Ta cunta kame como un Testigo de Jehova con aquellos quien activo ta predica con el buen noticia acerca na Reino del Dios cada mes. (Mateo 24:14) Incluido aqui aquellos quien bautizao ya como un Witness y aquellos quien nuay pa bautiza pero cualificao ya predica.

 Gendeh necesita dona sen el un persona para cunta con ele como un Witness o para tiene assignment o privilegio na diamon organizacion. (Maga Actividad 8:18-20) El deverasan, mayoria de aquellos quien ta dona gendeh ta manda conoce si quien sila. El cada Witness voluntario ta dale diila tiempo, fuerza y donacion para na trabajo na entero mundo depende na de suyu querrer y circumstancia.—2 Corinto 9:7.

 Cada mes, tan report el maga Witness con el diila trabajo predicacion na diila local congregacion. Voluntario sila ta hace con este report.

 Ta cunta con el report del congregacion y ta imbia con el total de este na branch office na diila lugar. Despues, imbia el branch con el total del report de cada nacion o teritorio na diamon world headquarters.

 Na fin del cada service year, a ta determina sila si cosa el de con todo alto numero del maga Witness para na ese año na cada nacion. Y tan total con ese para sabe si cuanto el Witness na entero mundo. El detallado report para na cada nacion puede mira na “Around the World” seccion na diamon website. Ta anima kanamon este maga report igual si paquemodo el maga report ya anima con el primer siglo maga Cristiano.—Maga Actividad 2:41; 4:4; 15:3.

 Maskin gendeh kame ta inclui kanila na cuntada como un Witness, tan welcome kame kanila na diamon congregacion. Mayoria kanila ta atende na Comemoracion del muerte del Cristo cada año, poreso puede sabe si cuanto bilog sila si compara con el numero del cuanto ya atende na ese ocasion na numero del maga Testigo de Jehova. Del 2023, tiene 20,461,767 ya atende na Comemoracion.

 Manada tambien el quien ta beneficia na libre Bible study maskin gendeh sila ta atende na diamon maga miting. Del 2023, tiene average de 7,281,212 con quien kame tan Bible study cada mes y el cuanto diila junto-junto tan Bible study.

 Aquellos na gobierno quien tan census ta pregunta con el maga gente si cosa el diila religion para determina el numero del miembro del un particular religion. Por ejemplo, el U.S. Census Bureau ya habla que el diila survey amo para “determina si aquellos con quien sila yan census ta considera con el diila mismo cuerpo como miembro del un particular religion.” Mas pa, ya menciona sila que el diila census amo “base lang na personal opinion del maga gente y gendeh si cosa el deverasan.” Pero el maga Testigo de Jehova gendeh ta inclui na cuntada con aquellos quien ta clama que Witness sila sino con aquellos lang quien activo ta predica na otro y tan report si cosa sila ya puede hace na ministerio.