Tan base kame el diamon mirada na educacion na maga principio na Biblia. El cada Witness ta usa con el de suyu conciencia que yan train na Biblia para determina si paquemodo aplica con el maga principio igual na siguiente. a

•  Importante el educacion

•  Debe balance el mirada na educacion

•  El alto educacion puede resulta na peligro na moral y espiritual

•  Tiene ba Sunday school el maga Testigo de Jehova?

 Ta ayuda el educacion con el persona para tiene sabeduria y abilidad pensa​—maga calidad que ta dale importancia el Biblia. (Proverbio 2:10, 11; 3:21, 22) Mas pa, ya manda tambien si Jesus na de suyu maga siguidores que enseña el maga cosas que ele ya manda. (Mateo 28:19, 20) Poreso, ta anima y ta ayuda kame con el diamon maga hermano y hermana para tiene educacion, incluido el abilidad le, escribi, comunica con otro b y aprende acerca na otro religion y cultura.​—1 Corinto 9:20-22; 1 Timoteo 4:13.

 El gobierno sabe tambien que importante el educacion poreso ta manda sila con el maga jovenes que entra escuela na elementaria y high school. Ta obedece kame con ese ley cay el Biblia ta habla: “Todo el maga gente necesita obedece con el autoridad del gobierno.” (Roma 13:1) Omento pa, ta anima kame con el diamon maga anak que estudia enbuenamente y gendeh lang basta pasa na escuela. c Igual na cosa ta habla el Palabra del Dios: “Maskin cosa el trabajo ta hace ustedes, hace ese con todo el corazon, como ta sirvi ustedes con el Señor y gendeh con el maga gente.”​—Colosa 3:23.

 El educacion ta ayuda kanamon para dale el necesidad del diamon familia. Asegun na Biblia, “si quien gendeh ta cuida con el disuyo maga pariente, y especialmente con el disuyo mismo familia, ese gente ya nega con el fe; y mas malo pa le con el gente noay fe.” (1 Timoteo 5:8) El secular educacion puede ayuda kanamon cumpli el responsibilidad na diamon maga familia. El The World Book Encyclopedia ya habla que el un importante proposito del educacion amo que “ayuda con el maga gente queda usable na comunidad . . . y ta trabaja para na economia.” Si el un persona manada abilidad y ya puede entra escuela, mas facil para con ele que incuntra trabajo y puede continua suporta con el de suyu familia.​—Proverbio 22:29.

 El maga mayores ta ayuda tambien con el diila anak para queda preparao como un adulto. Y para puede se hace, grande ayuda el educacion. (2 Corinto 12:14) Ta anima kame con el maga mayores que manda entra escuela con el diila maga anak maskin pa ta queda sila na maga lugar donde gendeh este libre, dificil con este obtene o contra este na diila cultura. d Ta dale tambien kame practical sugestion na maga mayores si paquemodo sila puede ayuda na educacion del diila maga anak. e

 Ta examina kame enbuenamente si cosa clase de secular educacion kame saca. El Biblia ta habla: “El inocente ta creé con el todo cosa le ya oi, pero el sabio ta pensa antes hace paso.” (Proverbio 14:15) Ta aplica kame con este principio. Ta examina kame enbuenamente si cosa omento training el tiene despues del high school, si cuanto el gasto y si cosa el beneficio de este. Por ejemplo, gendeh necesita largo tiempo el training na vocational school y puede con este usa dayun.

 Mas importante el espiritual educacion compara na secular educacion. Gendeh igual na secular educacion, el educacion que base na Biblia ta enseña kanamon acerca na saber que ta dale salvacion. (Juan 17:3) Ta enseña tambien este maga justo principio na moral​—“si cosa el recto, justo y imparcial, el camino del cosas bueno.” (Proverbio 2:9) El educacion que ya tiene si apostol Pablo puede compara na educacion na un universidad ahora pero ya puede le realiza que “importante gayot . . . el saber por causa de Cristo.” (Diamon el italic; Filipo 3:8; Maga Actividad 22:3) Na diaton tiempo ahora, manada tambien del maga Testigo de Jehova el ya obtene omento educacion pero ta creé sila que mas valoroso el espiritual educacion. f

