El maga Testigo de Jehova ta sigui con el consejo del Biblia que no contesta con el todo acusacion y gangguiada kanila. Por ejemplo, el Biblia ta habla que “el quien ta corecta con el persona quien ta gangguia hay man huya.” (Proverbio 9:7, 8; 26:4) En vez de entra na peleajan por causa na maga falso acusacion, ta usa kame diamon tiempo para hace maga cosas que ta hace alegre con Dios.—Salmo 119:69.

 Siempre, tiene “tiempo para man silencio y tiempo para converza.” (Eclesiastes 3:7) Ta contesta kame con el pregunta de aquellos quien interesao sabe el verdad pero ta evita kame con aquellos quien quierre lang man debate. Na ese manera, ta sigui kame con el maga enseñanza y ejemplo de Jesus y del maga Cristiano de antes.

•   Si Jesus nuay contesta cuando ya acusa con ele adelante con Pilato. (Mateo 27:11-14; 1 Pedro 2:21-23) Nuay tambien le contesta con el maga acusacion que burrachon daw le y tragon. Sino por medio na de suyu conducta, ya dale le mira kanila si cosa gayot el deverasan. Uyun este na principio: “Sabe kita que el sabiduria de Dios bien verdadero gayot, cay puede kita mira el resulta de ese.” (Mateo 11:19, El Nuevo Testamento) Pero na maga situacion que necesita, con animo le ya contesta con aquellos quien ta acusa con ele.—Mateo 15:1-3; Marcos 3:22-30.

   Ya enseña si Jesus con el de suyu maga siguidores que no man luya por causa na maga falso acusacion kanila. Ya habla le: “Alegre ustedes cuando, por causa dimio, ta insulta y ta persigui sila con ustedes, y ta habla todo clase de chismis contra con ustedes.” (Mateo 5:11, 12) Pero, ya habla tambien kanila si Jesus que na maga situacion donde tiene sila oportunidad para predica, hay cumpli le de suyu promesa que ‘hay dale le kanila maga palabra y saber que nuay ni uno del diila maga contrario quien hay puede resisti o contravene.’—Lucas 21:12-15.

•   Si apostol Pablo ya conseja con el maga Cristiano que evita man purpiajan con el maga tan contra kanila. Ya habla le que el diila maga discusion “noay nada y gendeh ta ayuda con el maga gente.”—Tito 3:9; Roma 16:17, 18.

•   Si apostol Pedro ya anima con el maga Cristiano que si posible, defende sila con el diila fe. (1 Pedro 3:15) Pero ya habla le que mas bueno si hace sila este, gendeh lang na palabra sino por medio na diila buen conducta. Ya habla le: “Hace el maga cosas bueno para causa con el maga gente ignorante calla la boca.”—Diamon el italic; 1 San Pedro 2:12-15, El Nuevo Testamento.