Gendeh ta celebra cumpliaño el maga Testigo de Jehova cay ta creé kame que ese celebracion gendeh aceptable con Dios. Maskin pa nuay directa habla na Biblia que malo celebra cumpliaño, puede este kanaton ayuda para examina con el cuanto aspeto de ese celebracion y para sabe si cosa el mirada del Dios con ese. Considera con el cuatro razon si porque gendeh kame ta celebra con ese y si cosa maga principio na Biblia el envuelto.

1.   El celebracion de cumpliaño estaba na maga pagano. Asegun na Funk & Wagnalls Standard Dictionary of Folklore, Mythology, and Legend, ya origina este celebracion na creencia que na cumpliaño del un persona, “el maga mal espiritu y de este influencia tiene oportunidad para ataca con el persona quien ta celebra cumpliaño” y el “presencia del maga amigo y el diila maga wish puede ayuda protege con el persona de quien cumpliaño ta celebra.” El libro The Lore of Birthdays ta habla que de antes, el maga record del cumpliaño “importante para puede sila hace horoscope” base na “misterioso ciencia de astrologia.” Ya habla tambien na libro que el “maga candela que ta usa na cumpliaño, asegun na istoria-istoria, tiene magica para cumpli con el maga cosa que ta pidi el persona.”

    Pero el Biblia ta condena con el usada del maga magica, adivinacion, espiritismo o “maga cosas semejante con esos.” (Galacia 5:19-21, El Nuevo Testamento; Deuteronomio 18:14) Gane, uno del maga razon si porque el Dios ya destroza con el nacion de Babilonia de antes amo por causa cay aquellos quien ta queda na ese lugar ta practica astrologia—un clase de adivinacion. (Isaias 47:11-15) El maga Testigo de Jehova gendeh ta dedica tiempo para estudia si onde ya origina el todo maga celebracion; pero si tiene claro guia el Escritura acerca con ese maga celebracion, gendeh kame ta ignora con ese.

2.   El maga Cristiano de primer siglo nuay celebra cumpliaño. El The World Book Encyclopedia ta habla que “el maga Cristiano del primer siglo ya considera con el celebracion de nacimiento del maskin quien como tradicion de pagano.” El Biblia ta dale mira que el maga apostoles y el otro maga siguidores con quien personal si Jesus ya enseña, ya deja un ejemplo que debe sigui el todo maga Cristiano.—2 Tesalonica 3:6.

3.   El solamente comemoracion que debe celebra el maga Cristiano amo el muerte de Jesus, gendeh el cumpliaño. (Lucas 22:17-20) Gendeh este maka-estraña, ciendo el Biblia ta habla que “mas bueno pa el dia del muerte contra na dia del nacimiento.” (Eclesiastes 7:1) Na fin del de suyu vida aqui na tierra, ya tiene buen nombre con Dios si Jesus. Por causa con ese, el dia del de suyu muerte mas importante que con el dia del de suyu nacimiento.—Maga Hebreo 1:4.

4.   Nuay menciona na Biblia que tiene siervo del Dios quien ya celebra cumpliaño. Gendeh este basta lang cay nuay con este puede escribi, ciendo tiene dos celebracion de cumpliaño que ya menciona na Biblia que ya celebra aquellos gendeh siervo del Dios. Pero tiene cosa gendeh bueno ya sucede na ese dos ocasion.—Genesis 40:20-22; Marcos 6:21-29.

 Igual na otro maga buen mayores, ta dale sila mira que ta ama sila con el diila maga anak. Ta dale sila maga regalo kanila y ta hace maga celebracion, gendeh lang una vez na un año. Ta pricura sila imita con el ejemplo del Dios, quien ta dale buen cosas con el de suyu maga siervo na tiempo que gendeh sila ta expecta. (Mateo 7:11) Gendeh tan triste el maga anak del maga Testigo de Jehova como cosa ta dale mira el siguiente:

•   “Mas bonito si ricibi tu regalo na tiempo que gendeh tu ta expecta.”—Tammy, 12 año.

•   “Maskin pa gendeh yo ta ricibi regalo na de mio cumpliaño, ta dale conmigo regalo el de mio mayores na otro maga ocasion. Mas quierre yo se ansina cay tan surprise yo.”—Gregory, 11 año.

•   “Puede ba se llama party el diez minuto, cuanto cupcake y un cancion? Pruba ustedes anda kanamon para puede ustedes mira deverasan party!”—Eric, 6 año.