•  Paquemodo el maga Testigo de Jehova ta determina si aceptable ba el un holiday o gendeh?

•  Maskin el maga Testigo de Jehova gendeh ta celebra con el cuanto maga holiday, ta ama ba siempre sila con el diila familia?

•  El maga Testigo de Jehova ba ta habla con otro que no celebra con el cuanto maga holiday?

 Antes decidi si celebra ba sila con el un particular holiday, el maga Testigo de Jehova ta mira si cosa el Biblia ta habla acerca con ese. El cuanto maga holiday y celebracion claro ta viola con el maga principio na Biblia. Si ansina el situacion, el maga Testigo de Jehova gendeh ta participa con ese. Pero si acerca na otro maga holiday, el cada uno Cristiano necesita hace el de suyu personal decision mientras ta pricura mentena “limpio el conciencia todo el tiempo adelante del Dios y del maga gente.”​—Maga Actividad 24:16, El Nuevo Testamento na Chavacano.

 El siguiente amo el cuanto maga pregunta que ta considera el maga Testigo de Jehova antes decidi si celebra ba sila con el un holiday. a

•   El holiday ba base na un enseñanza que gendeh uyun na Biblia?

   Principio na Biblia: “Desaleja ustedes con ese clase de gente y no man junto canila. No mete el maga cosa-cosa manchao.”​—2 Corinto 6:15-17.

   Para puede sila evita completamente con el maga enseñanza que gendeh uyun na cosa deverasan ta habla el Biblia, el maga Testigo de Jehova gendeh ta celebra con el maga holiday que donde envuelto el siguiente cosas.

   Maga holiday que base na creencia o adoranza na otro maga dios. Si Jesus ya habla: “Adora con el Señor [Jehova], el dituyo Dios y con Ele lang gayot sirvi.” (Mateo 4:10) Ta aplica con ese el maga Testigo de Jehova. Poreso, gendeh sila ta celebra Pascua o Easter ciendo este maga holiday amo base na maga adoranza na maga dios-dios y gendeh con Jehova. Puera con ese, gendeh tambien sila ta participa na siguiente maga celebracion.

  •  Kwanzaa. El nombre Kwanzaa “ya sale na maga palabra Swahili que matunda ya kwanza que quierre decir ‘maga primer fruta’ y [este] ta indica que este holiday amo base na celebracion del primer cosecha que ya menciona na history del Africa.” (Encyclopedia of Black Studies) Maskin pa para con el cuanto el Kwanzaa gendeh un religioso celebracion, el Encyclopedia of African Religion ya compara con ese na un fiesta na Africa donde el maga primer cosecha “ta ofrece na maga dios-dios y na maga tatarabuelo como manera para rindi gracias kanila.” Este ya omenta que el Kwanzaa que un African American holiday, amo base na ese maga celebracion.

  •  Mid-Autumn Festival. Este amo un “fiesta para honra con el diosa de luna.” (Holidays, Festivals, and Celebrations of the World Dictionary) Incluido na este fiesta el un ritual que donde “el maga mujer ta agacha . . . na diosa.”​—Religions of the World​—A Comprehensive Encyclopedia of Beliefs and Practices.

  •  Nauruz (Nowruz). “Este fiesta ya sale na religion de Zoroastrianism y ese amo el de con todo sagrao dia na calendario de Zoroastrian de antes. . . . El Espiritu de Didia que conocido como [Rapithwin], con quien forzao ya buta abajo del tierra el Espiritu del Tiempo de Frieldad durante el maga mes que frio, ta man welcome el maga gente por medio na maga celebracion que ta hace sila de dia na dia de Nowruz asegun na tradicion de Zoroastrian.”​—United Nations Educational, Scientific and Cultural Organization.

