Si Virginia que un Testigo de Jehova tiene un enfermedad que ta llama locked-in syndrome. Ya queda paralisao el de suyu cuerpo. Ta puede le mira y oi, abri y cerra con el de suyu ojos y move umpoco con el de suyu cabeza. Gendeh le ta puede converza o come. Del una, enbuenamente el de suyu salud y mafuerza. Pero un dia del 1997, ya duele el atras parte del de suyu cabeza y gendeh ta perde el dolor. Ya lleva con ele el de suyu marido na hospital y aquel noche, yan comatose le. Despues del dos semana na intensive-care unit, ya dispierta le paralisao y de ventilator. Por cuanto dia, nuay le cosa ta acorda, maskin si quien ele.

 Ya explica si Virginia si cosa sunod ya sucede. “Hinay-hinay ya bira el de mio memoria. Con todo corazon yo ya reza con Jehova. No quierre yo muri y deja con el de mio anak que engranda nuay nana. Para queda fuerte, ya pricura yo acorda manada maga texto na Biblia.

 “Nuay dura, ya hace ya sale conmigo el maga doctor na ICU. Despues del seis meses na diferente maga hospital y na un rehabilitation center, ya puede ya yo bolbe. Paralisao siempre yo y necesita yo ayuda na todo cosas. Yan luya gayot yo! Ya sinti yo que nuay yo cosa ta puede hace para con otro y con Jehova. Yan lingasa tambien yo cay gendeh yo ta puede cuida con el de mio anak.

 “Ya principia yo le maga experiencia del otro maga hermano y hermana que tiene grabe enfermedad igual conmigo y maka-bilib gayot si cosa sila ya puede hace para con Jehova. Por causa con ese, ya pricura yo queda positivo; yan focus yo na cosa yo puede hace. Antes enferma, limitao tiempo lang yo tiene para na maga espiritual actividad. Pero ahora tiene ya yo entero dia, cada dia. Poreso en vez de queda triste, yan focus yo na de mio devocion con Jehova.

 “Ya aprende yo usa computer. Ta puede yo man type usando el un software que ta puede le con el movimiento del de mio cabeza. Cansao con ese usa pero ta ayuda este conmigo para estudia con el Biblia y habla con otro el de mio esperanza por medio na carta y e-mail. Para puede yo comunica con aquellos quien junto conmigo, tiene yo un board que tiene maga letra. El persona quien junto conmigo ta insiña con el maga letra uno-uno. Si gendeh justo el letra que ya iscuji, ta hace yo arde el de mio ojos; si justo el letra que ya iscuji, ta cerra yo con el de mio ojos. Ta repiti kame con ese proceso hasta puede forma maga palabra y mensaje. Experto ya el maga hermana quien pirmi tan junto conmigo y ta puede sila predicta si cosa yo quierre habla. Tiene vez, si mali el palabra que ta puede sila pensa, ta re ya lang kame.

 “Alegre yo participa na maga actividad na congregacion. Pirmi yo tan tie in na maga miting y ahora por medio na videoconferencing. Ta puede yo man type con el de mio maga comento y tiene quien ta le con ese durante el miting. Ta puede tambien yo man tie in na diutay grupo de maga hermano y hermana para mira con el JW Broadcasting cada mes. a

 “Veinte tres año ya yo tiene locked-in syndrome. Ta sinti yo triste tiene vez. Pero cay ta reza yo, ta asocia junto con el maga hermano y hermana y ta esta activo na espiritual, ta puede yo enfrenta con ese. Gane, na ayuda del congregacion, mas de seis año ya yo auxiliary pioneer. Ta pricura yo queda un buen ejemplo para na de mio anak, si Alessandro, quien casao ya ahora y ta sirvi como un anciano. Ele y el de suyu mujer ta sirvi como maga regular pioneer.

 “Pirmi yo ta medita con el maga cosas que puede yo hace na paraiso. El primer cosa que quierre yo hace amo que man cuento con otro acerca con Jehova usando el de mio mismo voz. Quierre yo camina na canto’y rio y man enjoy mira con el alrededor. Ciendo mas de dos decada ya yo ta come por medio na un tube, excited yo puede saca un manzanas estaba na pono y morde con este. Y siempre, cay Italian yo, quierre tambien yo hace y come con el de mio maga favorito Italian comida, incluido el pizza!

 “Ya ayuda conmigo el ‘esperanza del salvacion’ para queda positivo. (1 Tesalonica 5:8, El Nuevo Testamento na Chavacano) Si ta imagina yo que talla yo na nuevo mundo, este ta dale conmigo alegria maskin tiene yo maga fisical limitacion y asigurao yo que cerca ya este perde. Quierre ya ga’t yo experiencia con el ‘deverasan vida’ que ya promete si Jehova que hay dale le kanaton por medio na de suyu Reino.”—1 Timoteo 6:19; Mateo 6:9, 10.