigo ya esta por cuatro dia junto con el maga Bible study. Si aga, ta mira sila con el maga video que base na Biblia na Kekchi lengguaje que puede mira na jw.org y ta estudia sila con el brosyur Quien Ta Hace el Voluntad de Jehova Ahora? Pagka-tarde, ta mira sila maga video na JW Broadcasting. Ya arregla tambien el circuit overseer que tiene quien man Bible study con el cada uno persona.

 Durante na aquel cuatro dia, ya predica tambien el maga Testigo na maga cerca barrio de Kekchi y ya invita con el maga gente para na un especial miting. Despues del miting, ya invita el maga hermano con el 47 persona quien ya atende para estudia con el Biblia. Once familia el ya acepta con ese.

 Cuanto meses despues, ya arregla el maga anciano que hace miting na barrio del pastor cada semana. Ahora, maga 40 el regular ta atende na miting. Y cuando ya hace el maga hermano con el Comemoracion del muerte de Jesus alla, alegre sila cay 91 el quien ya atende.

 Acerca con este experiencia, si Marta ya habla: “Ta rindi gayot yo gracias con Jehova. Tiene vez, ta sinti yo que limitao lang el cosa yo ta puede hace. Pero, puede usa kanaton el Dios para ayuda con otro. Sabe le si cosa el na corazon de aquel maga persona y ya guia le kanila na de suyu maga siervo. Ta ama kanila si Jehova.”