  •  Shab-e Yalda. Este celebracion del winter solstice “tiene gayot coneccion na adoranza con Mithra,” el dios de claridad, asegun na libro Sufism in the Secret History of Persia. Puera con ese, ta creé tambien el maga gente que este celebracion posible tiene coneccion na adoranza na maga dios de sol del Romano y Griego. b

  •  Thanksgiving. Igual con el Kwanzaa, este holiday amo estaba na maga celebracion de cosecha de antes que ta honra na diferente maga dios. Despues pasa el cuanto maga tiempo, “este maga tradicion de antes ya introduci na maga religion de Cristiano.”​—A Great and Godly Adventure​—The Pilgrims and the Myth of the First Thanksgiving.

   Maga holiday que base na supersticion o creencia na suerte. El Biblia ta habla que aquellos “ta pone mesa para na dios de Suerte” amo “uno de aquellos quien ta deja con Jehova.” (Isaias 65:11) Poreso, el maga Testigo de Jehova gendeh ta celebra con el siguiente maga holiday:

  •  Ivan Kupala. “El maga gente ta habla que durante el tiempo de [Ivan Kupala] tiene magica que ta hace sale el maga cosas alrededor kanaton y puede tu obtene con ese si valiente y suerte tu,” ya habla el libro The A to Z of Belarus. Del primero, este ocasion amo un celebracion de pagano que donde ta celebra con el summer solstice. Pero, asegun na Encyclopedia of Contemporary Russian Culture que ese celebracion “ya mezcla con el celebracion de Iglesia [el “dia de santo” que si Juan Bautista] despues acepta el maga pagano con el Cristianidad.”

  •  Lunar New Year (Chinese New Year o Korean New Year). “Na ese tiempo del año, el cosa na pensamiento del maga familia, amigo y maga pariente amo puede sila hace maga cosas que puede ayuda kanila para tene sila suerte, honra con el maga dios y maga espiritu, y pidi que man asenso sila na ese año.” (Mooncakes and Hungry Ghosts​—Festivals of China) Na igual manera, el Korean New Year tambien “tiene envuelto adoranza na maga tatarabuelo, maga ritual para arria con el maga mal espiritu y asigura que tene suerte na ese Nuevo Año, y [adivina] para sabe si cosa hay sucede na ese Nuevo Año.”​—Encyclopedia of New Year’s Holidays Worldwide.

   Maga holiday que base na idea que el alma imortal. El Biblia claro ta habla que el alma ta muri. (Ezequiel 18:4) Poreso, el maga Testigo de Jehova gendeh ta celebra con el maga holiday que ya menciona abajo cay ta enseña ese que el alma imortal:

  •  All Souls’ Day (Dia de Maga Muerto). Este amo el dia para “honra con el todo maga muerto,” asegun na New Catholic Encyclopedia. “Principia del maga 500 C.E. hasta maga 1500 C.E., manada maga gente ta creé que el alma na purgatorio hay abuya como buruju, buruja, maga palaka y otro pa con aquellos quien ya puede hace cosas gendeh bueno kanila cuando vivo sila.”

  •  Qingming Festival (Ch’ing Ming) y Hungry Ghost Festival. Ta hace con este dos celebracion para honra con el maga tatarabuelo. Durante el Ch’ing Ming, ya habla el libro Celebrating Life Customs Around the World​—From Baby Showers to Funerals, “ta quema con el maga comida, tomada y maga sen para asigura que gendeh man con hambre, man con sequia y queda nuay sen el maga muerto.” Ya menciona tambien el libro que “durante el Hungry Ghost Month, particularmente na noche que donde entero luna, [ta creé aquellos quien ta celebra con ese] que tiene mas fuerte coneccion entre el maga muerto y maga vivo na ese tiempo contra na otro maga noche, poreso importante que hace alegre con el maga muerto y honra con el maga tatarabuelo.”

  •  Chuseok. Este celebracion, asegun na The Korean Tradition of Religion, Society, and Ethics, ta inclui “ofrecimiento de comida y vino na maga alma del maga muerto.” Ese maga ofrecimiento amo base na “un creencia que el alma ta continua existi despues muri el cuerpo del un persona.”

