Ta conoce kame si cosa ya puede hace el ciencia y ta creé kame con el cosa este ya puede discubri que base na evidencia.

 “El ciencia amo el estudiada del maga cosas alrededor kanaton y el saber que puede kita saca acerca con este.” (Collins Cobuild Advanced Learner’s English Dictionary) Maskin pa el Biblia gendeh un libro de ciencia, ta anima este con el maga gente que estudia con el cosas alrededor kanaton y beneficia na cosa ya puede discubri el otro. Considera con el cuanto ejemplo:

•   Astronomy: “Man tanga ustedes na cielo y mira. Quien ya crea con este maga cosas? Ele el quien ta guia kanila como maga soldao y ta cunta le con el cada uno kanila; ta llama le kanila na diila nombre.”—Isaias 40:26.

•   Biology: “Ta converza [si Solomon] acerca na maga pono, estaba na cedro na Lebanon hasta na hyssop que ta crici na pader; ta converza le acerca na maga animal, pajaro, pescao y maga animal que tan camang.”—1 Rey 4:33.

•   Medicine: “Gendeh el maga gente bueno el cuerpo el quien necesita doctor, sino el maga emfermo.”—Lucas 5:31.

•   Meteorology: “Ya puede ba tu entra na bodega de nieve o ya puede ba tu mira con el bodega de hielo . . . ? Onde estaba el viento del parte este que ta supla na tierra?”—Job 38:22-24.

 El diamon literatura ta respeta con el ciencia. Gane, tiene kame maga articulo que ta discuti acerca na maga cosas alrededor kanaton y na cosa el ciencia ya puede discubri. El maga Witness mayores ta anima con el diila maga anak que entra escuela para puede sila mas entende con el maga cosas alrededor kanila. El cuanto del maga Testigo de Jehova tiene profesion que conectao na ciencia igual na biochemistry, mathematics y physics.

 Para kanamon, el ciencia gendeh ta puede contesta con el todo pregunta del gente. a Por ejemplo, el maga geologist ta estudia si de cosa hacido el tierra y el maga biologist ta estudia si paquemodo tan function el diaton cuerpo. Pero, porque bien exacto el hacida del tierra que ta puede este sustene con el vida y porque tiene coordinacion el maga parte del cuerpo?

 Convincido kame que el Biblia lang el puede dale justo contestacion con ese maga pregunta. (Salmo 139:13-16; Isaias 45:18) Poreso, ta creé kame que necesita aprende con el ciencia y con el Biblia para tiene buen educacion.

 Tiene vez, el ciencia dol gendeh harmonia na Biblia. Pero el deverasan, ta sucede se cay nuay entende el maga gente si cosa deverasan ta enseña el Biblia. Por ejemplo, nuay este enseña que ya crea con el tierra adentro de seis dia que tiene 24 hora.—Genesis 1:1; 2:4.

 Cuanto maga teoria que ta pensa el otro que base na ciencia el nuay bastante evidencia y gendeh aceptable na cuanto scientist. Por ejemplo, ciendo bien bale y maka-bilib el diseño del maga cosas alrededor kanaton, manada maga biologist, chemist y otro pa el tan uyun kanaton que el maga cosas que tiene vida nuay existi por medio na evolucion.