Gendeh ta participa na guerra el maga Testigo de Jehova por causa na siguiente razon:

1.   Obediencia con Dios. El Biblia ta habla que el maga siervo del Dios hay hace “pilo de arrao con el diila maga espada . . . ni aprende pa sila man guerra.”—Isaias 2:4.

2.   Obediencia con Jesus. Si Jesus ya habla con apostol Pedro: “Devolve el dituyo espada na su baina, cay todo quien ta agarra espada, ta muri na espada.” (Mateo 26:52) Por medio con ese, ya dale mira si Jesus que el de suyu maga siguidores gendeh debe participa na guerra.

    El maga dicipulo de Jesus ta obedece con el de suyu mandamiento que el maga Cristiano debe queda “gendeh del mundo.” (Juan 17:16) Poreso, ta esta sila neutral na politica. Gendeh sila tan protesta contra na maga actividad del militar o ta sangga con aquellos quien quierre sirvi como soldao.

3.   Amor para con otro. Ya manda si Jesus con el de suyu maga dicipulo que “ama con uno y otro.” (Juan 13:34, 35) Maskin onde nacion man sila estaba, necesita sila trata con uno y otro como man hermano y hermana y nuay ni uno kanila quien hay man guerra contra con uno y otro.—1 San Juan 3:10-12.

4.   Ejemplo del maga Cristiano del primer siglo. El Encyclopedia of Religion and War ya habla: “El maga siguidores de Jesus de antes nuay quierre entra na guerra y sirvi como militar.” Sabe sila que este trabajo “gendeh harmonia na cosa ya enseña si Jesus que ama con uno y otro y con el mandato que ama con el enemigo.” Acerca na maga dicipulo de Jesus de antes, el un teologo de Germany que si Peter Meinhold ya habla: “Gendeh posible queda soldao el un Cristiano.”

 Grande ayuda el maga Testigo de Jehova na comunidad y gendeh ta causa peligro na nacion donde sila ta queda. Ta respeta kame con aquellos quien tiene autoridad cay ta obedece kame con el siguiente mandamiento na Biblia:

•   “Obedece con el autoridad del gobierno.”—Roma 13:1.

•   “Devolve con Cesar el maga cosa-cosa de Cesar y devolve tamen con Dios el maga cosa-cosa de Dios.”—Mateo 22:21.

 Poreso, ta obedece kame con el ley, ta paga tax y ta suporta con el esfuerzo del gobierno que hace maga cosas para na bien del comunidad.