   El maga holiday que conectao na espiritismo. El Biblia ta habla: “Maskin quien ta practica adivinacion, maskin quien ta practica magica, maskin quien ta busca maga señal, salamanquero, maskin quien ta hace daño con otro, maskin quien ta consulta na espiritista o con el quien ta adivina o maskin quien tan cuento na muerto . . . detestable con Jehova.” (Deuteronomio 18:10-12) Para evita maskin cosa espiritismo—incluido el astrologia (un clase de adivinacion)—el maga Testigo de Jehova gendeh ta celebra Halloween o el siguiente maga holiday:

  •  Sinhala y Tamil New Year. “El maga tradicional ritual que ta asocia na este celebracion . . . incluido el maga actividad na especifico tiempo que ya habla el astrologia hay lleva suerte.”​—Encyclopedia of Sri Lanka.

  •  Songkran. Un fiesta na Asia “que estaba na palabra Sanskrit . . . que quierre decir ‘movimiento’ o ‘cambio’ y el fiesta ta marca con el movimiento del sol para na zodiac constellation de Aries.”​—Food, Feasts, and Faith​—An Encyclopedia of Food Culture in World Religions.

   El maga celebracion que bajo na Ley de Moises donde ya termina cuando ya muri si Jesus. El Biblia ta habla: “Si Jesucristo ya remplasa con el ley.” (Roma 10:4, El Nuevo Testamento) El maga Cristiano ta beneficia siempre con el maga principio na Ley de Moises que ya dale na Israel de antes. Pero, gendeh sila ta celebra con el maga fiesta, especialmente el maga fiesta que tiene coneccion na Mesias donde el maga Cristiano ta creé que ya llega ya. “Ese maga cosas dol maga sombra lang del verdadero cosa que ay vene pa” pero el Biblia ya habla, “ese verdadero cosa amo si Jesucristo mismo.” (Colosa 2:17, El Nuevo Testamento) Base na cosa ya menciona arriba y ciendo el cuanto maga fiesta ya mezcla cuanto maga tradicion que gendeh base na Biblia, el maga Testigo de Jehova gendeh ta celebra con el maga celebracion que ta menciona abajo:

  •  Hanukkah. Este fiesta ta comemora con el inaguracion del templo del maga Judio na Jerusalem. Pero, el Biblia ta habla que si Jesus ya queda Alto Sacerdote del “mas grande y perfecto tolda [o, templo] (gendeh hacido de maga mano, quiere decir, gendeh de este creacion).” (Maga Hebreo 9:11) Para na maga Cristiano, el espiritual templo ya cambia con el literal templo na Jerusalem.

  •  Rosh Hashanah. Este el primer dia na año del maga Judio. De antes, este fiesta tiene maga especial sacrificio que ta ofrece con Dios. (Numero 29:1-6) Pero, como el Mesias, ya “hace [si Jesucristo] descanza con el sacrificio y ofrecimiento” y como resulta, gendeh mas este valido na ojos del Dios.​—Daniel 9:26, 27.

•   Tiene ba envuelto interfaith na ese holiday?

   Principio na Biblia: “Tiene ba cosa puede comparti el gente quien ta cree y el gente quien gendeh ta cree? Igual ba el Templo del Dios y el templo del maga dios-dios?”​—2 Corinto 6:15-17.

   Mientras el maga Testigo de Jehova ta pricura vivi con paz junto na diila maga vecinos y ta respeta con el derecho del cada persona para iscuji si cosa creé, ta evita sila maga celebracion que envuelto el interfaith na siguiente maga manera.

   Maga celebracion para na un religioso persona o ocasion que ta anima con aquellos quien tiene diferente creencia para man junto na adoranza. Cuando el Dios ya lleva con el de suyu maga siervo de antes na lugar donde el maga gente tiene diferente creencia, ele ya habla kanila: “Gendeh ustedes debe hace contrata junto kanila o na diila maga dios. . . . Si sirvi ustedes na diila maga dios, asigurao hay queda este trampa para con ustedes.” (Exodo 23:32, 33) Poreso, el maga Testigo de Jehova gendeh ta participa na ansina maga celebracion igual na cosa ta menciona na siguiente.

