El maga Testigo de Jehova ta ofrece un efectivo manera para puede tu aprende si cosa ta enseña el Biblia. El diamon programa de estudiada del Biblia puede ayuda contigo para:

•   Queda alegre

•   Queda amigo del Dios

•   Aprende si cosa el maga promesa del Biblia na futuro

Na este articulo

•  Paquemodo ta hace el Bible study?

•  Tiene ba este pago?

•  Paquemodo de tarda el estudiada?

•  Paquemodo yo principia?

•  Puede ba yo pruba anay con el estudiada?

•  Si acepta yo un Bible study, hay forza ba conmigo que queda un Testigo de Jehova?

•  Puede ba yo usa con el de mio mismo Biblia?

•  Puede ba yo invita con otro que man junto conmigo na estudiada?

•  Paquemodo si yan Bible study ya yo de antes junto na maga Testigo de Jehova? Puede ba yo estudia otravez?

•  Tiene ba otro manera de estudiada que nuay quien ta enseña conmigo?

 El un Testigo de Jehova hay ayuda contigo para queda familiar na Biblia y hace se ustedes topico por topico. Usando el publicacion Queda Alegre Hasta Para Cuando!, hay aprende tu si cosa ta enseña el Biblia y si paquemodo este puede ayuda contigo. Para sabe pa mas, mira con este video.

 Nuay. Ta sigui el maga Testigo de Jehova con el direccion que ya dale si Jesus con el de suyu maga dicipulo: “Ya recivi ustedes libre; dale lang tamen libre.” (Mateo 10:8, El Nuevo Testamento na Chavacano) Mas pa, nuay tambien pago el maga material que hay usa na estudiada, igual na Biblia y na publicacion Queda Alegre Hasta Para Cuando!

 Tiene 60 leccion na entero estudiada. Depende contigo si paquemodo tu de paspas hace acaba con este pero manada estudiante el ta estudia un leccion o mas pa cada semana.

1.  1. Man fill out con el online form. Hay usa kame con el personal informacion que yan submit tu para lang puede contigo man contact el uno del maga Testigo de Jehova.

2.  2. Man contact contigo el un Testigo de Jehova. Explica le contigo si cosa tu puede expecta na de tuyu estudiada del Biblia y hay contesta le con el de tuyu maga pregunta.

3.  3. Discuti ustedes si paquemodo hace con el estudiada. Puede hace con el estudiada na personal o por medio na telefono, video call, carta o email. El estudiada ta alcanza maga un hora pero puede con este hace mas corto o mas largo depende na de tuyu schedule.

 Si. Para hace con ese, man fill out con el online form. Si man contact contigo el un Testigo de Jehova, habla con ele que quierre tu pruba anay con el estudiada para mira si gusta tu con este. Hay usa le con el brosyur Queda Alegre Hasta Para Cuando! que tiene tres leccion que puede ayuda contigo para mira si gusta ba tu con el estudiada.

 Gendeh. El maga Testigo de Jehova quierre-quierre enseña con el maga gente acerca na Biblia pero gendeh kame ta forza maskin con quien que entra na diamon religion. Ta enseña kame si cosa el Biblia ta enseña pero sabe kame que el cada persona tiene el derecho para iscuji si cosa le creé.—1 Pedro 3:15.

 Si, puede tu usa maskin cosa translation de Biblia que quierre tu. Ta gusta kame usa con el New World Translation of the Holy Scriptures cay claro y justo el translation de este pero sabe kame que el manada gente mas quierre usa con el translation que familiar sila.

 Si. Puede tu invita con el de tuyu entero familia o maskin quien amigo de tuyu.

 Si. Gane, baka mas gusta tu con el diamon programa de estudiada ahora cay ya hace con este mas bonito para mas puede ayuda con el maga gente. Mas manada ya este letrato y video contra de antes.

 Si. Maskin pa el mayoria del maga estudiante mas ta puede beneficia si ta estudia junto na maga Testigo de Jehova, mas quierre el cuanto que na primero, sila lang anay solo estudia. Na seccion Maga Ayuda Para na Estudiada del Biblia, puede tu mira maga libre tool y material que puede ayuda contigo na de tuyu estudiada del Biblia. Este el cuanto tool que puede ayuda contigo:

•   Maga Video. Este maga corto video ta explica acerca na maga importante enseñanza na Biblia.

•   Contestacion na Maga Pregunta Acerca na Biblia. Este maga articulo ta dale maga contestacion na maga pregunta acerca na Biblia.