Ta creé el maga Testigo de Jehova que el maga principio y mandato na Biblia puede ayuda kanaton hace maga decision que puede hace alegre con Dios y kita mismo puede beneficia. (Isaias 48:17, 18) Gendeh kame el ya hace con este maga principio y mandato pero ta sigui kame con este. Considera con el cuanto na maga principio que puede aplica na dating. a

•   Un permanente union el matrimonio. (Mateo 19:6) Para na maga Testigo de Jehova, un serioso cosa el dating cay preparacion este para na matrimonio.

•   El dating para lang con aquellos quien na edad ya para casa—aquellos quien ‘ya pasa ya na tiempo de pagka-joven’ o lampas ya na tiempo que donde fuerte el sexual deseo.—1 Corinto 7:36, NWT.

•   Aquellos quien tan date debe tiene libertad casa. Na ojos del Dios, el cuanto quien legal yan divurcio nuay siempre libertad para casa otravez cay base na de suyu principio, sexual imoralidad lang el valido razon para man divurcio.—Mateo 19:9.

•   El un Cristiano debe casa na un Cristiano lang tambien. (1 Corinto 7:39) Para con el maga Testigo de Jehova, este mandato gendeh ta refiri con el un persona quien ta respeta lang con el diamon creencia sino aquel quien tiene igual creencia kanamon—un bautizao Witness. (2 Corinto 6:14) Nuay cambia el mandato del Dios para na de suyu maga siervo que casa lang con aquellos quien tiene igual creencia kanila. (Genesis 24:3; Malaquias 2:11) Este mandato practical tambien como cosa ya puede discubri el maga researcher ahora. b

•   Debe obedece el maga anak con el diila mayores. (Proverbio 1:8; Colosa 3:20) Incluido na este mandato que el maga anak quien ta queda pa junto con el diila mayores, debe obedece con el decision del diila mayores acerca na dating. Posible, incluido aqui el edad del anak que donde puede ya le man date y si cosa le puede y gendeh puede hace si man date.

•   El cada Witness amo el decidi si man date ba le y si con quien le man date basta harmonia este na principio na Biblia. Base este na principio que el “cada y cual necesita carga con el disuyo problema personal” o responsibilidad. (Galacia 6:5) Pero siempre, si llega na dating, manada el ta pidi consejo na maga mature Witness quien ta pensa el bien diila.—Proverbio 1:5.

•   Manada na maga practica que ta hace si tan date amo maga serioso culpa. Por ejemplo, el Biblia ya manda que evita con el sexual imoralidad. Incluido aqui gendeh lang el sexo sino maskin cosa mabuling acto que ta hace el maga gendeh casao, igual na agarrada de privado parte de otro persona o oral o anal sex. (1 Corinto 6:9-11) Maskin el maga acto que ta hace fuerte con el gana para man sexo maskin gendeh pa casao amo un “cuchinadas” que gendeh ta hace alegre con Dios. (Galacia 5:19-21) Ta condena tambien el Biblia con el “maga cuento de malicia.”—Colosa 3:8, El Nuevo Testamento.

•   Traidor el corazon. (Jeremias 17:9) Puede este influencia con el un persona que hace maga cosas que sabe le gendeh justo. Para evita que sucede se, el man novio y novia debe evita maga situacion donde sila lang dos. Puede sila iscuji man junto na un grupo o lleva un chaperone. (Proverbio 28:26) Sabe el maga single Cristiano quien ta busca con quien casa el peligro del online dating site, especialmente el peligro que tiene relacion na un persona que gendeh sila bien conoce.—Salmo 26:4.