Si. Si tiene maga calamidad, el maga Testigo de Jehova pirmi ta dale practical ayuda con el maga victima, maga Testigo de Jehova man sila o gendeh. Ta sigui kame con el instruccion del Biblia que ta habla: “Hace bueno para con todo el maga gente, y especialmente para con aquellos maga hermano di aton na fe.” (Galacia 6:10, El Nuevo Testamento) Ta pricura tambien kame dale comforta y ayuda na espiritual manera con el maga victima.—2 Corinto 1:3, 4.

 Despues del calamidad, el maga anciano ta pricura man contact con todo el maga miembro del congregacion quien ya sale afectao para sabe el diila situacion o si cosa sila necesita. Acabar, ta informa sila na branch office del maga Testigo de Jehova si cosa el situacion del maga hermano y hermana y si cosa sila ayuda ya puede extende.

 Si mas pa el cosa necesita na cosa puede dale ayuda el maga local congregacion, ta hace manera el Cuerpo Gobernante del maga Testigo de Jehova para extende ayuda. Semejante este na manera que yan ayudajan el maga Cristiano del primer siglo durante el tiempo de hambre. (1 Corinto 16:1-4) El branch office ta forma Disaster Relief Committee para organiza y mira con el relief work. El maga Testigo de Jehova de otro lugar ta dale tambien diila tiempo y material cosas para ayuda.—Proverbio 17:17.

 Un manera que ta usa con el maga donacion que ta imbia na branch office del maga Testigo de Jehova amo para extende ayuda si tiene maga calamidad. (Maga Actividad 11:27-30; 2 Corinto 8:13-15) Ciendo voluntario el trabajo, ta usa con el pondo para na mismo ayuda que ta extende y gendeh para paga con el maga ta trabaja. Ta usa kame enbuenamente con el maga donacion.—2 Corinto 8:20.