  •  Loy Krathong. Durante este fiesta na Thailand, “el maga gente ta hace maga tazon de ojas, ta pone maga candela o palito de incenso y ta hace anud con este maga tazon na agua. Ta creé sila que este maga tazon ta hace lejos con el malas. Este fiesta ta comemora con el sagrao marca de pies que ya deja el Buddha.”​—Encyclopedia of Buddhism.

  •  National Repentance Day. Aquellos quien ta participa con este ocasion “tan uyun [con el] maga importante creencia del Cristiano,” asegun con el un oficial de gobierno que ya menciona na The National, un diario de Papua New Guinea. Ele ya habla que si ta celebra con el National Repentance Day, ta ayuda este con el maga Cristiano que sigui con el principio del nacion.

  •  Vesak. “Este el de con todo sagrao celebracion na maga Budista cay este ta celebra con el nacimiento, entendimiento y muerte del Buddha o tene con el Nirvana.”​—Holidays, Festivals, and Celebrations of the World Dictionary.

   Maga celebracion que base na maga tradicion del religion que nuay enseña na Biblia. Si Jesus ya habla con el maga lider del religion: “Ya nega ustedes el Palabra del Dios por causa del de ustedes tradicion.” Ya habla tambien le que diila adoranza envano cay ta enseña sila “maga regulacion de maga gente.” (Mateo 15:6, 9) Poreso, el maga Testigo de Jehova gendeh ta celebra maga celebracion de religion cay ta obedece sila con este aviso.

  •  Epiphany (Three Kings’ Day, Timkat, o Los Reyes Magos). Aquellos quien ta celebra con este ta acorda con el visitada del maga astrologo con Jesus o con el de suyu bautismo. Este fiesta “ya queda parte de Cristianismo na spring festival donde ta honra con el maga dios de rio y sapa.” (The Christmas Encyclopedia) El Timkat, un fiesta tambien que “base na tradicion.”​—Encyclopedia of Society and Culture in the Ancient World.

  •  Feast of the Assumption of the Virgin Mary. Ta celebra con este fiesta cay ta creé sila que el nana de Jesus ya subi na cielo con fisical cuerpo. “Este creencia gendeh conocido na maga primer Cristiano y nuay este na Biblia,” ya habla el Religion and Society​—Encyclopedia of Fundamentalism.

  •  Feast of the Immaculate Conception. “El The Immaculate Conception [de Maria] nuay enseña na Biblia . . . [Este] amo enseñanza lang del Iglesia.”​—New Catholic Encyclopedia.

  •  Cuaresma. Este el tiempo del penitencia y ayuno asegun na New Catholic Encyclopedia, y ya establicia del “ika-cuatro siglo” donde mas de 200 año ya el ya pasa despues completa con el Biblia. Acerca na primer dia de Cuaresma, el encyclopedia ya habla: “Ta practica este el maga devoto por medio de marca ceniza na diila frente durante el Ash Wednesday. Ya acepta con este durante el tiempo del Synod of Benevento del 1091.”

  •  Meskel (o Maskal). Fiesta este del maga de Ethiopia donde ta celebra sila “el incuntrada del Verdadero Cruz (el cruz onde ya clava con el Cristo), donde ta hace sila maga bonfire y ta baila sila alrededor de ese,” ya habla el Encyclopedia of Society and Culture in the Medieval World; diila el parentheses. Pero, el maga Testigo de Jehova gendeh ta usa cruz na diila adoranza.

•   El holiday ba ta alaba con el un gente, con el organizacion o con el simbolo del nacion?

   Principio na Biblia: “Este el cosa ta habla si Jehova: ‘Maldici con el gente quien ta pone de suyu confianza na gente lang, quien ta confia con el poder del gente y de quien corazon ya desaleja con Jehova.’”​—Jeremias 17:5.

