Mas mucho, simple lang y formal el ceremonia na maga casamiento del maga Testigo de Jehova y tiene este un corto talk que base na Biblia. Despues el ceremonia, posible tiene un gathering o reception donde posible tiene maga comida que ya prepara. a Ya atende si Jesus na ese clase de ocasion na ciudad de Cana na principio del de suyu ministerio.—Juan 2:1-11.

•  Paquemodo ta hace con el ceremonia de casamiento?

•  Onde ta hace con el maga casamiento del maga Testigo de Jehova?

•  Quien puede atende?

•  Cosa camisa debe usa?

•  Tiene ba maga regalo?

•  Puede ba man toast?

•  Hay guerria ba arroz o confetti?

•  Tiene ba cosas para come y toma?

•  Tiene ba musica o bailada?

•  Ta celebra ba aniversario de casamiento el maga Testigo de Jehova?

 El de con todo importante parte del casamiento amo el talk que maga 30 minuto el largor y dale este el un ministro del maga Testigo de Jehova. Ta hace claro na este talk si paquemodo el Biblia puede ayuda con el man maridable para tene fuerte y alegre matrimonio.—Efeso 5:33.

 Na manada nacion, el gobierno ta dale autoridad con el maga ministro del maga Testigo de Jehova para dale casa. Na ese situacion, na fin del talk, el man maridable ta menciona con el diila promesa con uno y otro. Posible dale tambien sila anillo con uno y otro. Despues, el ministro hay introduci kanila como man maridable.

 Na otro maga nacion, tiene ley que debe hace el casamiento na un oficina del gobierno. Ta hace este el maga quien casa antes el talk del casamiento. Si nuay sila habla el diila promesa cuando ya casa sila na civil, puede sila se hace na fin del talk. Si ya habla ya sila con el diila promesa, puede sila iscuji que repiti con ese pero usa sila maga palabra na past tense para dale mira que ya habla ya sila con ese maga promesa. Termina el talk por medio na un rezo que ta pidi con Dios que bendici con el nuevo casao.

 Manada maga Testigo ya iscuji que hace con el diila casamiento na un Kingdom Hall si available este. b Si tiene sila reception despues, ta iscuji sila otro locacion para con ese.

 Si ya hace con el casamiento na un Kingdom Hall, el todo puede atende—maga Testigo de Jehova man o gendeh. Si tiene reception, el quien casa ta iscuji si con quien sila invita.

 El maga Testigo de Jehova ta pricura sigui con el maga principio na Biblia y muda na modesto y decente manera. Ta aprecia gayot sila si el otro ansina tambien hay hace. (1 Timoteo 2:9) Siempre, si tiene reception, igual lang el principio que ta sigui.

 Ta anima kanaton el Biblia que queda bondadoso. (Salmo 37:21) Alegre el maga Testigo de Jehova que dale y ricibi maga regalo durante el casamiento. (Lucas 6:38) Pero, ta evita el maga Testigo que pidi maga regalo o habla na publico el maga nombre de aquellos quien ya dale con el regalo. (Mateo 6:3, 4; 2 Corinto 9:7; 1 Pedro 3:8) Gendeh este base na Biblia y si hace sila este, posible tambien que man huya el maga quien ta atende.

 Gendeh. El maga Testigo de Jehova gendeh tan toast cay este practica ya origina na maga falso enseñanza. c El maga Testigo ta habla con el maga nuevo casao que quierre sila que queda este alegre pero gendeh sila ta hace con ese por medio na toasting.

 Gendeh. Na cuanto maga lugar, el maga gente ta guerria arroz, confetti o cosas que semejante con este na nuevo casao. Ta creé sila que por causa con este, hay tene suerte, alegria y largo vida el nuevo casao. Pero ta evita el maga Testigo de Jehova con el maga practica que conectao na supersticion. Incluido aqui que gendeh habla good luck cay contra este na maga principio del Biblia.—Isaias 65:11.

 Na tiempo del casamiento na Kingdom Hall, nuay cosas para come o toma. El cuanto maga quien hay casa ta iscuji que tiene un reception despues del ceremonia donde tiene comida y cosas para toma. (Eclesiastes 9:7) Si decidi sila que sirvi alcoholico tomada, ta asigura sila que gendeh este por demas y para lang con aquellos na justo edad ya para toma.—Lucas 21:34; Roma 13:1, 13.

 Si el quien hay casa ya decidi que tiene un reception, puede sila inclui musica y bailada. (Eclesiastes 3:4) Posible iscuji sila musica aquel quierre-quierre sila o base na diila cultura pero ta asigura sila que bonito con este oi y tiene buen efecto na maga visita. Na maga casamiento na Kingdom Hall, tiene maga musica que base na Biblia.

 Nuay habla el Biblia que debe o gendeh debe celebra maga aniversario de casamiento poreso el maga Testigo puede decidi si celebra ba sila o gendeh con el diila aniversario. Si ya iscuji sila que hace con ese, posible sila lang dos celebra o junto na diila maga amigo y familia.