El Cuerpo Gobernante amo un diutay grupo de maga mature Cristiano quien ta dale direccion para na maga Testigo de Jehova na entero mundo. Dos el envuelto na diila trabajo:

•   Sila el quien ta mira con el preparacion del maga instruccion que base na Biblia que puede obtene na maga publicacion, miting y maga escuela del maga Testigo de Jehova.—Lucas 12:42.

•   Sila el quien ta guia con el trabajo del maga Testigo de Jehova na entero mundo. Ta dale sila maga instruccion para na trabajo predicacion y na usada del maga donacion.

 El Cuerpo Gobernante ta sigui con el ejemplo del “maga Apostol y maga Anciano” na Jerusalem del primer siglo, quien ta hace maga importante decision para na maga Cristiano congregacion. (Maga Actividad 15:2, El Nuevo Testamento na Chavacano) Igual con aquellos maga fiel hombre de antes, el Cuerpo Gobernante gendeh maga lider del diamon organizacion. Ta usa sila con el Biblia como guia y ta conoce con Jesucristo con quien ya iscuji si Jehova como el Cabeza del congregacion.—1 Corinto 11:3; Efeso 5:23.

 El maga miembro del Cuerpo Gobernante amo kanda Kenneth Cook, Jr., Gage Fleegle, Samuel Herd, Geoffrey Jackson, Jody Jedele, Stephen Lett, Gerrit Lösch, Jacob Rumph, Mark Sanderson, David Splane y Jeffrey Winder. Ta sirvi sila na diamon world headquarters na Warwick, New York, U.S.A.

 El Cuerpo Gobernante ya establicia seis committee para puede mira con el diferente aspeto del diamon trabajo. El cada miembro del Cuerpo Gobernante ta sirvi na uno o mas pa na este maga committee.

•   Coordinators’ Committee: Este el ta mira na maga cosas que tiene que hace na legal. Este tambien el ta hace maga preparacion para extende ayuda si tiene maga calamidad, si ta persigui con el maga Testigo de Jehova y si tiene pa otro maga suceso que ta afecta na maga Testigo de Jehova.

•   Personnel Committee: Este el ta mira na maga cosas que tiene que hace na maga miembro del familia Bethel.

•   Publishing Committee: Este el ta mira con el produccion y distribucion del maga literatura que base na Biblia y con el construida del maga Kingdom Hall, translation office y maga facilidad del branch office.

•   Service Committee: Este el ta mira con el trabajo predicacion del “Buen Noticia acerca del Reino.”—Mateo 24:14.

•   Teaching Committee: Este el ta mira con el preparacion del espiritual comida que puede obtene na maga miting, teocratico escuela y maga audio y video program.

•   Writing Committee: Este el ta mira con el preparacion del maga espiritual instruccion que puede le na maga publicacion, printed man o na diaton website. Ta mira tambien este con el trabajo de translation.

 Puera na maga trabajo que ta hace sila por medio na este maga committee, tan miting cada semana el Cuerpo Gobernante para considera con el maga necesidad del organizacion. Na este miting, ta discuti sila si cosa ta habla el Escritura y ta sigui con el guia del sagrao espiritu del Dios y ta pricura tiene unido decision.—Maga Actividad 15:25.

 Sila amo maga Cristiano quien ta asisti na maga committee del Cuerpo Gobernante. (1 Corinto 4:2) Tiene sila el abilidad y experiencia na trabajo que bajo na un committee donde kanila yan assign y ta atende sila na miting de este cada semana. Maskin pa gendeh sila el ta hace decision, ta dale sila maga valuable sugestion y maga necesita informacion, ta implementa con el maga decision del committee y ta mira con el resulta y progreso de este. Tan assign tambien kanila el Cuerpo Gobernante para visita con el maga hermano y hermana na otro-otro lugar o para dale maga talk na maga ocasion igual na annual meeting o Gilead graduation.