   Maskin pa el maga Testigo de Jehova ta dale mira apresacion na maga gente y ta reza para kanila, gendeh sila ta participa na siguiente celebracion:

   Maga holiday que ta honra con el quien ta rula con el nacion o con el otro conocido persona. “Para na de ustedes mismo beneficio,” el Biblia ya habla, “no mas ya confia na gente, quien ta vivi por causa lang na resuello na de suyu naris. Porque man ustedes con ele honra?” (Isaias 2:22) Poreso, el maga Testigo de Jehova gendeh ta celebra con el nacimiento del rey o reina.

   Celebracion del bandera del nacion. El maga Testigo de Jehova gendeh ta celebra con el Dia de Bandera. Porque? Cay el Biblia ya habla: “Desaleja con el maga dios-dios.” (1 San Juan 5:21) El cuanto maga gente ahora gendeh ta considera con el un bandera como un cosa de adoranza pero el historian que si Carlton J. H. Hayes ya escribi: “El bandera amo el simbolo del fe y centro del adoranza del nacionalismo.”

   Maga holiday o celebracion que ta honra con el un santo. Cosa ya sucede cuando el un persona quien tiene miedo con Dios ya hinca con apostol Pedro? El Biblia ya habla: “Si Pedro ya ayuda con ele levanta y ya habla: ‘Levanta tu cay un gente lang yo.’” (Maga Actividad 10:25, 26) Ciendo si Pedro y el otro maga apostoles nuay acepta que honra y alaba kanila, el maga Testigo de Jehova gendeh ta participa na maga celebracion que ta honra con aquellos quien ta considera como maga santo, igual con el maga siguiente celebracion:

  •  El Dia del Todos Los Santos. “Un fiesta que ta honra con el todo santo . . . Gendeh asigurao si onde estaba este fiesta.”​—New Catholic Encyclopedia.

  •  Fiesta del Nuestra Señora de Guadalupe. Este fiesta ta honra con el “patrona de Mexico” donde el cuanto ta creé que ese amo si Maria, el nana de Jesus. Ta habla sila que ya aparece le na un pobre persona del 1531.​—The Greenwood Encyclopedia of Latino Literature.

  •  Name Day. “El name day amo un dia de fiesta del santo donde ya saca el nombre el bata durante el bautismo o confirmacion,” ya habla el libro Celebrating Life Customs Around the World​—From Baby Showers to Funerals. Este ya omenta que “el maga gente ta hace un cosa que conectao na religion.”

   Maga celebracion de campaña de politica o para na progreso de sociedad. “Mas bueno pa hace con Jehova diaton refugio,” el Biblia ya habla, “contra confia con el maga gente.” (Salmo 118:8, 9) El maga Testigo de Jehova gendeh ta celebra con el Youth Day o Women’s Day cay quierre sila dale mira que ta confia sila con Dios que solva con el problema del mundo y gendeh el maga gente. Na igual manera, gendeh tambien sila ta participa na Emancipation Day o na maga semejante celebracion. Sino, ta confia sila con el Reino del Dios que solva con el problema de discriminacion y injusticia.​—Roma 2:11; 8:21.

•   El holiday ba ta dale mira que mas alto el un nacion o cultura contra na otro?

   Principio na Biblia: “El Dios noay favorito, pero ta acepta le con todo aquellos quien ta adora con Ele y ta hace cosa bueno, maskin de donde nacion sila.”​—Maga Actividad 10:34, 35.

   Maskin el maga Testigo de Jehova ta aprecia con el diila lugar onde sila estaba, ta evita sila maga celebracion donde ta hace alto con el un nacion o cultura igual na cosa ta menciona na siguiente.

   Maga celebracion que ta honra con el maga soldao. En vez que anima man guerra, si Jesus ya habla con el de suyu maga siguidores: “Ama con el de ustedes maga contrario y reza para con aquellos quien ta persigui con ustedes.” (Mateo 5:44) Poreso, el maga Testigo de Jehova gendeh ta celebra maga celebracion que ta honra con el maga soldao, igual con el maga siguiente holiday:

  •  Anzac Day. “El Anzac ta representa con el Australian and New Zealand Army Corps” y “el Anzac Day hinay-hinay ya queda un dia de comemoracion para con aquellos quien ya muri na guerra.”​—Historical Dictionary of Australia.