 El un proverbio na Biblia ta habla: “El un sabio ta puede mira con el peligro y ta esconde.” (Proverbio 22:3) Para na maga Testigo de Jehova, posible que peligroso na moral y espiritual el influencia na cuanto maga universidad o otro pa maga escuela de alto educacion. Por causa con ese, manada del maga Witness el ya iscuji que gendeh pone diila mismo cuerpo o diila anak na ese situacion. Ta pensa sila que ese maga lugar ta enseña maga gendeh justo idea igual como:

•   Falso idea: El sen puede dale alegria y seguridad

   Comon ya ta enseña que si tiene alto educacion el un persona, asigurao que hay tiene le trabajo que grande el sueldo. Poreso, manada estudiante el ta entra escuela na maga universidad para queda rico. El otro ta esperanza que el sen puede kanila dale alegria y seguridad pero el Biblia claro ta habla que gendeh se justo. (Eclesiastes 5:10) El Biblia ta enseña tambien que “el amor con el sen amo el raiz de todo maga cosa-cosa malo” y mas mucho ta causa este para perde el fe del un persona. (1 Timoteo 6:10) El maga Testigo de Jehova ta hace el todo para evita con el “ansias por el maga riqueza.”​—Mateo 13:22.

•   Falso idea: Debe tu saca alto educacion para queda alto el mirada del otro gente contigo

   Por ejemplo, si Nika Gilauri, prime minister de Georgia de antes, ya escribi acerca na comon mirada del maga gente na diila nacion: “Na Georgia, para conoce con el un persona que tiene alto estado de vida, dol bien necesita le gradua na un universidad. . . . [De antes,] verguenza na familia si el maga jovenes nuay gradua na universidad.” g Pero, el Biblia ta dale aviso con aquellos quien quierre queda conocido na este mundo. Si Jesus ya habla con el maga religioso lider na de suyu tiempo: “Quemodo man ustedes puede cree, cay ta busca lang ustedes el alabanza de uno y otro?” (Juan 5:44) El influencia na maga universidad puede causa con el un persona que queda orgulloso, un custumbre que ta odia el Dios.​—Proverbio 6:16, 17; 1 Pedro 5:5.

•   Falso idea: El cada uno amo el determina si cosa el justo y si cosa el malo

   Ta sigui el maga Testigo de Jehova con el principio del Dios acerca si cosa el justo y malo. (Isaias 5:20) Pero asegun na un articulo na Journal of Alcohol and Drug Education, manada estudiante el “ya hace decision que contra na cosa sila ta pensa que justo y malo” por causa na pressure del otro estudiante alli na maga universidad. h Amo tambien se el cosa ya habla na Biblia: “El maga barcada malo ta hace cambia el custumbre bueno de un gente.” (1 Corinto 15:33) Na maga universidad, comon ya el maga practica que ta odia el Dios como el burracherias, usada de droga y sexo maskin gendeh pa casao y ta anima pa gane con otro que hace con ese.​—1 Corinto 6:9, 10; 2 Corinto 7:1.

•   Falso idea: El alto educacion amo el de con todo buen manera para progresa el mundo

   Sabe kame que manada el ta saca alto educacion gendeh para queda rico, prominente o cay tiene sila mal deseo. Ta hace sila este cay quierre sila queda enbuenamente el diila vida y para progresa el mundo. Bueno se maga goal pero otro el manera del maga Testigo de Jehova. Igual con Jesus, ta creé kame que el Reino del Dios el solamente esperanza para na un mas bueno mundo. (Mateo 6:9, 10) Pero, gendeh lang kame basta ta espera que solva el Reino con el maga problema del mundo. Sino igual con Jesus, ta predica kame con el “buen noticia acerca del Reino” na entero mundo y ta ayuda con el miles de maga gente cada año para queda mas enbuenamente el diila vida. i​—Mateo 24:14.