Base na Biblia el diamon mirada y practica que tiene que hace na intierro, incluido el siguiente:

•   Normal lang queda dolorido si ya muri el un persona que importante kanaton. Dolorido el maga dicipulo de Jesus cuando ya muri el maga persona con quien sila ta ama. (Juan 11:33-35, 38; Maga Actividad 8:2; 9:39) Poreso, gendeh kame ta mira con el intierro como un tiempo de alegria. (Eclesiastes 3:1, 4; 7:1-4) Sino, ta mira kame con este como un tiempo para dale mira empatia.—Roma 12:15.

•   El maga muerto no sabe ni nada. Maskin cosa pa el diamon cultura o lugar onde estaba, ta evita kame con el maga tradicion o practica que base na gendeh justo idea que el maga muerto sabe si cosa ta sucede y puede influencia con el maga vivo. (Eclesiastes 9:5, 6, 10) Incluido na este maga practica el maga engrande celebracion despues del intierro, aniversario del muerto, velacion, ofrecimiento na maga muerto y el practica que converza y hace maga pidimiento kanila. Ta evita kame con ese todo maga tradicion y practica cay ta obedece kame con el mandato del Biblia: “No man junto canila. No mete el maga cosa-cosa manchao.”—2 Corinto 6:17.

•   El maga muerto tiene esperanza. Ta enseña el Biblia que tiene resureccion y llega el tiempo donde nuay mas ya quien muri. (Maga Actividad 24:15; Revelacion 21:4) Ese esperanza ta ayuda kanamon que evita queda sobra de dolorido, igual si paquemodo ya puede este ayuda con el maga Cristiano de antes.—1 Tesalonica 4:13.

•   El Biblia ta conseja que queda modesto. (Proverbio 11:2) Para kanamon, el intierro gendeh tiempo para dale mira “el orgullo del vida” o el estado de vida del un persona. (1 San Juan 2:16) Gendeh kame ta hace engrande intierro para lang entretene o cumpra bien caro cajon y camisa para lang man bilib el maga gente.

•   Gendeh kame ta forza con otro el diamon creencia acerca na intierro. Ta sigui kame con este principio: “Cada uno diaton ay dale cuenta con el Dios si cosa kita ya hace.” (Roma 14:12) Pero, si dale kanamon oportunidad, ta explica kame “embuenamente y con respeto” con el cosa kame ta creé.—1 Pedro 3:15, 16.

 Locacion: Si decidi el familia que tiene discurso de intierro, puede se hace maskin onde iscuji el familia. Puede se hace na Kingdom Hall, na funeraria, na casa, na lugar donde tan cremate o na cementerio.

 Discurso: Tiene un discurso para dale comforta con el maga dolorido. Ta explica este si cosa ta habla el Biblia acerca na muerte y na esperanza de resureccion. (Juan 11:25; Roma 5:12; 2 Pedro 3:13) Puede tambien discuti na discurso con el maga buen calidad del quien ya muri o si cosa puede aprende na de suyu buen ejemplo.—2 Samuel 1:17-27.

 Puede tambien canta cancion que base na Biblia. (Colosa 3:16) Este discurso hay termina por medio de rezo.—Filipo 4:6, 7.

 Pago o maga coleccion: Gendeh kame ta manda paga con el maskin cosa servicio que ta hace na diamon religion, incluido ya el servicio na intierro. Nuay tambien coleccion na diamon maga miting.—Mateo 10:8.

 Si quien puede atende: El maga gendeh Witness puede atende na discurso que hace na Kingdom Hall. Igual na diamon maga miting, todo puede atende na ese discurso.

 El cada Witness hay decidi base na de suyu conciencia que base na Biblia. (1 Timoteo 1:19) Pero, gendeh kame ta participa na maga ceremonia que ta sinti kame que gendeh harmonia na Biblia.—2 Corinto 6:14-17.