  •  Veterans Day (Remembrance Day, Remembrance Sunday o Memorial Day). Este holiday ta honra con el “maga veterano soldao y aquellos quien ya muri na guerra na diila nacion.”​—Encyclopædia Britannica.

   Maga celebracion del historia del nacion o independiencia. Si Jesus ya habla que el de suyu maga siguidores ‘gendeh del mundo, igual como ele gendeh del mundo.’ (Juan 17:16) Maskin pa alegre sila aprende acerca na historia del diila nacion, el maga Testigo de Jehova gendeh ta participa na siguiente celebracion:

  •  Australia Day. Asegun na Worldmark Encyclopedia of Cultures and Daily Life, este holiday ta comemora cuando “el maga soldao de England ya hace subi con el diila bandera del 1788 y ya declara con el Australia como un nuevo colonia.”

  •  Guy Fawkes Day. Este “el dia del celebracion y comemoracion [del] nacion cuando ya falla el plano de Guy Fawkes y el otro maga Catolico quien ta suporta que mata con King James I y el otro gobierno na [England] del 1605.”​—A Dictionary of English Folklore.

  •  Independence Day. Na cuanto maga nacion, este “el dia que donde el maga gente ta celebra con el principio del independiencia del diila nacion.”​—Merriam-Webster’s Unabridged Dictionary.

•   Tiene ba maga actividad na este holiday que ta dale mira nuay control na cuerpo o imoralidad?

   Principio na Biblia: “Ya tarda ustedes vivi igual como el maga pagano. El de ustedes vida antes lleno de immoralidad, maga deseo malo, borracherias, ambrentadas de comida y tomada, y ya adora pa ustedes con el maga dios-dios.”​—1 Pedro 4:3.

   Harmonia con ese principio, el maga Testigo de Jehova ta evita maga celebracion que donde el maga gente por demas ta toma y tan party. Alegre sila man junto na diila maga amigo y posible, hay toma sila alcoholico tomada pero gendeh sobra. Ta hace sila el todo para sigui con el consejo del Biblia: “Maskin cosa ustedes ta come, maskin cosa ustedes ta toma, maskin cosa gayot ustedes ta hace, hace ese para el gloria del Dios.”​—1 Corinto 10:31.

   Poreso, el maga Testigo de Jehova gendeh ta participa na maga carnival o otro maga semejante fiesta que donde puede mira el maga mal conducta que ta condena el Biblia. Incluido aqui el Purim que un fiesta del maga Judio. Ya dura ya ta celebra con el Purim para comemora con el tiempo cuando ya libra con el maga Judio del ika-cinco siglo B.C.E., pero ahora amo este “el version del maga Judio para na Mardi Gras o Carnival,” asegun na libro Essential Judaism. Puede mira na este ocasion “el usada de costume (mas mucho el maga hombre ta usa camisa de mujer), gulu, por demas tomada y maga gente quien tan alboroto.”

 Si. El Biblia ta enseña con el maga gente que ama y respeta con el todo miembro na familia, maskin cosa pa el diila creencia. (1 Pedro 3:1, 2, 7) Siempre, si el uno del maga Testigo de Jehova nuay mas celebra con el cuanto celebracion, el cuanto del de suyu familia posible rabia, man triste o sinti que dol yan traidor kanila. Poreso, manada del maga Testigo de Jehova ta hace esfuerzo para asigura que ta ama sila kanila, ta explica na buen manera si cosa el razon na diila decision y ta visita con el diila maga pariente na otro ocasion.

 Gendeh. Ta creé sila que el cada persona debe hace el de suyu mismo decision. (Josue 24:15) El maga Testigo de Jehova ta “respeta con todo” maskin cosa pa el diila creencia.​—1 Pedro 2:17.