Como maga Testigo de Jehova, ta hace kame esfuerzo para hace fuerte con el relacion del familia, gendeh lang diamon sino del familia tambien del otro. Ta respeta kame con Dios como el quien ya establicia con el familia. (Genesis 2:21-24; Efeso 3:14, 15) Por medio del Biblia, ta enseña le maga principio que ta puede ayuda con el maga gente na entero parte del mundo para tiene alegria na diila matrimonio.

 Ta hace kame el todo para sigui con el maga consejo na Biblia ciendo ta ayuda este kanamon para queda maga buen marido, mujer y mayores. (Proverbio 31:10-31; Efeso 5:22–6:4; 1 Timoteo 5:8) Este maga principio na Biblia puede tambien ayuda con el maga familia maskin otro-otro el religion del maga miembro de este. (1 Pedro 3:1, 2) Considera con el cosa ya habla el maga gendeh Witness que tiene marido o mujer que ya queda un Testigo de Jehova:

•   “Durante el diamon primer seis año, pirmi kame tan peleajan y ta consumi con uno’y otro. Pero, cuando ya queda un Testigo de Jehova si Ivete, ya queda le mas amable y paciencioso. Ya puede se ayuda para salva con el diamon matrimonio.”—Clauir, de Brazil.

•   “Nuay yo conforma del una cuando ya principia estudia de mio marido, si Chansa, con el Biblia junto con el maga Testigo de Jehova cay pensaba yo ta bungca sila familia. Pero ahora, ya puede yo mira que grande ayuda ga’t gale el Biblia na diamon matrimonio.”—Agness, de Zambia.

 Na diamon ministerio, ta dale kame mira con otro si paquemodo el maga principio na Biblia puede ayuda kanila

•   Iscuji enbuenamente si con quien casa

•   Puede queda alegre na primer año del matrimonio

•   Si paquemodo trata con el maga suegro y suegra

•   Man budget con el sen

•   Evita man peleajan

•   Perdona

•   Man train con el diila maga anak

 Si, ta sucede se tiene vez. Por ejemplo, na 1998 report del Sofres, un compania que ta hace maga research, ya puede mira que 1 na 20 man maridable el ya tiene maga serioso problema cuando ya queda Witness el uno kanila.

 Ya predicta si Jesus que aquellos quien ta sigui con el de suyu maga enseñanza hay experiencia maga problema na familia. (Mateo 10:32-36) El un historian, si Will Durant ya habla que de antes, na tiempo del Imperio del Roma, “ya acusa con el Cristianidad que ta bungca con el maga familia” a y ansina tambien el acusacion na cuanto maga Testigo de Jehova ahora. Quierre decir ba de este que ta causa problema el maga Testigo de Jehova?

 Cuando ya hace decision el European Court of Human Rights na un caso acerca na acusacion que ta bungca maga familia el maga Testigo de Jehova, ya menciona el corte que na manada situacion, el miembro que gendeh Witness amo el ta causa problema cay gendeh sila “ta acepta y ta respeta con el libertad del diila familia que sigui con el maga enseñanza del de suyu religion.” El Corte ya habla: “Comon este situacion na todo maga matrimonio que donde otro-otro el religion del man maridable y incluido ya alli el maga Testigo de Jehova.” b Pero maskin ta persigui kanila, el maga Testigo de Jehova ta pricura siempre sigui con el consejo del Biblia que: “No devolve mal con mal. . . . Hace todo el que puede para vivi con paz con uno y otro.”—Roma 12:17, 18.

 El maga Testigo de Jehova ta sigui con el instruccion na Biblia que casa “na un cristiano,” quierre decir casa lang con aquel quien igual siervo de Jehova. (1 Corinto 7:39) Practical este mandamiento y estaba este na Biblia. Por ejemplo, el un articulo del 2010 na Journal of Marriage and Family ya habla que tiene mas buen relacion aquellos “maga man maridable que tiene igual religion.” c

 Pero, el maga Testigo de Jehova gendeh ta anima con el diila maga hermano o hermana que separta na diila mujer o marido que otro el religion. El Biblia ta habla: “Si un hermano tiene mujer gendeh Cristiano y el mujer ta comforma vivi junto con ele, no conviene le deja con el mujer. Y si un mujer tiene un marido gendeh Cristiano y el marido ta comforma vivi junto con ele, no conviene le deja con su marido.” (1 Corinto 7:12, 13) Ta sigui el maga Testigo de Jehova con este mandamiento.