Si. Ta creé el maga Testigo de Jehova que el entero Biblia “inspirao de Dios y puede gayot usa con provecho.” (2 Timoteo 3:16) Ta refiri este con el Daan Testamento y el Nuevo Testamento como cosa el otro ta llama. El maga Testigo de Jehova ta llama con este dos seccion del Biblia como el Hebreo Escritura y el Cristiano Griego Escritura. Na ese manera, gendeh kame ta hace sale que el cuanto parte del Biblia daan ya o gendeh mas aplicable.

 Por medio na guia del Dios, si apostol Pablo ya escribi: “Cay todo el maga cosa-cosa que ya escribi antes pa na maga Escritura amo para insiñanza diaton.” (Roma 15:4) Poreso, tiene maga importante informacion que puede kita aprende na Hebreo Escritura. Puera con ese, ta contene tambien este maga suceso de antes y maga practical consejo.

•   Suceso de antes. Puede le na Hebreo Escritura el maga detallado informacion acerca na creacion y si paquemodo el gente ya queda esclavo na pecado. Si nuay ese informacion, gendeh kita puede incuntra justo contestacion na maga pregunta igual como: Onde kita estaba? Porque el gente ta muri? (Genesis 2:7, 17) Mas pa, puede le na Hebreo Escritura si paquemodo si Jehova ya trata con el maga gente quien ya experiencia alegria y maga probanza igual na cosa kita ta experiencia.​—Santiago 5:​17.

•   Practical consejo. El libro de Proverbio y Eclesiastes que parte del Hebreo Escritura, ta contene maga practical consejo que puede kita aplica na diaton vida. Ta dale este consejo si paquemodo tiene un alegre familia (Proverbio 15:17), si paquemodo queda balance na diaton trabajo (Proverbio 10:4; Eclesiastes 4:6) y si paquemodo el maga jovenes puede usa con el diila vida na de con todo buen manera (Eclesiastes 11:9–​12:1).

 Puede tambien kita beneficia si estudia kita con el Ley de Moises que escribido na Torah (el primer cinco libro del Biblia). Maskin gendeh mas aplicable ese Ley con el maga Cristiano, ta contene este maga principio que puede kanaton ayuda para vivi con alegria.​—Levitico 19:18; Deuteronomio 6:​5-7.